ເມື່ອບໍ່ດົນມານີ້, ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ໂອ້ລົມຕໍ່ການນໍາຂອງແຂວງ ໂອກາດເຂົ້າຮ່ວມກອງປະຊຸມຄົບຄະນະກາງສະໄໝທີ VII ຂອງຄະນະບໍລິຫານງານພັກແຂວງໄຊຍະບູລີ ໂດຍເນັ້ນໃຫ້ການນໍາຂອງແຂວງຕ້ອງຢຶດໝັ້ນ ແລະ ປະຕິບັດຫລັກການ ລວມສູນປະຊາທິປະໄຕ, ລະບອບແບບແຜນວິທີນຳພາຂອງພັກຢ່າງເຂັ້ມງວດ, ຕ້ອງຍົກສູງຄວາມເປັນແບບຢ່າງ ສ້າງຄວາມໄວ້ເນື້ອເຊື່ອໃຈໃຫ້ແກ່ປະຊາຊົນ ກໍຄື ມະຫາຊົນຢ່າງກວ້າງຂວາງ, ຖືເອົາວຽກງານການເມືອງ-ແນວຄິດ ເປັນຄືສະໜາມຮົບໜຶ່ງ ເລີ່ມຈາກຫັນປ່ຽນດ້ານທັດສະນະ-ແນວຄິດ, ຈິນຕະນາການ ລະຫວ່າງອັນຖືກ-ອັນຜິດ, ຫັນວິທີຄິດແບບເກົ່າໄປສູ່ການຄົ້ນຄິດ ແລະ ການປະດິດສ້າງໃໝ່, ແຂ່ງຂັນກັນພັດທະນາ ໃຫ້ເປັນການກະທຳຕົວຈິງຢູ່ໃນຕົວບຸກຄົນ ຫລື ໝູ່ຄະນະ ພ້ອມທັງຍູ້ແຮງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນຊຸມປີທີ່ຍັງເຫລືອຮອດທ້າຍສະໄໝ ເພື່ອເປັນການສືບຕໍ່ຄົ້ນຄວ້າ, ຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງໄຊຍະບູລີ ສະໄໝທີ VII ແລະ ແຜນພັດທະນາເສດຖະກິດ-ສັງຄົມ ຂອງແຂວງ ໃຫ້ບັນລຸຕາມຈຸດປະສົງຄາດໝາຍທີ່ວາງໄວ້.
ພ້ອມນີ້, ໃຫ້ການນຳແຂວງ ລົງເລິກຊອກຫາສາເຫດຄວາມຫຍຸ້ງຍາກ ເພື່ອຄົ້ນຄວ້າວິທີການ ແລະ ມາດຕະການແກ້ໄຂບັນດາຂໍ້ຄົງຄ້າງຕ່າງໆ, ເອົາໃຈໃສ່ຂຸດຄົ້ນທ່າແຮງບົ່ມຊ້ອນ, ກຳລັງແຮງທີ່ມີ ແລະ ສາມາດປະຕິບັດໄດ້; ສືບຕໍ່ຍູ້ແຮງການຜະລິດກະສິກໍາເປັນສິນຄ້າ ຕິດພັນກັບການປຸງແຕ່ງຜະລິດຕະພັນ ກະສິກໍາສະອາດ ແລະ ຍືນຍົງ, ຍູ້ແຮງບັນດາໂຮງຈັກໂຮງງານປຸງແຕ່ງ ໃຫ້ສາມາດດຳເນີນການຜະລິດໂດຍໄວ, ເອົາໃຈໃສ່ຈັດຕັ້ງປະຕິບັດວາລະແຫ່ງຊາດ ໃຫ້ກາຍເປັນພັນທະທີ່ເປັນຄວາມຮັບຜິດຊອບ ຂອງທົ່ວລະບົບການເມືອງ ແລະ ຂອງທຸກພາກສ່ວນໃນສັງຄົມຢ່າງແທ້ຈິງ; ສືບຕໍ່ຜັນຂະຫຍາຍຜົນສໍາເລັດ ຂອງກອງປະຊຸມ ວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ວຽກງານ 3 ສ້າງ. ນອກຈາກນີ້, ກໍໃຫ້ສືບຕໍ່ເພີ່ມທະວີການປັບປຸງລະບົບການເມືອງ ແຕ່ຂັ້ນແຂວງລົງຮອດຮາກຖານ ໃຫ້ໜັກແໜ້ນ ແລະ ເຂັ້ມແຂງ ພ້ອມທັງສືບຕໍ່ເອົາໃຈໃສ່ການພັດທະນາ ດ້ານວັດທະນະທໍາ-ສັງຄົມ ສຸມໃສ່ປະຕິບັດບັນດາຄາດໝາຍຕົວຊີ້ວັດ ການພັດທະນາແບບຍືນຍົງ, ເພີ່ມທະວີການນໍາພາ-ຊີ້ນຳຂອງຄະນະພັກແຕ່ລະຂັ້ນ ຕໍ່ວຽກງານກໍ່ສ້າງພັກ-ພະນັກງານ ເພື່ອສ້າງໃຫ້ມີກຳລັງຖັນແຖວສະມາຊິກພັກ, ພະນັກງານທີ່ໜັກແໜ້ນ ເຂັ້ມແຂງ, ຈົ່ງຮັກພັກດີ, ຫ້າວຫັນ, ມີຫົວຄິດປະດິດສ້າງ ແລະ ສະດຸ້ງໄວຕໍ່ບັນຫາອັນໃໝ່ ເພື່ອສືບທອດພາລະກິດປະຕິວັດຂອງພັກເຮົາ.
ຂ່າວ-ພາບ: ອຸ່ນເຮືອນ ໂພທິລັກ
