ອົງການໄອຍະການປະຊາ ຊົນແຂວງອຸດົມໄຊ ຈັດກອງປະຊຸມສະຫຼຸບວຽກງານຮອບດ້ານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂຶ້ນເມື່ອບໍ່ດົນມານີ້ ທີ່ຫ້ອງປະຊຸມອົງ ການໄອຍະການປະຊາຊົນແຂວງ, ໂດຍການເປັນປະ ທານຂອງທ່ານນາງ ສົມຫວັງ ໄຊຍະຕິ ຫົວໜ້າອົງການໄອຍະການປະຊາຊົນແຂວງ, ມີຫົວໜ້າອົງການໄອຍະການປະຊາຊົນເຂດ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນ ເພື່ອເປັນການສະຫຼຸບຕີລາຄາວຽກງານຮອບດ້ານ 6 ເດືອນຕົ້ນປີຂອງອົງການໄອຍະການປະຊາຊົນແຂວງເພື່ອຍົກໃຫ້ເຫັນດ້ານດີຜົນງານ, ດ້ານອ່ອນຂໍ້ຄົງຄ້າງທີ່ຈະຕ້ອງໄດ້ສຸມໃສ່ແກ້ໄຂໃນຕໍ່ໜ້າເຊັ່ນ: ວຽກງານການເມືອງແນວຄິດ, ວຽກງານວິຊາສະເພາະ, ການແກ້ໄຂຄຳຮ້ອງ ແລະ ຄະດີຂັ້ນແຂວງ, ຂັ້ນເຂດ, ວຽກງານຫ້ອງການບໍລິຫານ-ການເງິນ, ຄົ້ນຄວ້າ-ສັງລວມ ແລະ ຈັດຕັ້ງນະໂຍບາຍຊຶ່ງສະແດງອອກຄື: ການແກ້ໄຂຄຳຮ້ອງ 6 ເດືອນຕົ້ນປີ 2023 ຂັ້ນແຂວງ ລວມທັງໝົດ 45 ສະບັບ, ໃນນັ້ນຄຳຮ້ອງກ່ຽວກັບຄະດີອາຍາ 22 ສະບັບ, ຄຳຮ້ອງກ່ຽວກັບຜູ້ຖຶກຫາ, ນັກໂທດມີ 17 ສະບັບ, ຄຳຮ້ອງກ່ຽວກັບຄະດີແພ່ງ 1 ສະບັບ ແລະ ຄຳຮ້ອງຂໍຄວາມເປັນທຳ 5 ສະບັບ, ການແກ້ໄຂຄະດີຂັ້ນຕົ້ນ, ຄະດີຂັ້ນຕົ້ນຄ້າງມາໃນປີ 2022 ມີ 4 ເລື່ອງ, ໃນນັ້ນເປັນຄະດີອາຍາ 4 ເລື່ອງ. ຄະດີເຂົ້າໃໝ່ໃນ 6 ເດືອນຕົ້ນປີ 2023 ມີ 164 ເລື່ອງ, ໃນນີ້ເປັນຄະດີອາຍາ 162 ເລື່ອງ, ຄະດີແພ່ງ 2 ເລື່ອງ ລວມຄະດີຂັ້ນຕົ້ນທັງໝົດ 168 ເລື່ອງ, ໃນນີ້ເປັນຄະດີອາຍາ 166 ເລື່ອງ, ຄະດີແພ່ງ 2 ເລື່ອງ ແກ້ໄຂແລ້ວທັງໝົດ 133 ເລື່ອງ ເທົ່າກັບ 79,16 %, ຂອງຄະດີທັງໝົດ ແກ້ໄຂດ້ວຍຮູບການຕ່າງໆຄື: ຄະດີອາຍາ: ຖະແຫຼງສັ່ງຟ້ອງຂຶ້ນສານ 111 ເລື່ອງ, ສົ່ງກັບເຈົ້າໜ້າທີ່ 21 ເລື່ອງ, ຄະດີແພ່ງ: ສົ່ງສານ 1 ເລື່ອງ, ຍັງຄ້າງ 35 ເລື່ອງ ເທົ່າກັບ 20,83 %, ໃນນີ້ເປັນຄະດີອາຍາ 34 ເລື່ອງ ແລະ ຄະດີແພ່ງ 1 ເລື່ອງ. ນອກນີ້ຍັງມີຄະດີທີ່ພົ້ນເດັ່ນໃນ 6 ເດືອນຕົ້ນປີ 2023 ຄະດີອາຍາຄ້າ – ຂາຍຢາເສບຕິດມີ 125 ເລື່ອງເທົ່າກັບ 71,83 %. ຄະດີລັກຊັບມີ 12 ເລື່ອງ ເທົ່າກັບ 6,89 %. ຄະດີແພ່ງ:
ສາຍຜົວເມຍມີ 2 ເລື່ອງເທົ່າກັບ 40% ແລະ ວຽກງານອື່ນໆ ພ້ອມດຽວກັນນີ້ຍັງໄດ້ວາງທິດທາງແຜນການ 6 ເດືອນທ້າຍປີ 2023 ໂດຍຈະສືບຕໍ່ສຶກສາອົບຮົມການເມືອງ-ນຳພາແນວຄິດຕໍ່ຖັນແຖວສະມາຊິກພັກ, ພະນັກງານ-ລັດຖະກອນໃຫ້ມີຄວາມອຸ່ນອ່ຽນທຸນທ່ຽງຕໍ່ການນຳພາຂອງພັກ-ລັດ, ສືບຕໍ່ຄົ້ນຄວ້າແກ້ໄຂຄຳສະເໜີ ແລະ ຄຳຮ້ອງຂອງການຈັດຕັ້ງ ແລະ ພົນລະເມືອງທີ່ຍັງຄ້າງ ແລະ ເຂົ້າໃໝ່ໃຫ້ສໍາເລັດ 95%. ຄົ້ນຄວ້າແກ້ໄຂ ຄະດີ ທີ່ຍັງຄ້າງ ແລະ ເຂົ້າໃໝ່ໃຫ້ວ່ອງໄວ ທັນກໍານົດເວລາທີ່ກົດໝາຍກໍານົດໄວ້ ໃຫ້ໄດ້ 95%. ເອົາ ໃຈໃສ່ເກັບກໍາສະຖິຕິປະຕິບັດ ຄໍາຕັດສິນຂອງສານ, ກວດກາຄໍາຕັດສິນຂອງສານ ເພື່ອຮັບ ປະກັນໃຫ້ຖືກຕ້ອງຕາມກົດໝາຍເອົາໃຈໃສ່ຕິດຕາມກວດກາອົງການສືບສວນ- ສອບສວນໃນການດຳເນີນຄະດີ ໂດຍສະເພາະແມ່ນ ການນຳໃຊ້ມາດຕະການສະກັດກັ້ນ ແລະ ມາດຕະ ການສືບສວນ – ສອບສວນ ໃຫ້ຖຶກຕ້ອງຕາມກົດໝາຍ.
ຂ່າວ: ແສງອາທິດ
