ຕາມການລາຍງານຈາກ ທ່ານ ສົມດີ ຕົວວ່າງ ຫົວໜ້າໜ່ວຍງານປູກຝັງ, ຫ້ອງການກະສິກຳ ແລະ ປ່າໄມ້ເມືອງໝື່ນ ແຂວງວຽງຈັນ ໃຫ້ຮູ້ໃນວັນທີ 17 ກໍລະກົດ 2023 ນີ້ວ່າ: ກະສິກອນພາຍໃນເມືອງໝື່ນ ໄດ້ລົງມືປັກດຳເຂົ້ານາປີມາແຕ່ ຕົ້ນເດືອນມິຖຸນາ 2023 ມາຮອດປັດຈຸບັນ ສຳເລັດ ແລ້ວ 80% ໃນເນື້ອທີ່ທັງໝົດ 4.096 ເຮັກຕາ ແລະ ຄາດວ່າຈະສຳເລັດໃນທ້າຍເດືອນກໍລະກົດນີ້.
ສຳລັບແນວພັນເຂົ້າ ແມ່ນໄດ້ສົ່ງເສີມໃຫ້ປະຊາຊົນນຳໃຊ້ເຂົ້າພັນປັບປຸງ ເປັນຕົ້ນ ເຂົ້າທ່າດອກຄຳ 11, ທ່າດອກຄຳ 16 ແລະ ເຂົ້າພັນພື້ນເມືອງຈຳນວນໜຶ່ງ, ພ້ອມນີ້ ກໍໄດ້ອອກແຈ້ງການແນະນຳໃຫ້ກະສິກອນຕ້ອງມີການກຽມພ້ອມຕໍ່ກັບການຕ້ອນແລ້ງ-ຕ້ານຖ້ວມ ເພື່ອຮັບມືບໍ່ໃຫ້ມີຜົນກະທົບ ແລະ ເສຍຫາຍຢ່າງຮ້າຍແຮງ ໂດຍສະເພາະແມ່ນການຈັດການບໍລິຫານນ້ຳໃນເຂດທີ່ມີຝາຍ ແລະ ອ່າງເກັບນ້ຳ ເມື່ອມີຝົນຕົກໜັກຕິດຕໍ່ກັນ ຕ້ອງຕິດຕາມ ຝາຍ ຫລື ປະຕູລະບາຍນ້ຳ ເພື່ອບໍ່ໃຫ້ປະລິມານນ້ຳຫລາຍຈົນເກີນຄວາມສາມາດບັນຈຸນ້ຳໃນອ່າງ ເພື່ອຫລີກລ່ຽງການເປ່ເພ ຫລື ບໍ່ໃຫ້ລົ້ນໃສ່ເຂດການຜະລິດຂອງກະສິກອນ; ທົ່ວເມືອງໝື່ນ ມີຝາຍທັງໝົດ 42 ແຫ່ງ. ໃນນີ້, ຝາຍນ້ຳລົ້ນ 3 ແຫ່ງ, ອ່າງເກັບນ້ຳ 3 ແຫ່ງ, ຝາຍດິນ 3 ແຫ່ງ, ກວຍດິນ 1 ແຫ່ງ ແລະ ຝາຍປວງຊົນ 32 ແຫ່ງ. ນອກຈາກນີ້ຫ້ອງການກະສິກຳ ແລະ ປ່າໄມ້ເມືອງຍັງໄດ້ແນະນຳໃຫ້ກະສິກອນຈົກໜອງ, ຈົກສະ ເພື່ອກັກເກັບນ້ຳໄວ້ໃຊ້ໃນຍາມຈຳເປັນຕື່ມອີກ.
ທ່ານ ສົມດີ ຕົວວ່າງ ຍັງໃຫ້ຮູ້ອີກວ່າ: ນອກຈາກການປູກເຂົ້າແລ້ວ, ຫ້ອງການກະສິກຳ ແລະ ປ່າໄມ້ເມືອງ ຍັງໄດ້ຊຸກຍູ້ສົ່ງເສີມກະສິກອນ ປູກພືດເປັນສິນຄ້າ ໂດຍໄດ້ມີການປະສານສົມທົບກັບບໍລິສັດ ໃຫ້ມາລົງທຶນ ໂດຍຜູ້ລົງທຶນສະໜອງແນວພັນ, ເຕັກນິກ ແລະ ການຕະຫລາດ ໃຫ້ກະສິກອນເປັນຜູ້ຜະລິດ ແລະ ສົ່ງຂາຍໃຫ້ບໍລິສັດໃນລາຄາທີ່ໝັ້ນຄົງ ແລະ ພືດທີ່ສົ່ງເສີມໃຫ້ປະຊາຊົນປູກສ່ວນຫລາຍແມ່ນພືດຈຳນວນ 19 ຊະນິດ ທີ່ລັດຖະບານ ສປປ ລາວ ກັບລັດຖະບານ ສປ ຈີນ ເຊັນສັນຍາ ຊື້-ຂາຍນຳກັນ ເຊັ່ນ: ມັນຕົ້ນ, ສາລີແຂງ, ໝາກເດືອຍ ແລະ ພືດສະກຸນຖົ່ວຈຳນວນໜຶ່ງ. ອັນພົ້ນເດັ່ນ ແມ່ນການປູກມັນຕົ້ນ ມີເນື້ອທີ່ເຖິງ 3.422 ເຮັກຕາ ທຽບໃສ່ປີຜ່ານມາເພີ່ມຂຶ້ນ 507 ເຮັກຕາ ສະເລ່ຍສະມັດຖະພາບ 20-25 ໂຕນຕໍ່ເຮັກຕາ, ຄາດຄະເນຜົນໄດ້ຮັບ 85.300-102.000 ໂຕນ ເນື່ອງຈາກວ່າຢູ່ເມືອງໝື່ນມີໂຮງງານຜະລິດແປ້ງມັນຕົ້ນ ເພື່ອຮອງຮັບ. ພ້ອມນີ້, ກໍໄດ້ມີຜູ້ປະກອບການ ນັກທຸລະກິດຈຳນວນໜຶ່ງ ເຂົ້າມາເກັບຊື້ມັນຕົ້ນດິບ ແລະ ຕາກແຫ້ງ ເພື່ອສົ່ງອອກໄປຕ່າງປະເທດ.
ຂ່າວ: ຄຳເພັດ
