ວັນທີ 19 ມິຖຸນາ 2023 ນີ້ ຫ້ອງການສາທາລະນະສຸກເມືອງໂຂງ ແຂວງຈໍາປາສັກ ໄດ້ຈັດພິທີສະເຫຼີມສະຫຼອງວັນແພດລາວ ຄົບຮອບ 58 ປີ (18 ມິຖຸນາ 1965-18 ມິຖຸນາ 2023); ໂດຍການເຂົ້າຮ່ວມເປັນປະທານໂດຍທ່ານ ຄຳສິງ ບຸນຈະເລີນ ຮອງເຈົ້າເມືອງໆໂຂງ, ດຣ ຄຳສວຍ ຊາພິຈິດ ຫົວໜ້າຫ້ອງການສາທາລະນະສຸກເມືອງ, ມີພະນັກງານຫ້ອງການສາທາລະນະສຸກ, ຫົວໜ້າໂຮງໝໍນ້ອຍ 15 ແຫ່ງ, ກຸ່ມບ້ານອ້ອມຂ້າງ ແລະ ພະນັກງານຫັນລົງກໍ່ສ້າງຮາກຖານເຂົ້າຮ່ວມ.
ທ່ານ ຄຳສິງ ບຸນຈະເລີນ ຮອງເຈົ້າເມືອງໂຂງ ກ່າວວ່າ: ການສະເຫຼີມສະຫຼອງວັນແພດລາວ ເປັນການປູກຈິດສໍານຶກໃຫ້ພະນັກງານແພດໝໍ, ພະຍາບານພະນັກງານສາທາລະນະສຸກລາວຮຸ້ນສືບທອດ ໄດ້ຮໍ່າຮຽນເອົາແບບຢ່າງອັນດີງາມຂອງແພດໝໍສາທາລະນະສຸກຮຸ້ນກ່ອນ, ອອກແຮງຝຶກຝົນຫຼໍ່ຫຼອມຕົນເອງໃຫ້ພຽບພ້ອມໄປດ້ວຍຄຸນສົມບັດສິນທໍາປະຕິວັດ, ຈັນຍາທໍາວິຊາຊີບ ແລະ ຄວາມ ຊໍານານງານດ້ານວິຊາສະເພາະ ເພື່ອເປັນນັກຮົບເສື້ອຂາວຂອງພັກປະຊາຊົນປະຕິວັດລາວ, ກາຍເປັນແພດແຫ່ງຊາດ ແລະ ແພດປະຊາຊົນຢ່າງສົມກຽດສັກສີ.
ທ່ານຮອງເຈົ້າເມືອງກ່າວຕື່ມວ່າ: ໃນສະໄໝຕໍ່ສູ້ປົດປ່ອຍຊາດ, ການແພດລາວໄດ້ຕິດພັນກັບການຕໍ່ສູ້ກູ້ຊາດໃນແຕ່ລະໄລຍະ, ແພດໜໍໃນໄລຍະນັ້ນແມ່ນນອນຢູ່ໃນການຈັດຕັ້ງຂອງເສນາຮັກ ແລະ ໄດ້ເຮັດໜ້າທີ່ຂອງຕົນໃນການປິ່ນປົວໃຫ້ແກ່ພະນັກງານນັກຮົບ ແລະ ປະຊາຊົນບັນດາເຜົ່າ ມາຮອດວັນທີ 18 ມິຖຸນາ 1965 ໄດ້ຕົກລົງແຍກຂະແໜງສາທາລະນະສຸກອອກເປັນສອງການຈັດຕັ້ງຄື: ເສນາຮັກເພື່ອຮັບໃຊ້ກອງທັບ ແລະສາທາລະນະສຸກສູນກາງ ເພື່ອຮັບໃຊ້ປະຊາຊົນພົນລະເຮືອນ. ດັ່ງນັ້ນ, ກະຊວງສາທາລະນະສຸກໄດ້ສະເໜີສະພາແຫ່ງຊາດ ແລະໄດ້ຮັບການເຫັນດີໃຫ້ບັນຈຸເຂົ້າໃນກົດໝາຍປິ່ນປົວສະບັບປັບປຸງ ເລກທີ 58/ສປຊ ລົງວັນທີ 24 ທັນວາ 2014 ກໍານົດເອົາວັນທີ 18 ມິຖຸນາ ເປັນວັນແພດລາວ.
ຈາກນັ້ນ ຜູ້ແທນກອງປະຊຸມ ໄດ້ລົງເຄື່ອນໄຫວນຳພາປະຊາຊົນບ້ານອ້ອມຂ້າງທຳລາຍແຫຼ່ງເພາະພັນໜອນນ້ຳຍຸງລາຍເປັນຕົ້ນ: ຂວ້ຳກະໂປະ, ກະປ໋ອງ ແລະ ພາຊະນະທີ່ມີນ້ຳຂັງ ເຊິ່ງບ່ອນວາງໄຂ່ຂອງຍຸງລາຍ.
