ທ່ານ ໂພສີ ແກ້ວມະນີວົງ ຄະນະປະຈໍາພັກກະຊວງ ຮອງລັດຖະມົນຕີກະຊວງ ຖວທ ຫົວໜ້າຄະນະຮັບຜິດຊອບປັບປຸງຂະຫຍາຍຕາໜ່າງໂທລະໂຄ່ງທົ່ວປະເທດໄລຍະ 2 ພ້ອມຄະນະເຊີ່ງປະກອບດ້ວຍຫົວໜ້າກົມສື່ມວນຊົນ, ກົມກວດກາ, ກົມແຜນການ ແລະ ການຮ່ວມມືສາກົນ ໄດ້ນໍາເອົາຊຸດໂທລະໂຄ່ງ 50 ຊຸດ ມອບໃຫ້ແກ່ແຂວງອັດຕະປື ເຊີ່ງໄດ້ຈັດພິທີມອບ – ຮັບ ໃນວັນທີ 21 ມິຖຸນາ 2023 ທີ່ພະແນກ ຖວທ ແຂວງອັດຕະປື ເຂົ້າຮ່ວມເປັນກຽດໃນພິທີ ມອບ-ຮັບ ເຄື່ອງດັ່ງກ່າວໂດຍ ທ່ານ ບຸນເສີດ ເສດທິລາດ ຄະນະປະຈໍາພັກແຂວງ ຮອງເຈົ້າແຂວງໆອັດຕະປື.
ຊຸດໂທລະໂຄ່ງທີ່ມອບໃຫ້ແຂວງອັດຕະປື ຄັ້ງນີ້ມີທັງໝົດ 50 ຊຸດ ເຊີ່ງຈະມອບໃຫ້ 5 ເມືອງ 45 ບ້ານ, 5 ຫ້ອງການ ຄື: ເມືອງສາມັກຄີໄຊ ມີ 7 ບ້ານ ກັບ 1 ຫ້ອງການ, ເມືອງໄຊເຊດຖາ 11 ບ້ານ 1 ຫ້ອງການ, ເມືອງສະໜາມໄຊ 11 ບ້ານ 1 ຫ້ອງການ, ເມືອງຊານໄຊ 9 ບ້ານ 1 ຫ້ອງການ 1 ຫ້ອງການ ແລະ ເມືອງພູວົງ 7 ບ້ານ 1 ຫ້ອງການທີ່ຈະໄດ້ຮັບຊຸດໂທລະໂຄ່ງໃນໂຄງການໄລຍະ 2. ໃນພິທີທ່ານ ກົງຈັກ ສີສະຫວາດ ຫົວໜ້າພະແນກ ຖວທ ແຂວງອັດຕະປືໄດ້ໃຫ້ຮູ້ວ່າ: ໃນໄລຍະຜ່ານມາທາງແຂວງກໍໄດ້ມີການນໍາໃຊ້ລະບົບໂທລະໂຄ່ງແຕ່ນໍາໃຊ້ເປັນເຄື່ອງປະຊາສໍາພັນ ຫຼື ປະກາດໃນມື້ສໍາຄັນ ຫຼື ເຕົ້າໂຮມປະຊາຊົນເວລາເຜີຍແຜ່ວຽກຕ່າງໆ ເຊີ່ງທົ່ວແຂວງມີໂທລະໂຄ່ງໃຊ້ເຖີງ 70%.
ຜ່ານການນໍາໃຊ້ມາຫຼາຍປີເຮັດໃຫ້ໂທລະໂຄ່ງຢູ່ບ້ານເມືຶອງເປ່ເພເປັນສ່ວນຫຼາຍ ຍັງເຫຼືອພຽງ 30% ທີ່ຍັງພໍໃຊ້ງານໄດ້. ສະນັ້ນການທີ່ທາງກະຊວງ ຖວທ ມອບລະບົບໂທລະໂຄ່ງຄົບຊຸດໃຫ້ແຂວງນີ້ຈະເປັນການຍົກລະດັບຄຸນນະພາບການກະຈາຍຂໍ້ມູນຂ່າວສານໃຫ້ປະຊາຊົນໄດ້ດີກວ່າເກົ່າຍ້ອນວ່າໂທລະໂຄ່ງແບບໃໝ່ແມ່ນມີເຄື່ອງຮັບສັນຍານວິທະຍຸ, ສັນຍານໂທລະພາບແລະ ສັນຍານດາວທຽມຈື່ງເຮັດໃຫ້ປະຊາຊົນສາມາດເຂົ້າເຖີງຂໍ້ມູນຂ່າວສານຫຼາຍຂື້ນ. ຕາມການປະເມີນຜົນ ແລະ ຕີລາຄາຂອງຄະນະຮັບຜິດຊອບໂຄງການ ແລະ ຜູ້ທີ່ເຮັດວຽກຕົວຈິງເຫັນວ່າໂທລະໂຄ່ງຍັງເປັນພາຫະນະສື່ໜື່ງທີ່ສາມາດສົ່ງຂໍ້ມູນຂ່າວສານເຖີງບ້ານເປົ້າໝາຍໄດ້ດີທີ່ສຸດຜ່ານການກະຈາຍສຽງໃນແຕ່ລະມື້.
ຕາງໜ້າໃຫ້ຄະນະນໍາ ແລະ ປະຊາຊົນແຂວງອັດຕະປື ທ່ານ ບຸນເສີດ ເສດທິລາດ ຄະນະປະຈໍາພັກແຂວງ ຮອງເຈົ້າແຂວງໆ ອັດຕະປື ໄດ້ສະແດງຄວາມຂອບໃຈມາຍັງການນໍາພັກລັດຖະບານ ໂດຍສະເພາະແມ່ນກະຊວງ ຖວທ ທີ່ເຫັນຄວາມສໍາຄັນນໍາເອົາໂທລະໂຄ່ງມອບໃຫ້ແຂວງອັດຕະປື ເຊີ່ງຈະເປັນການປະກອບສ່ວນສໍາຄັນເຂົ້າໃນແຜນພັດທະນາວຽກງານຖະແຫຼງຂ່າວສື່ມວນຊົນ ຂອງແຂວງມີຄວາມເຂັ້ມແຂວງ. ພ້ອມນີ້ທ່ານກໍໄດ້ເນັ້ນໜັກໃຫ້ຂະແໜງ ຖວທ ເມືອງເປັນເຈົ້າການ ແລະ ເຮັດວຽກຕົວຈິງກັບບ້ານເປົ້າໝາຍທີ່ຈະເອົາໂທລະໂຄ່ງໄປຕິດຕັ້ງນັ້ນຕ້ອງໄດ້ຮຽນຮູ້ເຕັກນິກການປະກອບ, ຕິດຕັ້ງລວມເຖີງການນໍາໃຊ້ແລະ ຮັກສາເພື່ອຈະເຮັດໃຫ້ອາຍຸການໃຊ້ງານໄດ້ຫຼາຍປີ. ເຊີ່ງພາຍຫຼັງການມອບຮັບກໍໄດ້ມີການຝຶກອົບຮົມໃຫ້ແກ່ພະນັກງານວິຊາການທີ່ມາຈາກບ້ານເປົ້າໝາຍທີ່ຈະເປັນຜູ້ຮັບຜິດຊອບ ແລະ ນໍາໃຊ້ໂທລະໂຄ່ງໃນແຕ່ລະມື້.
CG: ອັດຕະປືໄດ້ຮັບຊຸດໂທລະໂຄ່ງ 50 ຊຸດ ເພື່ອນໍາໃຊ້ເຂົ້າການກະຈາຍໃນແຕ່ລະມື້.
