ໃນວັນທີ 26 ມິຖຸນາ ທີ່ຜ່ານມານີ້, ທີ່ກະຊວງການຕ່າງປະເທດ, ທ່ານ ໂພໄຊ ໄຂຄໍາພິທູນ ຮອງລັດຖະ ມົນຕີກະຊວງການຕ່າງປະເທດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫລຽນກາມິດຕະພາບໃຫ້ແກ່ທ່ານ ນາຊາ ຮາຢັດ (Mr. Nasar HAYAT), ຜູ້ຕາງໜ້າຂອງອົງການອາຫານ ແລະ ການກະເສດ (FAO) ປະຈຳ ສປປ ລາວ ແລະ ທ່ານ ນາງ ມາລຽມ ເອ.ຄານ (Mrs. Mariam A.KHAN), ຜູ້ຕາງໜ້າອົງການສະຫະປະຊາຊາດກອງທຶນສໍາລັບປະຊາກອນ (UNFPA) ເພື່ອເປັນການຍ້ອງຍໍສັນລະ ເສີນຜົນງານອັນພົ້ນເດັ່ນຂອງພວກກ່ຽວ ຕະຫລອດໄລຍະການປະຕິບັດໜ້າທີ່ວຽກງານ ຢູ່ ສປປ ລາວ ໂດຍເຂົ້າຮ່ວມເປັນສັກຂີພິຍານ ໃນການມອບຫລຽນກາຄັ້ງນີ້ ມີຜູ້ຕາງໜ້າອົງການ ສປຊ ປະຈໍາ ສປປ ລາວ, ບັນດາກະຊວງ ແລະ ຂະ ແໜງການລັດທີ່ເປັນຄູ່ຮ່ວມງານກັບອົງການ FAO ແລະ ອົງການ UNFPA.
ນັບຕັ້ງແຕ່ ທ່ານ ນາຊາ ຮາຢັດ ໄດ້ເຂົ້າຮັບຕໍາແໜ່ງເປັນຜູ້ຕາງໜ້າຂອງ ອົງການ ປະຈຳ ສປປ ລາວ ແຕ່ເດືອນພະຈິກ ໃນປີ 2018 ເປັນຕົ້ນມາຈົນເຖີງປັດຈຸບັນ, ທ່ານໄດ້ໃຫ້ການຊຸກຍູ້ ແລະ ສະໜັບສະໜູນການພັດທະນາຂະ ແໜງກະສິກຳ ໂດຍສະເພາະແມ່ນການຊຸກຍູ້ວຽກງານການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ທີ່ຕິດພັນກັບດ້ານກະສິກຳ ເຊິ່ງສະແດງອອກໃຫ້ເຫັນຄວາມເປັນເຈົ້າການ ໃນການຮ່ວມມືກັບກະຊວງກະສິກຳ ແລະ ປ່າໄມ້ຢ່າງໃກ້ຊິດ ເຮັດໃຫ້ການປະຕິບັດກິດຈະກຳຕ່າງໆ ສາມາດໄດ້ຮັບໝາກຜົນດີຕາມຄາດໝາຍທີ່ວາງໄວ້. ໃນນັ້ນ, ທ່ານໄດ້ປະກອບສ່ວນຢ່າງຫ້າວຫັນໃນການສ້າງຂໍ້ລິເລິ່ມ ບັນດາໂຄງການກິດຈະກຳ ແລະ ການສະໜັບສະໜູນໃຫ້ແກ່ຊາວ ນາ ແລະ ເຂດຊົນນະບົດ ທີ່ປະກອບສ່ວນເຂົ້າໃນແຜນພັດ ທະນາເສດຖະກິດ-ສັງຄົມຂອງ ສປປ ລາວ.
ສຳລັບ ທ່ານ ນ. ມາລຽມ ເອ.ຄານ, ທ່ານໄດ້ມາຮັບໜ້າທີ່ເປັນຜູ້ຕາງໜ້າອົງການ UNFPA ນັບຕັ້ງແຕ່ເດືອນ ຕຸລາ 2018 ກໍໄດ້ປະກອບສ່ວນຢ່າງຫ້າວຫັນໃນການພັດ ທະນາເສດຖະກິດ-ສັງຄົມຂອງ ສປປ ລາວ ໂດຍສະເພາະວຽກງານຊາວໜຸ່ມ ແລະ ແມ່ຍິງ ເປັນຕົ້ນແມ່ນແຜນງານ ນາງນ້ອຍ “Noi Framework”, ວຽກງານສຸຂະພາບໄວຈະເລີນພັນ, ວຽກງານປະຊາກອນ ICPD25. ຍ້ອນຜົນງານອັນພົ້ນເດັ່ນດັ່ງກ່າວ, ລັດຖະບານ ສປປ ລາວ ຈຶ່ງໄດ້ອອກດຳລັດ ຂອງທ່ານ ນາຍົກລັດຖະມົນຕີ ແຫ່ງ ສປປ ລາວ, ຕົກລົງມອບຫລຽນກາມິດຕະພາບໃຫ້ແກ່ຜູ້ຕາງໜ້າທັງ ສອງທ່ານ ເພື່ອສະແດງຄວາມຍ້ອງຍໍຊົມເຊີຍ ແລະ ຈາລຶກຜົນງານຄຸນງາມຄວາມດີທີ່ພວກກ່ຽວ ໄດ້ອຸທິດເຫື່ອແຮງ ແລະ ສະຕິປັນຍາເຂົ້າໃນການສະໜັບສະໜູນ ລັດຖະບານ ສປປ ລາວ ກໍຄືການເສີມຂະຫຍາຍສາຍພົວພັນການຮ່ວມ ມືລະຫວ່າງ ສປປ ລາວ ແລະ ອົງການ FAO ແລະ UNFPA ໃຫ້ມີການຂະຫຍາຍຕົວ ແລະ ແໜ້ນແຟ້ນຍິ່ງຂື້ນ.
ໂອກາດນີ້, ທ່ານ ຜູ້ຕາງໜ້າຂອງ ອົງການ FAO ແລະ ອົົງການ UNFPA ໄດ້ກ່າວສະແດງຄວາມຂອບໃຈຢ່າງສູງ ຕໍ່ລັດຖະບານ ກໍຄືກະຊວງການຕ່າງປະເທດ ແຫ່ງ ສປປ ລາວ ແລະ ບັນດາຂະແໜງການທີ່ກ່ຽວຂ້ອງ ທີ່ໄດ້ໃຫ້ການຮ່ວມມື, ສະໜັບສະໜູນການຊ່ວຍເຫລືອ ແລະ ອຳນວຍຄວາມສະດວກ ຕະຫລອດໄລຍະການປະຕິບັດໜ້າທີ່ວຽກ ງານ ຢູ່ ສປປ ລາວ ຈົນປະສົບຜົນສໍາເລັດເປັນຢ່າງດີ ພ້ອມທັງໃຫ້ຄຳໝັ້ນສັນຍາວ່າ ອົງການ FAO ແລະ ອົງການ UNFPA ຈະສືບຕໍ່ໃຫ້ການຮ່ວມມື ແລະ ຊ່ວຍເຫລືອ ສປປ ລາວ ໃນຕໍ່ໜ້າ.
ຂ່າວ: ສຸກສະຫວັດ
ຮູບ: ຂັນໄຊ
