ຂ່າວສານຫວຽດນາມລາຍງານວ່າ: ຕາມສູນຄົ້ນຄວ້າທໍລະນີສາດ ເຢຍລະມັນ (GFZ) ໃຫ້ຮູ້ວ່າ: ໄດ້ເກີດແຜ່ນດິນໄຫວຂະໜາດ 6,6 ຣິກເຕີ ຢູ່ແຄມຝັ່ງທະເລຂອງອາເມຣິກາກາງ ເວລາ 0:22 ໂມງ ຂອງວັນທີ 19 ກໍລະກົດ (ຕາມເວລາ GMT ຄື 7:22 ໂມງ ຂອງວັນດຽວກັນຕາມເວລາຫວຽດນາມ).
ຂ່າວລະບຸວ່າ: ຈຸດສູນກາງຂອງແຜ່ນດິນໄຫວຢູ່ທີ່ 12,74 ເສັ້ນແວງເໜືອ ແລະ 88,09 ເສັ້ນແວງຕາເວັນຕົກ, ມີຄວາມເລິກຈຸດສຸມ 75,1 ກິໂລແມັດ. ແຜ່ນດິນໄຫວໄດ້ສັ່ນສະເທືອນເປັນບໍລິເວນກວ້າງຢູ່ຂົງເຂດອາເມຣິກາກາງ ຈາກ ນິກຄາຣາກົວ ຈົນຮອດ ກົວເທລາມາ.
ໃນຂະນະທີ່, ອົງການສຳຫຼວດທໍລະນີວິທະຍາຂອງອາເມຣິກາ (USGS) ໃຫ້ຮູ້ວ່າ: ແຜ່ນດິນໄຫວມີຄວາມແຮງ 6,5 ລິກເຕີ ໂດຍມີຈຸດສູນກາງຢູ່ຫ່າງຈາກເມືອງອິນທິປູກາ ປະເທດເອວ ຊໍວາດໍ ທາງພາກໃຕ້ປະມານ 43 ກິໂລແມັດ, ຄວາມເລິກຈຸດສຸມແມ່ນ 70 ກິໂລແມັດ.
ໃນນະຄອນຫຼວງຊານ ຊໍວາດໍ ຂອງ ເອວ ຊໍວາດໍ, ປະຊາຊົນໄດ້ແລ່ນໄປຕາມຖະໜົນເພື່ອຫຼີກເວັ້ນອັນຕະລາຍຫຼັງຈາກອາຄານເຮືອນທີ່ສັ່ນສະເທືອນຍ້ອນແຜ່ນດິນໄຫວ.
ປັດຈຸບັນ, ຍັງບໍ່ທັນມີລາຍງານກ່ຽວກັບຄວາມເສຍຫາຍ ຫຼື ຜູ້ບາດເຈັບຍ້ອນແຜ່ນດິນໄຫວເທື່ອ. ກົມສິ່ງແວດລ້ອມຂອງປະເທດເອວ ຊໍວາດໍ ໄດ້ປະຕິເສດຄວາມສ່ຽງທີ່ຈະເກີດຄື້ນທະເລຂະໜາດໃຫຍ່ຍ້ອນແຜ່ນດິນໄຫວ.
ໃນ ນິກຄາຣາກົວ, ປະຊາຊົນໃນນະຄອນຫຼວງຂອງປະເທດ ເຊັ່ນດຽວກັນກັບຕາມແຄມຝັ່ງມະຫາສະໝຸດປາຊີຟິກ ຍັງຮູ້ສຶກເຖິງການສັ່ນສະເທືອນທີ່ຮຸນແຮງຂອງແຜ່ນດິນໄຫວ. ປັດຈຸບັນ, ຍັງບໍ່ທັນມີລາຍງານຄວາມເສຍຫາຍຈາກແຜ່ນດິນໄຫວຢູ່ໃນປະເທດ.
