ຢູ່ສໍານັກງານ ວາລະສານກົ້ງສານ ສູນກາງພັກກອມມູນິດຫວຽດນາມ ນະຄອນຫຼວງຮ່າໂນຍ ສສ ຫວຽດນາມ, ສະຫາຍ ຟາມມິງຕັວນ ວ່າການຫົວໜ້າບັນນາທິການໃຫຍ່ ວາລະສານກົ້ງສານ ໄດ້ໃຫ້ການຕ້ອນຮັບ ສະຫາຍ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ ຜູ້ຊີ້ນໍາວາລະສານອະລຸນໃໝ່ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ລະຫວ່າງ ວັນທີ 7-14 ສິງຫາ 2023.
ພິທີຕ້ອນຮັບໄດ້ຈັດຂຶ້ນ ເມື່ອວັນທີ 8 ສິງຫາ, ສະຫາຍ ຟາມມິງຕັວນ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະ ຢູ່ ສສ ຫວຽດນາມ ໃນຄັ້ງນີ້, ພ້ອມທັງຢືນຢັນວ່າ: ຝ່າຍຫວຽດນາມ ກໍຄືວາລະສານກົ້ງສານ ພ້ອມໃຫ້ການຮ່ວມມືສະໜັບສະໜູນຢ່າງແຂງແຮງ ໂດຍສະເພາະການແລກປ່ຽນບົດຮຽນ, ແບ່ງປັນປະສົບການ, ແບ່ງປັນຂໍ້ມູນຂ່າວສານ, ການຝຶກອົບຮົມ-ຍົກລະດັບທາງດ້ານວິຊາການ ແລະ ເຄື່ອງມືອຸປະກອນຮັບໃຊ້ຈໍານວນໜຶ່ງທີ່ຈຳເປັນ ໃຫ້ແກ່ ວາລະສານອະລຸນໃໝ່ ເພື່ອຮັບປະກັນ ແລະ ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ສະ ຫາຍ ຟາມມິງຕວັນ ສະແດງຄວາມເຊື່ອໝັ້ນວ່າ: ພາຍໃຕ້ການ ນໍາພາ-ຊີ້ນໍາ ຂອງສູນກາງພັກປະຊາຊົນປະຕິວັດລາວ ໂດຍສະເພາະ ການຊີ້ນຳໂດຍກົງຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ສປປ ລາວ ຈະຍາດໄດ້ຜົນງານໃໝ່ໃຫຍ່ຫຼວງກວ່າເກົ່າ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ.
ສະຫາຍ ຟາມມິງຕັວນ ໄດ້ກ່າວວ່າ: ສາຍພົວພັນຮ່ວມມືທີ່ມີມູນເຊື້ອຂອງສອງພັກ, ສອງລັດ ແລະ ປະຊາຊົນສອງຊາດ ກໍຄືສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ບໍລິສຸດຜຸດຜ່ອງ ທັງເປັນສະຫາຍ ທັງເປັນອ້າຍນ້ອງ ຊຶ່ງຍາມໃດກໍຄຽງບ່າຄຽງໄຫຼ່ກັນ, ອູ້ມຊູຊ່ວຍເຫຼືອຊຶ່ງກັນ ແລະ ກັນ ໃນໄລຍະການປະຕິວັດປົດປ່ອຍຊາດ ໃນເມື່ອກ່ອນ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ.
ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມື ກໍຄືຜົນງານທີ່ຍາດມາໄດ້ໃນໄລຍະຜ່ານມາ ແລະ ສືບຕໍ່ຈັດຕັ້ງປະຕິບັດບົດບັນທຶກຊ່ວຍຈໍາການຮ່ວມມືຂອງສອງວາລະສານໄລຍະປີ 2023-2027 ໃຫ້ບັນລຸຜົນສໍາເລັດ. ພ້ອມດຽວກັນນີ້, ກໍໄດ້ມີການແລກປ່ຽນບັນຫາອື່ນໆທີ່ມີຄວາມສົນໃຈ ຊຶ່ງເປັນການປະກອບສ່ວນສໍາຄັນເຂົ້າໃນການປັບປຸງວຽກງານວາລະສານ ແລະ ເພີ່ມທະວີການພົວພັນຮ່ວມມືຂອງສອງວາລະສານ ໃນຕໍ່ໜ້າ ໃຫ້ແໜ້ນແຟ້ນຂຶ້ນກວ່າເກົ່າ.
ຂະນະດຽວກັນນີ້, ສະຫາຍ ນາງ ວິລະວອນ ພັນທະວົງ ໄດ້ສະແດງຄວາມຂອບໃຈຕໍ່ ສະຫາຍ ຟາມມິງຕັວນ ທີ່ໄດ້ສະຫຼະເວລາອັນມີຄ່າໃຫ້ຕ້ອນຮັບ ແລະ ເຮັດວຽກຮ່ວມກັບຄະນະວາລະສານອະລຸນໃໝ່ ດ້ວຍບັນຍາກາດອັນສະໜິດສະໜົມຖານອ້າຍນ້ອງ, ພ້ອມທັງສະແດງຄວາມຂອບໃຈມາຍັງພັກ, ລັດ ແລະ ປະຊາຊົນຫວຽດນາມ ເວົ້າລວມ, ເວົ້າສະເພາະ ວາລະສານກົ້ງສານ ສູນກາງພັກກອມມູນິດຫວຽດນາມ ທີ່ໄດ້ໃຫ້ການຊ່ວຍເຫຼືອ ວາລະສານອະລຸນໃໝ່ ຕະຫຼອດມາ.
ໃນໂອກາດທີ່ມີຄວາມໝາຍສຳຄັນນີ້, ສະຫາຍ ນາງ ວິລະວອນ ພັນທະວົງ ພ້ອມດ້ວຍຄະນະ ໄດ້ເຂົ້າຮ່ວມພິທີເປີດວາລະສານເອເລັກໂຕຣນິກເຫດການຂອງວາລະສານກົ້ງສານ. ນອກຈາກນີ້, ກໍໄດ້ມີການພົບປະແລກປ່ຽນບົດຮຽນກັບຄະນະໂຄສະນາສຶກສາສູນກາງພັກ, ສະຖາບັນສື່ມວນຊົນ ແລະ ໂຄສະນາແຫ່ງຊາດ, ສຳນັກພິມຈໍາໜ່າຍການເມືອງແຫ່ງຊາດສຶ້ເຖິດ, ກຸ່ມບໍລິສັດອຸດສາຫະກໍາ-ໂທລະຄົມມະນາຄົມຫວຽດແທວ, ໄປຢ້ຽມຢາມ ແລະ ເຮັດວຽກ ຢູ່ແຂວງນິງບິ່ງ, ແຂວງບ່າເຣ້ຍ-ວຸ້ງເຕົ່າ, ແຂວງດົ່ງນາຍ ແລະ ນະຄອນໂຮ່ຈິມິນ.
(ຂ່າວ: ຄໍາພັນ ຂະທຸມພົມ).
