ກອງປະຊຸມອົງການປົກຄອງນະຄອນຫຼວງວຽງຈັນ (ນວ) ຈັດຂຶ້ນວັນທີ 31 ສິງຫາ 2023 ທີ່ຫ້ອງວ່າການ ນວ ເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງ ນວ ມີບັນດາຮອງເຈົ້າຄອງ ແລະ ສະມາຊິກອົງການປົກຄອງ ນວ ເຂົ້າຮ່ວມ. ທ່ານ ອາດສະພັງທອງ ສີພັນດອນ ກ່າາວວ່າ: ກອງປະຊຸມຄັ້ງນີ້ໄດ້ພ້ອມກັນກວດກາ ສະຫຼຸບຕີລາຄາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງ ນວ ໃນໄລຍະເດືອນ ສິງຫາ ຜ່ານມາ ເພື່ອເຫັນໄດ້ດ້ານດີ ຜົນໄດ້ຮັບ ດ້ານອ່ອນ ຂໍ້ຄົງຄ້າງ ແລະ ຂໍ້ຂາດຕົກບົກຜ່ອງໃນການຊີ້ນຳ-ນໍາພາ ແຕ່ລະຂະແໜງການ ຂອງສະມາຊິກອົງການປົກຄອງໃນໄລຍະ 1 ເດືອນຜ່ານມາ ແລະ ພ້ອມນັ້ນໄດ້ຄົ້ນຄວ້າບັນດາໜ້າວຽກປິ່ນອ້ອມ ເພື່ອຄວາມເປັນເອກະພາບຮັບຮອງ ແລະ ພ້ອມກັນວາງມາດຕະການ ທິດທາງຈັດຕັ້ງປະຕິບັດໃນ 1 ເດືອນຕໍ່ໜ້າ.
ນອກນັ້ນພ້ອມກັນສຸມໃສ່ເຊື່ອມຊືມ ຄົ້ນຄ້ວາ ແລະ ເປັນເອກະພາບກັນຢູ່ 7 ໜ້າວຽກຕົ້ນຕໍຄື:ຮັບຟັງການລາຍງານ ແລະ ໃຫ້ທິດຊີ້ນໍາກ່ຽວກັບບົດສະຫຼຸບການຈັດຕັ້ງະຕິບັດວາລະແຫ່ງຊາດຢູ່ ນວ ໄລຍະຜ່ານມາ ຮັບຟັງການລາຍງານກ່ຽວກັບແຜນເປີດສົກຮຽນໃໝ່ປະຈໍາສົກປີ 2023-2024 ຮັບຟັງການລາຍງານກ່ຽວກັບແຜນກະກຽມບຸນອອກພັນສາປະວໍລະນາ ແລະ ບຸນຂ່ວງເຮືອປະຈໍາປີ 2023 ບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າປະຈໍາປີ 2023 ຮັບຟັງການລາຍງານກ່ຽວກັບການສະເໜີຂໍອະນຸຍາດສືບຕໍ່ການຈັດງານແຂ່ງຂັນກີລາປະຈໍາປີ ທົ່ວ ນວ ຄັ້ງທີ II ຮັບຟັງການລາຍງານກ່ຽວກັບວຽກອອກແບບ ເພື່ອກໍ່ສ້າງປະຕິມະກໍາໃສ່ວົງວຽນໜອງໄຮ ຖະໜົນທ່າເດື່ອ ເມືອງຫາດຊາຍຟອງ ນວ ຮັບຟັງການລາຍງານກ່ຽວກັບການສະເໜີຂໍ້ດັດແກ້ມູນຄ່າສັນຍາວ່າຈ້າງບໍລິສັດຮັບເໝົາກໍ່ສ້າງ CP-2 ຂອງໂຄງການກໍ່ສ້າງຂະຫຍາຍໂຮງງານນໍ້າປະປາຈີ່ນາຍໂມ້ ແລະ ລະບົບທໍ່ຂອງ ນວ ແລະ ຮັບຟັງການລາຍງານ ແລະ ໃຫ້ທິດຊີ້ນໍາກ່ຽວກັບສະພາບພົ້ນເດັ່ນປະຕໍາເດືອນສິງຫາ ແລະ ແຜນວຽກຈຸດສຸມປະຕໍາເດືອນ ກັນຍາ 2023.
