ຄະນະນັກກິລາຄົນພິການທີມຊາດລາວ ທີ່ເຂົ້າຮ່ວມງານກິລາຄົນພິການອາຊຽນ ຫຼື ອາຊຽນ ພາຣາເກມ ຄັ້ງທີ 12 ທີ່ປະເທດກຳປູເຈຍ ເປັນເຈົ້າພາບ ໄດ້ເດີນທາງກັບມາເຖິງນະຄອນຫຼວງວຽງຈັນ ສປປ ລາວ ເປັນທີ່ຮຽບຮ້ອຍແລ້ວ ໃນຕອນຄ່ຳວັນທີ່ 10 ມິຖຸນາ 2023 ທີ່ສະໜາມບິນສາກົນວັດໄຕ ນຳໂດຍ ທ່ານ ປອ ນາງ ດາລາວອນ ກິດຕິພັນ ຫົວໜ້າຫ້ອງການ ກະຊວງສຶກສາທິການ ແລະ ກິລາ (ສສກ), ຮອງປະທານຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ແລະ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງ ສສກ, ຮອງປະທານ-ເລຂາທິການ ຄພລ ທັງເປັນຫົວໜ້ານຳພາຄະນະນັກກິລາຄົນພິການລາວ ແລະ ໃຫ້ກຽດຕ້ອນຮັບຢ່າງອົບຮົມໂດຍ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ສສກ ທັງເປັນປະທານ ຄພລ ພ້ອມດ້ວຍຄະນະກົມ ຕະຫຼອດຮອດພະນັກງານທີ່ກ່ຽວຂ້ອງ ແລະ ຍາດພີ່ນ້ອງຂອງນັກກິລາ ມາຕ້ອນຮັບຢ່າງອົບອຸ່ນ.
ໃນໂອກາດນີ້, ທ່ານ ວິລະວັນ ບຸນສຸກໄທ ໃຫ້ສຳພາດວ່າ: ໃນການເຂົ້າຮ່ວມແຂ່ງຂັນກິລາຄົນພິການອາຊຽນພາຣາເກມຄັ້ງນີ້ ຄະນະນັກກິລາທີມຊາດລາວ ສາມາດຍາດມາໄດ້ 2 ຫຼຽນເງິນ ແລະ 10 ຫຼຽນທອງ ຢູ່ອັນດັບທີ 11 ຂອງຕາຕະລາງສະຫຼຸບຫຼຽນລວມຂອງການແຂ່ງຂັນງານດັ່ງກ່າວ ໂດຍ 2 ຫຼຽນເງິນໄດ້ຈາກ ນາງ ລັດສະໝີ ສີປະເສີດ ນັກກິລາຍົກນໍ້າໜັກຄົນພິການທີມຊາດລາວ ຮຸ່ນນໍ້າໜັກບໍ່ເກີນ 41 ກິໂລກຣາມ ປະເພດຍົກນໍ້າໜັກຄະແນນລວມ ພ້ອມກັນນີ້ ນາງ ລັດສະໝີ ສີປະເສີດ ຍັງໄດ້ອີກ 1 ຫຼຽນທອງ ຈາກປະເພດຍົກນໍ້າໜັກຄະແນນບຸກຄົນ ສ່ວນອີກ 1 ຫຼຽນເງິນ ໄດ້ຈາກກິລາໂກນບານທີມຍິງ ແລະ 9 ຫຼຽນທອງ ໄດ້ຈາກກິລາບານເຕະຄົນພິການຕາ, ບານບ້ວງລໍ້ເລື່ອນ 2 ຫຼຽນ ແລະ ແລ່ນ-ລານ 6 ຫຼຽນທອງ ຕໍ່ຜົນງານດັ່ງກ່າວ ຖືວ່າປະສົບຜົນສຳເລັດໃນລະດັບທີ່ພໍໃຈ ເພາະພວກເຮົາໄດ້ສົ່ງນັກກິລາທັງໝົດ 45 ຄົນ ຈາກ 7 ປະເພດກິລາ.
ແນວໃດກໍດີ, ພວກເຮົາຈະໄດ້ກະກຽມສືບຕໍ່ຝຶກຊ້ອມນັກກິລາເພື່ອຈະເຂົ້າຮ່ວມ ເອຊຽນພາຣາເກມ ທີ່ຫາງໂຈວ ສປ ຈີນ ໃນເດືອນຕຸລາ 2023 ແລະ ຈະສືບຕໍ່ຝຶກຊ້ອມຢ່າງຕໍ່ເນື່ອງ ເພື່ອເຂົ້າຮ່ວມອາຊຽນພາຣາເກມ ຄັ້ງທີ 13 ທີ່ນະຄອນຣາຊະສີມາ ປະເທດໄທ ໃນປີ 2026 ສະນັ້ນ, ຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງການນຳພັກ-ລັດຖະບານ ທີ່ໄດ້ອະນຸມັດງົບປະມານໃຫ້ທັບນັກກິລາຄົນພິການລາວໄດ້ເຂົ້າຮ່ວມແຂ່ງຂັນໃນຄັ້ງນີ້. ໃນການແຂ່ງຂັນງານກິລາອາຊຽນພາຣາເກມຄັ້ງນີ້ ເຈົ້າຄອງຫຼຽນຄຳກິລາຄົນພິການອາຊຽນ ຕົກເປັນຂອງ ທັບນັກກິລາຄົນພິການອິນໂດເນເຊຍ ຍາດໄດ້ 159 ຫຼຽນຄຳ, 148 ຫຼຽນເງິນ ແລະ 94 ຫຼຽນທອງ ລວມ 401 ຫຼຽນ, ອັນດັບທີ 2 ໄທ ຍາດໄດ້ 126 ຫຼຽນຄຳ, 110 ຫຼຽນເງິນ ແລະ 92 ຫຼຽນທອງ; ອັນດັບທີ 3 ຫວຽດນາມ ຍາດໄດ້ 66 ຫຼຽນຄຳ, 58 ຫຼຽນເງິນ ແລະ 77 ຫຼຽນທອງ ສ່ວນ ກຳປູເຈຍ ເຈົ້າພາບ ຍາດໄດ້ 9 ຫຼຽນຄຳ, 18 ຫຼຽນເງິນ ແລະ 43 ຫຼຽນທອງ. ຂະນະທີ່ ສປປ ລາວ ຍາດໄດ້ 2 ຫຼຽນເງິນ ແລະ 10 ຫຼຽນທອງ ຢູ່ອັນດັບທີ 11.
ຂ່າວໂດຍ: ສົງການ ພັນແພງດີ
