ກອງປະຊຸມລາຍງານຄວາມຄືບໜ້າ ແລະ ປຶກສາຫາລື ກຽມຄວາມພ້ອມຈັດກິດຈະກໍາຍ່າງ-ແລ່ນ ຂ້າມຂົວມິດຕະພາບ ລາວ-ໄທ ແຫ່ງທີ 2 ສະຫວັນນະເຂດ-ມຸກດາຫານ ເພື່ອສ້າງຂະບວນການສະເຫຼີມສະຫຼອງວັນໂອແລມປິກສາກົນ ຄົບຮອບ 129 ປີ ໄດ້ມີຂຶ້ນວັນທີ 19 ມິຖຸນາ 2023 ທີ່ຫ້ອງປະຊຸມຫ້ອງວ່າການປົກຄອງແຂວງສະຫວັນນະເຂດ ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ມີທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ພ້ອມດ້ວຍບັນດາຫົວໜ້າ-ຮອງຫົວໜ້າອະນຸກຳມະການຝ່າຍຕ່າງໆ, ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ເລກທີ 917/ຈຂ, ລົງວັນທີ 30 ພຶດສະພາ 2023 ວ່າດ້ວຍການແຕ່ງຕັ້ງຄະນະຊີ້ນໍາລວມ ແລະ ກໍາມະການຝ່າຍຕ່າງໆ ໃນກິຈະກໍາດັ່ງກ່າວ ຊຶ່ງຈະໄດ້ຈັດຂຶ້ນໃນວັນທີ 24 ມິຖຸນາ 2023 ໂດຍແມ່ນ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງ ເປັນຫົວໜ້າຄະນະ ພ້ອມດ້ວຍຮອງຫົວໜ້າ 4 ທ່ານ ແລະ ກໍາມະການ ອີກ 6 ທ່ານ. ນອກຈາກນີ້ກໍມີກໍາມະການກອງເລຂາ ແລະ ປະສານງານ 12 ທ່ານ, ກໍາມະການໂຄສະນາປະຊາສໍາພັນ 5 ທ່ານ ພ້ອມດ້ວຍນັກຂ່າວ 10 ທ່ານ, ກໍາມະການປ້ອງກັນສຸຂະພາບ 2 ທ່ານ ພ້ອມດ້ວຍແພດປະຈໍາສະໜາມ 10 ທ່ານ, ກໍາມະການປ້ອງກັນຄວາມສະຫງົບ ແລະ ຈະລາຈອນ 3 ທ່ານ ພ້ອມກໍາລັງອ້າຍນ້ອງຈະລາຈອນ 30 ທ່ານ. ຄຽງຄູ່ກັນນີ້ກໍຍັງມີກໍາມະການປະດັບປະດາ ຕິດທຸງຊາດ-ທຸງທິວ, ກໍາມະການສະຖານທີ່ ແລະ ອະນາໄມ, ກໍາມະການເຕັກນິກ, ກໍາມະການຮັບແຂກ ແລະ ຄະນະອະນຸກຳມະການຝ່າຍຕ່າງໆ ຍັງໄດ້ຜັດປ່ຽນກັນປະກອບຄຳເຫັນໃສ່ກັບການຈັດກິດຈະກຳກິລາແລ່ນ-ແລ່ນຂ້າມຂົວມິດຕະພາບລາວ-ໄທ ແຫ່ງທີ 2 ເພື່ອສະເຫຼີມສະຫຼອງວັນໂອແລມປິກສາກົນ ຄົບຮອບ 129 ປີ ຕື່ມອີກ.
ໂອກາດນີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ມີຄໍາເຫັນເນັ້ນໜັກໃຫ້ແຕ່ລະຝ່າຍ ຕ້ອງມີຄວາມຮັບຜິດຊອບຕໍ່ໜ້າທີ່ຂອງຕົນທີ່ໄດ້ຮັບມອບໝາຍ ຊຶ່ງກິຈະກໍາຍ່າງ-ແລ່ນຄັ້ງນີ້ ຈະຈັດຂຶ້ນໃນວັນທີ 24 ມິຖຸນາ 2023 ມີຈຸດເລີ່ມຕົ້ນຕັ້ງຂະບວນຈາກແຂວງມຸກດາຫານ ຣາຊະອານາຈັກໄທ ຍ່າງ-ແລ່ນ ຜ່ານຂົວມິດຕະພາບ ລາວ-ໄທ ແຫ່ງທີ 2 ມາຫາຈຸດໂຄ້ງ ທີ່ວົງວຽນໄດໂນເສົາ ນະຄອນໄກສອນພົມວິຫານ ແຂວງສະຫວັນນະເຂດ ສປປ ລາວ. ໃນນີ້ ສະເພາະກິດຈະກໍາຍ່າງ ລວມມີໄລຍະທາງ 8 ກິໂລແມັດ ແລະ ແລ່ນຮາບມາຣາທອນ ໄລຍະທາງ 12,8 ກິໂລແມັດ ຊຶ່ງຄາດວ່າຈະມີມວນຊົນຈາກ 3 ປະເທດເຂົ້າຮ່ວມປະມານ 10 ພັນກວ່າຄົນ ໃນນີ້ມາຈາກ ສສ ຫວຽດນາມ 500 ຄົນ, ຈາກສປປ ລາວ ປະມານ 2.500-3.000 ຄົນ ແລະ ເຫຼືອນັ້ນແມ່ນຈາກປະເທດໄທ.
ຂ່າວໂດຍ: ລູກນ້ຳເຊ ອິນທະດາລິນ
ຂໍ້ມູນ-ພາບ: ວິທະຍຸກະຈາຍສຽງແຂວງສະຫວັນນະເຂດ
