ກອງປະຊຸມເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ 17ແລະ ກອງປະຊຸມທີ່ກ່ຽວຂ້ອງ (ASEAN Senior Officials’ Meeting on Health Development (SOMHD) and Related Meetings)ໄຂຂື້ນຢ່າງເປັນທາງການ ໃນຕອນເຊົ້າວັນທີ 19 ມີຖຸນາ 2023, ທີ່ ໂຮງແຮມ ຄຣາວພາຊ່າ, ນະຄອນຫຼວງວຽງຈັນ, ຊຶ່ງໄດ້ຮັບກຽດເຂົ້າຮ່ວມພິທີເປີດ ແລະ ມີຄຳເຫັນກ່າວເປີດກອງປະຊຸມໂດຍ ທ່ານ ດຣ. ໄພວັນ ແກ້ວປະເສີດ, ຮອງລັດຖະມົນຕີກະຊວງສາທາລະນະສຸກແລະ ເຈົ້າໜ້າທີ່ອາວຸໂສດ້ານການສາທາລະນະສຸກ ຈາກ 10 ປະເທດສະມາຊິກອາຊຽນ, ປະເທດຕີມໍເລດສະເຕ, ກອງເລຂາອາຊຽນ ທີ່ເຂົ້າຮ່ວມທັງຮູບແບບເຊີ່ງໜ້າ ແລະ ທາງໄກ.
ກະຊວງສາທາລະນະສຸກ ສປປ ລາວ ເປັນປະທານເຈົ້າໜ້າທີ່ອາວຸໂສດ້ານການສາທາລະນະສຸກອາຊຽນ ສົກປີ 2022-2024, ຊຶ່ງກອງປະຊຸມໃນຄັ້ງນີ້ ຈະໄດ້ດໍາເນີນເປັນເວລາ 05 ວັນ ນັບແຕ່ວັນທີ19-23 ມິຖຸນາ 2023, ປະກອບມີ:
1. ກອງປະຊຸມ ເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ 17 (the 17thASEAN SOMHD).
2. ກອງປະຊຸມ ເຈົ້າໜ້າທີ່ອາວຸໂສດ້ານສາທາລະນະສຸກອາຊຽນ ບວກສາມ ຄັ້ງທີ 12 (the 12th ASEAN Plus Three SOMHD).
3. ກອງປະຊຸມ ເຈົ້າໜ້າທີ່ອາວຸໂສດ້ານສາທາລະນະສຸກອາຊຽນ-ສປ ຈີນ ຄັ້ງທີ 12 (the 12th ASEAN-China SOMHD).
4. ກອງປະຊຸມເຈົ້າໜ້າທີ່ອາວຸໂສດ້ານສາທາລະນະສຸກອາຊຽນ-ເກົາຫຼີ ຄັ້ງທີ 02 (the 2nd ASEAN-Republic of Korea SOMHD).
5. ກອງປະຊຸມ ສະເພາະ ເຈົ້າໜ້າທີ່ອາວຸໂສດ້ານສາທາລະນະສຸກອາຊຽນ-ອາເມລິກາ (the Special Meeting of the ASEAN SOMHD and the United States, Department of Health and Human Services (US HHS).
6. ກອງປະຊຸມກະກຽມຂອງເຈົ້າໜ້າທີ່ອາວຸໂສດ້ານສາທາລະນະສຸກອາຊຽນ ເພື່ອກະກຽມກອງປະຊຸມລັດຖະມົນຕີ ສາທາລະນະສຸກ ອາຊຽນ (Preparatory SOMHD for the Special Meeting of ASEAN Health Ministers Meeting).
7. ພິທີສະເໜີໂຕຄະນະກໍາມະການຮ່ວມ ອາຊຽນ-ສະຫະລັດ ອາເມລິກາ ວ່າດ້ວຍ ການປ້ອງກັນ ແລະ ຄວບຄຸມພະຍາດ(the Launching of the ASEAN-United States Infection Prevention and Control Task Force).
ກອງປະຊຸມໃນຄັ້ງນີ້ ມີຄວາມໝາຍຄວາມສໍາຄັນຫຼາຍ ທີ່ເຮັດໃຫ້ເຈົ້າໜ້າທີ່ອາວຸໂສດ້ານການສາທາລະນະສຸກອາຊຽນ ສາມາດປະຊຸມປຶກສາຫາລືກັນແບບເຊິ່ງໜ້າ ເນື່ອງຈາກໃນໄລຍະທີ່ມີການລະບາດຂອງພະຍາດ ໂຄວິດ-19 ໃນຊຸມປີທີ່ຜ່ານມາ ກອງປະຊຸມແມ່ນຈັດຂື້ນຜ່ານຮູບແບບອອນລາຍ. ກອງປະຊຸມຈະໄດ້ປຶກສາຫາລືໃນຫຼາຍບັນຫາດ້ານສາທາລະນະສຸກ ແລະ ບັນດາເອກະສານທີ່ສຳຄັນທາງດ້ານການພັດທະນາສາທາລະນະສຸກອາຊຽນ ໂດຍສະເພາະ ແມ່ນຄວາມຄືບໜ້າການຈັດຕັ້ງປະຕິບັດແຜນພັດທະນາສາທາລະນະສຸກອາຊຽນ ສົກປີ 2021-2025, ລວມທັງບັນດາແຜນຈັດຕັ້ງປະຕິບັດ ທີ່ຮ່ວມມືກັບບັນດາປະເທດຄູ່ເຈລະນາ ແລະ ຄູ່ຮ່ວມພັດທະນາ.ກອງປະຊຸມຈະໄດ້ມີການທົບທວນບັນດາກິດຈະກໍາ, ໂຄງການທີ່ໄດ້ຈັດຕັ້ງປະຕິບັດ ໃນໄລຍະຜ່ານມາຈົນຮອດປະຈຸບັນແລະ ວາງທິດທາງແຜນການ ຕໍ່ໜ້າຮ່ວມກັນ; ໂດຍສະເພາະ ການຕິດຕາມ ແລະ ລາຍງານຄວາມຄືບໜ້າບັນດາວຽກງານທີ່ໄດ້ຕົກລົງ ໃນກອງປະຊຸມຄັ້ງທີ່ຜ່ານມາ ຂອງ ເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ 16 (16th ASEAN SOMHD), ແລະ ກອງປະຊຸມລັດຖະມົນຕີສາທາລະນະສຸກອາຊຽນ ຄັ້ງທີ 15 (15th ASEAN Health Ministers Meeting and Related Meeting), ຊຶ່ງກອງປະຊຸມໃນຄັ້ງນີ້ ຈະໄດ້ເນັ້ນໜັກປຶກສາຫາລືໃນຫຼາຍບັນຫາ ດັ່ງນີ້:
ຄວາມຄືບໜ້າໃນການຈັດຕັ້ງປະຕິບັດວຽກງານແຜນພັດທະນາສາທາລະນາສາທາລະນະສຸກອາຊຽນ ຂອງບັນກຸ່ມສຸຂະພາບອາຊຽນ ໃນໄລຍະ 2021-2025 (ASEAN Health Clusters);
ການຈັດຕັ້ງປະຕິບັດ ບັນດາຖະແຫຼງການຜູ້ນໍາອາຊຽນ ທີ່ຕິດພັນກັບວຽກງານສາທາລະນະສຸກ (Health-related declarations and commitments);
ປຶກສາຫາລືກ່ຽວກັບຄວາມຄືບໜ້າການພິຈາລະນາສັນຍາການສ້າງຕັ້ງສູນອາຊຽນ ວ່າດ້ວຍພາວະສຸກເສີນດ້ານສາທາລະນະສຸກ ແລະ ພະຍາດທີ່ເກີດຂື້ນໃໝ່(ASEAN Centre for Public Health Emergency and Emerging Diseases)ແລະ ຂອບຂອງລະບົບກົນໄກການປະສານງານອາຊຽນກ່ຽວກັບພາວະສຸກເສີນດ້ານສາທາລະນະສຸກ (ASEAN Public Health Emergency Coordination System Framework); ແລະ ບັນຫາອື່ນໆທີ່ສຳຄັນ ທີ່ຈະໄດ້ປຶກສາຫາລືຮ່ວມກັນ ຂອງເຈົ້າໜ້າທີ່ອາວຸໂສດ້ານການພັດທະນາສາທາລະນະສຸກ ລະຫວ່າງ ບັນດາປະເທດສະມາຊິກອາຊຽນ, ປະເທດຄູ່ເຈລະຈາ ແລະ ບັນດາປະເທດ ຄູ່ຮ່ວມພັດທະນາ ຕ່າງໆ.
