ໃນຕອນເຊົ້າວັນທີ 13 ກໍລະກົດ ນີ້, ບັນດາການນຳແຂວງຄຳມ່ວນ ນຳໂດຍທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ ພ້ອມດ້ວຍບັນດາການນຳຂອງແຂວງ, ພະແນກການ, ອົງການຈັດຕັ້ງມະຫາຊົນ ໄດ້ເຂົ້າວາງກະຕ່າດອກໄມ້ ຕໍ່ໜ້າຮູບແກະສະຫຼັກຂອງທ່ານປະທານ ສຸພານຸວົງ ເນື່ອງໃນໂອກາດວັນເກີດຂອງທ່ານປະທານ ຄົບຮອບ 114 ປີ (13/7/1909-13/7/2023) ເພື່ອສະແດງເຖິງຄວາມເຄົາລົບ, ຄວາມຮູ້ບຸນຄຸນ, ຄວາມເປັນແບບຢ່າງອັນປະເສີດເລີດລໍ້າ ຕໍ່ການຊີ້ນຳ-ນຳພາ, ສຸມທັງກຳລັງກາຍ ແລະ ສະຕິປັນຍາຂອງທ່ານເຂົ້າໃນພາລະກິດຕໍ່ສູ້ກູ້ຊາດ ຊຶ່ງປະທານ ສຸພານຸວົງ ແມ່ນເປັນເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ, ມີຈິດໃຈຕໍ່ສູ້ຢ່າງອາດຫານ, ມີທັດສະນະຫຼັກໝັ້ນ ແລະ ມີນໍ້າໃຈເສຍສະຫຼະອັນສູງສົ່ງເພື່ອປະເທດຊາດ ແລະ ປະຊາຊົນ.
ຕະຫຼອດເສັ້ນທາງຊີວິດຂອງທ່ານໄດ້ອຸທິດເລືອດເນື້ອ, ເຫື່ອແຮງ ແລະ ສະຕິປັນຍາ ໂດຍສະເພາະແມ່ນການສືບທອດແນວຄິດ ແລະ ອຸດົມການອັນຍິ່ງໃຫຍ່ ຂອງປະທານ ໂຮ່ຈິມິນ ບວກກັບພຶດຕິກຳຂອງການເຄື່ອນໄຫວຕໍ່ສູ້ປະຕິວັດ ເພື່ອສຶກສາອົບຮົມແນວຄິດຮັກຊາດ, ການປຸກລະດົມນໍ້າໃຈເສຍສະຫຼະ ແລະ ເຕົ້າໂຮມຄວາມສາມັກຄີຂອງປະຊາຊົນລາວບັນດາເຜົ່າ ປະກອບສ່ວນເຂົ້າໃນພາລະກິດຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່ ທີ່ຍືດເຍື້ອຍາວນານ, ຫຍຸ້ງຍາກຂ້ຽວຂາດ ແລະ ລະອິດລະອ້ຽວ ທັງໃນດ້ານການເມືອງ ແລະ ດ້ານອາວຸດເພື່ອຍາດເອົາເອກະລາດ, ປະຊາທິປະໄຕຂອງຊາດ, ຄວາມສົມບູນພູນສຸກຂອງປະຊາຊົນລາວບັນດາເຜົ່າ ແລະ ສ້າງປະຖົມປັດໄຈກ້າວຂຶ້ນສັງຄົມນິຍົມຢ່າງ ໜັກແໜ້ນ.
(ຂ່າວ-ພາບ: ກອງຄໍາ)
