ສຳນັກຂ່າວ ຊິນຮວາ ຂອງ ສປຈີນ, ວັນທີ 11 ກໍລະກົດ, ການບິນໄທ (Thai Airways) ເປັນ ສາຍການບິນ ປະຈຳຊາດ ຂອງ ໄທ ຈະເປີດຖ້ຽວບິນ ດັບເບີລ ເດລີ (Double Daily) ໃນເສັ້ນທາງບິນ ລະຫວ່າງ ນະຄອນຫລວງ ດາກາ ຂອງ ບັງກລາເທດ ກັບ ນະຄອນຫລວງ ບາງກອກ ປະເທດໄທ ໂດຍເລີ່ມ ແຕ່ວັນທີ 16 ກໍລະກົດນີ້ ເປັນຕົ້ນໄປ. ຖ້ຽວບິນໃໝ່ນີ້ ຈະໃຫ້ບໍລິການ 2 ຖ້ຽວຕໍ່ວັນ ເພື່ອຈະເຮັດໃຫ້ ຜູ້ໂດຍສານ ໃຊ້ບໍລິການ ຖ້ຽວບິນ ກາງຄືນ ຈາກ ນະຄອນຫລວງ ດາກາ ໄປຍັງ ນະຄອນຫລວງ ບາງກອກ ໂດຍ ຈຳນວນ ຖ້ຽວບິນ ຂາໄປ ແລະ ຂາກັບ ຈາກ ດາກາ ຂອງ ສາຍການບິນ ຈະເພີ່ມຂຶ້ນ ເປັນ 14 ຖ້ຽວຕໍ່ອາທິດ.
