ພາກລັດຖະບານຂອງລາວ ແລະ ອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ໄດ້ຈັດກອງປະຊຸມປຶກສາຫາລືກ່ຽວກັບບັນຫາ ຄວາມຮຸນແຮງທາງອອນລາຍ ຕໍ່ແມ່ຍິງ ແລະ ເດັກ ເປັນຄັ້ງທໍາອິດຂອງ ສປປ ລາວ ໃນວັນທີ 16 ມິຖຸນາ ຜ່ານມາ ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ທໍາມາ ເພັດວິໄຊ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງ, ທ່ານ ນາງ ມາຣຽມ ເອ. ຄານ ຜູ້ຕາງຫນ້າອົງການ UNFPA ແລະ ທ່ານ ນາງ ເກສອນ ສຸລິວົງ ຫົວໜ້າສູນສົ່ງເສີມ, ກະຊວງເຕັກໂນໂລຊີ ແລະ ການສື່ສານ ໂດຍມີພາກລັດທີ່ກ່ຽວຂ້ອງ ພ້ອມດ້ວຍບັນດາຄູ່ຮ່ວມພັດທະນາ ເຂົ້າຮ່ວມ.
ກອງປະຊຸມຄັ້ງນີ້, ໄດ້ມີການນໍາສະເໜີກ່ຽວກັບຜົນການສໍາຫຼວດຂໍ້ມູນກ່ຽວກັບຄວາມຮຸນແຮງທາງອອນລາຍທໍາອິດຂອງປະເທດທີ່ອົງການ UNFPA ໄດ້ເຮັດການຄົ້ນຄວ້າຮ່ວມກັບລັດຖະບານໃນປີ 2022-2023 ວ່າ: ຄວາມຮຸນແຮງທາງອອນລາຍ ຫຼື ທີ່ຮູ້ກັນວ່າ ຄວາມຮຸນແຮງບົນພື້ນຖານທາງເພດທີ່ນຳໃຊ້ເຕັກໂນໂລຊີ (TFGBV) ແມ່ນແຜ່ຫຼາຍ, ຮ້າຍແຮງຂຶ້ນເລື້ອຍໆ, ໂດຍສ່ວນໃຫຍ່ແມ່ນກ່ຽວກັບການມີເພດສຳພັນ ລວມທັງມາໃນຮູບແບບອື່ນໆ ເຊັ່ນວ່າ: ການນຳໃຊ້ຮູບໂດຍບໍ່ໄດ້ຮັບອະນຸຍາດ, ການລັກຕິດຕາມການເຄື່ອນໄຫວທາງອິນເຕີເນັດ, ການໃຊ້ສື່ອອນລາຍເພື່ອຮັບສະໝັກວຽກບໍລິການທາງເພດແບບບັງຄັບ ແລະ ການເວົ້າທີ່ສ້າງຄວາມກຽດຊັງ. ໃນທົ່ວໂລກມີການລາຍງານວ່າ 85% ຂອງແມ່ຍິງພົບເຫັນບັນຫາຄວາມຮຸນແຮງທາງດີຈີຕອນ ແລະ 40% ປະສົບກັບບັນຫາດັ່ງກ່າວດ້ວຍຕົນເອງ. ຜົນການສໍາຫຼວດດັ່ງກ່າວເປັນຂໍ້ມູນສໍາຄັນທີ່ຈະຊ່ວຍເສີມສ້າງຄວາມເຂົ້າໃຈກ່ຽວກັບບັນຫາດັ່ງກ່າວ ແລະ ຊ່ວຍລະບຸວ່າຈະສ້າງຄວາມເຂັ້ມແຂງໃຫ້ກັບກອບນິຕິກໍາ ແລະ ນະໂຍບາຍຕ່າງໆຄືແນວໃດ, ປັບປຸງການບໍລິການທີ່ສາມາດເຂົ້າເຖິງໄດ້ ແລະ ຕອບໂຕ້ຢ່າງເປັນລະບົບ.
ທ່ານ ນາງ ທໍາມາ ເພັດວິໄຊ ກ່າວວ່າ: ພວກເຮົາມີຄວາມມຸ່ງໝັ້ນທີ່ຈະຕອບໂຕ້ ຄວາມຮຸນແຮງບົນພື້ນຖານທາງເພດທີ່ນຳໃຊ້ເຕັກໂນໂລຊີ ທີ່ເປັນຮູບແບບຄວາມຮຸນແຮງຕໍ່ແມ່ຍິງ ແລະ ເດັກຍິງ ຢູ່ຕາມສະຖານທີ່ສາທາລະນະ. ໂດຍໄດ້ເຮັດວຽກໃນການຕ້ານຄວາມຮຸນແຮງຕໍ່ແມ່ຍິງ ແລະ ເດັກຍິງໃນ ສປປ ລາວ ໃນໄລຍະຜ່ານມາ ຜ່ານຂັ້ນຕອນມາດຕະຖານການດຳເນີນງານຂອງຂະແໜງການຕ່າງໆ, ພວກເຮົາເຂົ້າໃຈເຖິງລັກສະນະວິວັດທະນາການຂອງຄວາມຮຸນແຮງຕໍ່ແມ່ຍິງ ແລະ ພວກເຮົາພ້ອມທີ່ຈະປັບປ່ຽນການປະຕິບັດງານໃຫ້ທັນກັບສະພາບການປ່ຽນແປງຂອງການໃຊ້ຄວາມຮຸນແຮງບົນພື້ນຖານທາງເພດ. ຜົນສະທ້ອນຂອງການລະເມີດຄວາມເປັນສ່ວນຕົວ, ກຽດສັກສີ, ຄວາມເປັນເອກະລາດ ແລະ ສິດທິຂອງບຸກຄົນນີ້ແມ່ນຮ້າຍແຮງຫຼາຍ. ຜົນກະທົບຂອງ TFGBV ໄດ້ຖືກບັນທຶກໄວ້ວ່າຮ້າຍແຮງເທົ່າກັບຮູບແບບ ອື່ນໆຂອງຄວາມຮຸນແຮງທາງຮ່າງກາຍ ແລະ ທາງດ້ານຈິດໃຈ, ເຖິງແມ່ນວ່າຮູບແບບຄວາມຮຸນແຮງດັ່ງກ່າວ ສ່ວນໃຫຍ່ຈະບໍ່ໄດ້ຮັບການຍອມຮັບໂດຍສະຖາບັນ ຫຼື ຜູ້ລອດຊີວິດເອງກໍຕາມ.
ທ່ານ ນາງ ເກສອນ ສຸລິວົງ ກ່າວວ່າ: ບັນຫາການໃຊ້ຄວາມຮຸນແຮງທາງສື່ອອນລາຍ ເປັນບັນຫາທີ່ໜັກໜ່ວງທີ່ພວກເຮົາຕ້ອງໄດ້ປຶກສາຫາລືຮ່ວມກັນ ລະຫວ່າງລັດຖະບານ ແລະ ຄູ່ຮ່ວມພັດທະນາ ເພື່ອສາມາດເຮັດວຽກຮ່ວມກັນສະກັດກັ້ນ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ທາງສື່ອອນລາຍ.
ທ່ານ ນາງ ມາຣຽມ ເອ. ຄານ ກໍໄດ້ກ່າວວ່າ: UNFPA ມຸ່ງໝັ້ນທີ່ຈະຕ້ານຄວາມຮຸນແຮງທີ່ປະກົດຂຶ້ນໃນ ສປປ ລາວ. ໃນຂະນະທີ່ປະເທດລາວໄດ້ສ້າງຕັ້ງຄະນະກໍາມະການແຫ່ງຊາດກ່ຽວກັບການຫັນເປັນດີຈີຕອນ. ຂ້າພະເຈົ້າ ຂໍຊຸກຍູ້ໃຫ້ລັດຖະບານຮັບປະກັນວ່າການປົກປ້ອງແມ່ຍິງ, ເດັກຍິງ, ເດັກ ນ້ອຍ ແລະ ຊຸມຊົນທີ່ມີຄວາມຫຼາກຫຼາຍ ແມ່ນສ່ວນໜຶ່ງຂອງວຽກງານຂອງຄະນະກໍາມະການ. ຄວາມເປັນເອກະລາດດ້ານຮ່າງກາຍ ແມ່ນສິດທິຂອງແຕ່ລະຄົນ, ທີ່ດໍາລົງຊີວິດໂດຍບໍ່ມີຄວາມຢ້ານກົວ ແລະ ຄວາມຮຸນແຮງ ທັງໂລກອອນລາຍ ແລະ ໂລກຄວາມເປັນຈິງ.
ຈາກນັ້ນ, ກອງປະຊຸມກໍໄດ້ມີການໂອ້ລົມ ສົນທະນາກ່ຽວກັບສະພາບການ ແລະ ວຽກງານໃນຕໍ່ ໜ້າຕໍ່ກັບຄວາມຮຸນແຮງບົນພື້ນຖານທາງເພດແບບອອນລາຍ.
(ຂ່າວ: ສຸກສະຫວັນ, ພາບ-ຂໍ້ມູນ: UNFPA)
