ບັນຫາລະເບີດບໍ່ທັນແຕກ ເປັນໄພຂົ່ມຂູ່ຕໍ່ການດຳລົງຊີວິດຂອງປະຊາຊົນ, ທັງເປັນສິ່ງກີດຂວາງຕໍ່ການພັດທະນາເສດຖະກິດ-ສັງຄົມຂອງ ສປປ ລາວ, ສະຫະລັດອາເມຣິກາໄດ້ໃຫ້ຄວາມສຳຄັນຕໍ່ການເກັບກູ້ລະເບີດບໍ່ທັນແຕກ ໃນ ສປປ ລາວ ຊຶ່ງໃນແຕ່ລະປີໄດ້ໃຫ້ການຊ່ວຍເຫຼືອເພີ່ມຂຶ້ນໂດຍສະເພາະ ນັບແຕ່ປີ 2016 ເປັນຕົ້ນມາ.
ທ່ານ ປີເຕີ ເຮມ໋ອນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະລັດອາເມຣິກາປະຈຳ ສປປ ລາວ ໄດ້ໃຫ້ສຳພາດຕໍ່ໜັງສືພິມປະຊາຊົນ ເມື່ອບໍ່ດົນມານີ້ ວ່າ: ສະຫະລັດອາເມຣິກາໄດ້ໃຫ້ການຊ່ວຍເຫຼືອ ສປປ ລາວ ຫຼາຍຂະແໜງການ, ໃນນັ້ນຫຼາຍກວ່າໝູ່ແມ່ນການເກັບກູ້ລະເບີດບໍ່ທັນແຕກ (ລບຕ) ແລະ ການຊ່ວຍເຫຼືອນັ້ນກໍໄດ້ເພີ່ມຂຶ້ນ 2-3 ເທົ່າ, ນັບແຕ່ປີ 2016 ເປັນຕົ້ນມາ ຫຼື ນັບແຕ່ອະດີດປະທານາທິບໍດີ ບາຣັກ ໂອບາມາ ມາຢ້ຽມຢາມ ສປປ ລາວ, ຈົນມາຮອດປັດຈຸບັນ, ໃນຂະນະດຽວກັນ ໃນ 5 ປີທີ່ຜ່ານມາ ຈຳນວນໜຶ່ງຂອງທຶນຊ່ວຍເຫຼືອກໍໄດ້ນຳໃຊ້ເຂົ້າໃນການສຳຫຼວດ ເນື້ອທີ່ບາງແຂວງທີ່ໄດ້ຮັບຜົນກະທົບຈາກລະເບີດບໍ່ທັນແຕກ, ເປົ້າໝາຍຂອງການສຳຫຼວດກໍເພື່ອໃຫ້ຮູ້ຈະແຈ້ງວ່າ ບ່ອນໃດທີ່ຍັງມີລະເບີດບໍ່ທັນແຕກຫຼາຍກວ່າໝູ່ ແລະ ເຂດໃດທີ່ມີຄວາມສຳຄັນຕໍ່ການພັດທະນາເສດຖະກິດ-ສັງຄົມ ຫຼື ເປັນບ່ອນທຳມາຫາກິນຂອງປະຊາຊົນ ຈະຕ້ອງເນັ້ນໃສ່ການເກັບກູ້ລະເບີດບໍ່ທັນແຕກ ເພື່ອເພີ່ມປະສິດທິພາບໃນການເກັບກູ້ ແທນທີ່ຈະເດີນເກັບກູ້ແບບບໍ່ໄດ້ກະກຽມ ຫຼື ບໍ່ໄດ້ສຳຫຼວດກ່ອນ, ມາຮອດປັດຈຸບັນ ການສຳຫຼວດໃກ້ຈະສຳເລັດໃນ 6 ແຂວງເປົ້າໝາຍ ແລະ ຄາດວ່າ ໃນທ້າຍປີນີ້ ຈະເພີ່ມຈຳນວນທີມງານ ເພີ່ມຈຳນວນຄົນຂຶ້ນ 2 ເທົ່າ ເພື່ອລົງໄປເກັບກູ້ລະເບີດບໍ່ທັນແຕກຢູ່ເຂດເປົ້າໝາຍ.
ທ່ານ ທູດສະຫະລັດ ປະຈຳ ສປປ ລາວ ກ່າວອີກວ່າ: ເປັນທີ່ໜ້າພູມໃຈທີ່ການເກັບກູ້ລະເບີດມີຄວາມຄືບໜ້າ ຊຶ່ງ 20-30 ປີກ່ອນໜ້ານີ້, ມີຜູ້ໄດ້ຮັບບາດເຈັບ ຈາກລະເບີດຕົກຄ້າງຢູ່ ສປ ລາວ ນັບພັນຄົນຕໍ່ປີ ແລະ 15 ປີກ່ອນໜ້ານີ້ ກໍມີຄົນໄດ້ຮັບບາດເຈັບ 300 ກວ່າຄົນຕໍ່ປີ, ໄລຍະ 2-3 ປີມານີ້ ຫຼຸດລົງ ເຫຼືອປະມານ 40-50 ຄົນຕໍ່ປີ ເຖິງວ່າຕົວເລກຍັງສູງ ແຕ່ກໍຫຼຸດລົງໃນແຕ່ລະປີ.
ສຳລັບໃນອະນາຄົດ, ສະຫະລັດຍັງສືບຕໍ່ຮ່ວມມືກັບລັດຖະບານລາວ ລວມທັງຄູ່ຮ່ວມພັດທະນາອື່ນໆ ທັງອົງການຈັດຕັ້ງສາກົນ ເພື່ອເຮັດແນວໃດບັນຫາລະເບີດບໍ່ທັນແຕກ ຈະບໍ່ເປັນອຸປະສັກຕໍ່ການພັດທະນາເສດຖກິດ-ສັງຄົມຂອງ ສປປ ລາວ ອີກຕໍ່ໄປ, ນີ້ແມ່ນຄວາມຕັ້ງໃຈຂອງລັດຖະບານສະຫະລັດອາເມຣິກາ ຕໍ່ລັດຖະບານ ແລະ ປະຊາຊົນລາວ.
ຂ່າວ: ຄ. ຄຳປະສິດ
