ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ເອຢິບ ໄດ້ລົງນາມໃນສັນຍາກັບບໍລິສັດພະລັງງານສະອາດ ມັສດາ (Masdar) ຂອງ ສະຫະລັດອາຣັບເອມິເຣດ (UAE) ເລີ່ມດຳເນີນໂຄງການກໍ່ສ້າງໂຮງງານໄຟຟ້າແຮງລົມ ຢູ່ ແຂວງໂຊຮັກ ດ້ວຍຈຳນວນເງິນລົງທຶນໂດຍກົງເຖິງ 10 ຕື້ໂດລາ.
ຂ່າວລະບຸວ່າ: ໂຄງການດັ່ງກ່າວຈະປະຕິບັດການກໍ່ສ້າງໂດຍ ບໍລິສັດ Masdar ແລະ ບັນດາບໍລິສັດຄູ່ຮ່ວມງານ ເອຢິບ ລວມມີ ບໍລິສັດພະລັງງານທົດແທນຂອງເອຍິບ (Infinity Power) ແລະ ບໍລິສັດລາຍໃຫຍ່ດ້ານການກໍ່ສ້າງ (Hassan Allam Utilities).
ໃນກອງປະຊຸມຂ່າວ, ທ່ານ ໂມຮາເມັດ ເອລ-ຄາຢັດ ປະທານອົງການພະລັງງານໃໝ່ ແລະ ທົດແທນຂອງເອຢິບ (NREA) ໄດ້ເປີດເຜີຍວ່າ: ໂຮງງານແຫ່ງໃໝ່ນີ້ຈະກໍ່ສ້າງໃນເນື້ອທີ່ 3.000 ກິໂລຕາແມັດ ແລະ ເມື່ອສ້າງສຳເລັດຈະຜະລິດໄຟຟ້າໄດ້ 10 ກິກາວັດ (GW). ໂຄງການດັ່ງກ່າວແມ່ນຈຸດເລີ່ມຕົ້ນຂອງການຮ່ວມມືທີ່ກວ້າງຂວາງລະຫວ່າງ UAE ແລະ ອີຢິບ ໃນຂະແໜງພະລັງງານທົດແທນ.
ພາຍໃຕ້ຍຸດທະສາດດິນຟ້າອາກາດແຫ່ງຊາດ 2050, ເອຢິບ ມີຈຸດປະສົງເພື່ອຫຼຸດຜ່ອນການປ່ອຍອາຍພິດ CO2 ໂດຍຜ່ານການນໍາໃຊ້ແຫຼ່ງພະລັງງານທົດແທນ ແລະ ຮູບແບບການທົດແທນຂອງພະລັງງານ.
ໂຄງການນີ້ຈະຫຼຸດຜ່ອນການປ່ອຍອາຍພິດ CO2 ປະມານ 24 ລ້ານໂຕນຕໍ່ປີ, ພ້ອມທັງສ້າງໂອກາດວຽກເຮັດງານທຳປະມານ 30.000 ຄົນ ໃນໄລຍະການກໍ່ສ້າງ ແລະ ປະມານ 3.000 ຕຳແໜ່ງງານພາຍຫຼັງທີ່ໂຄງການດຳເນີນງານ.
