ແຫລ່ງຂ່າວຈາກ ແຂວງຈໍາປາສັກ ໃຫ້ຮູ້ວ່າ: ກອງປະຊຸມອົງການປົກຄອງແຂວງ ຈຳປາສັກ ເປີດກວ້າງ ຄັ້ງທີ I ປະຈໍາປີ 2023 ຈັດຂຶ້ນໃນ ວັນທີ 21 ກໍລະກົດ 2023 ພາຍໃຕ້ການເປັນປະທານ ຂອງ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີຮອງເຈົ້າແຂວງຈຳປາສັກ, ບັນດາຫົວໜ້າພະແນກ-ກົມກອງອ້ອມຂ້າງແຂວງ, ເຈົ້ານະຄອນປາກເຊ ແລະ ບັນດາເຈົ້າເມືອງ 9 ເມືອງເຂົ້າຮ່ວມ.
ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ກ່າວໄຂກອງປະຊຸມວ່າ: ກອງປະຊຸມຄັ້ງນີ້, ຈະໄດ້ສະຫລຸບຄືນການຈັດຕັ້ງປະຕິບັດວຽກງານຂອງ ອົງການປົກຄອງແຂວງ ໃນໄລຍະ 6 ເດືອນຜ່ານມາ ແລະ ກໍານົດທິດທາງແຜນການ ໃນໄຕມາດທີ 3 ປີ 2023, ລົງເລິກຄົ້ນຄວ້າປຶກສາຫາລື ໃນບາງຂົງເຂດວຽກງານຈໍານວນໜຶ່ງ ຕາມຫົວຂໍ້ ວາລະກອງປະຊຸມ ທີ່ພະແນກການ, ກົມກອງ, ນະຄອນ ແລະ ເມືອງ ທີ່ໄດ້ກະກຽມບົດສະຫລຸບຕີລາຄາສັງລວມລາຍງານ ຕໍ່ກອງປະຊຸມໃນຄັ້ງນີ້ ເປັນຕົ້ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປິ 2023; ການຈັດຕັ້ງປະຕິບັດແຜນການຈັດເກັບລາຍຮັບງົບປະມານແຫ່ງລັດ; ແຜນຮັບຮອງໃຫ້ແກ່ການຜະລິດລະດູຝົນ ແລະ ຕິດພັນກັບການກະກຽມພິທີເປີດການອັດນໍ້າ ໂຄງການຝາຍນໍ້າລົ້ນຫ້ວຍວັງເຫ ຢູ່ເມືອງໂພນທອງ; ລາຍງານຄວາມຄືບໜ້າການຈັດຕັ້ງປະຕິບັດ 15 ຄາດໝາຍບູລິມະສິດ ຂອງວຽກງານສຶກສາ ແລະ ກິລາ ຕິດພັນກັບການປະຕິບັດບາງມາດຕະການເພື່ອຍົກຄຸນນະພາບການຮຽນ-ການສອນ, ແກ້ໄຂບັນຫາຄູອາສາສະໝັກ, ການຂາດແຄນຄູສອນຢູ່ເຂດຊົນນະບົດ ແລະ ອື່ນໆ; ລາຍງານການກະກຽມໃຫ້ແກ່ການຈັດຕັ້ງປະຕິບັດວາລະຂອງແຂວງ ວ່າດ້ວຍການສົ່ງເສີມ ແລະ ພັດທະນາການທ່ອງທ່ຽວ ເພື່ອເປັນການໂຄສະນາດຶງດູດນັກທ່ອງທ່ຽວພາຍໃນ ແລະ ພາກພື້ນສາກົນ, ພ້ອມທັງປັບປຸງການບໍລິການທ່ອງທ່ຽວ ເພື່ອຮອງຮັບນັກທ່ອງທ່ຽວທີ່ເພີ່ມຂຶ້ນ, ເປັນການກະກຽມຄວາມພ້ອມໃນດ້ານຕ່າງໆ ໃຫ້ແກ່ການເປີດປີທ່ອງທ່ຽວລາວ ປີ 2024. ນອກຈາກນັ້ນ, ຍັງໄດ້ຄົ້ນຄວ້າປຶກສາຫາລື ແລະ ປະກອບຄໍາເຫັນວຽກງານສຳຄັນຕ່າງໆ ຂອງແຂວງ ອີກຈຳນວນໜຶ່ງ.
ໂອກາດນີ້, ທ່ານ ເຈົ້າແຂວງຈຳປາສັກ ໄດ້ຮຽກຮ້ອງມາຍັງ ຜູ້ແທນກອງປະຊຸມ ແລະ ເຊື່ອວ່າບັນດາທ່ານຈະພ້ອມກັນເສີມຂະຫຍາຍຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ ປະກອບຄຳຄິດເຫັນຕໍ່ເນື້ອໃນຕ່າງໆ ເພື່ອຄວາມເປັນເອກະພາບໃນດ້ານທັດສະນະແນວຄິດ, ມີຄວາມບຸກບືນຕັດສິນໃຈ, ຄວາມຮັບຜິດຊອບໃນ ການເຮັດວຽກງານຕົວຈິງ, ສູ້ຊົນຜ່ານຜ່າແກ້ໄຂຄວາມທຸກຍາກ, ຈຳກັດຂໍ້ຂາດຕົກບົກຜ່ອງ, ເຮັດໃຫ້ການຈັດຕັ້ງປະຕິບັດຄາດໝາຍສູ້ຊົນທີ່ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ, ແຜນງົບປະມານການເງິນໃນໄຕມາດທີ 3 ປີ 2023 ທີ່ວາງອອກໃຫ້ມີປະສິດທິຜົນສູງ.
ຂ່າວ: ທັດຊະນະ
ພາບ: ພູທິບສະຫວັນ.
