ການແຂ່ງຂັນເຕະບານ ຢູຟາ ແຊ໋ມປ້ຽນລີກ ລະດູການ 2023-2023 ຮອບຮອງຊະນະເລີດ ນັດທີ 2 ເມື່ອວັນທີ 16 ພຶດສະພາ 2023 ສະໂມສອນ ອິນເຕີ ມິລານ ທີມດັງໃນລາຍການ ກັນໂຊເຊເຣຍອາ ອີຕາລີ ເປີດສະໜາມຈູເຊັບເປ ເມອັດຊາ ຕ້ອນຮັບການມາຢາມຂອງ ສະໂມສອນ ເອຊີ ມິລານ ຄູ່ແຂ່ງຮ່ວມເມືອງ ຫຼັງຈາກໃນເກມນັດທຳອິດ ເປັນ ອິນເຕີ ມິລານ ທີ່ບຸກໄປເອົາຊະນະມາໄດ້ກ່ອນ 2-0 ປະຕູ.
ຮູບເກມໃນເຄິ່ງເວລາທຳອິດ ເອຊີ ມິລານ ທີມຢາມ ພະຍາຍາມເປີດເກມບຸກເພື່ອຫວັງທວງປະຕູຄືນໃຫ້ໄດ້ໂດຍໄວ ຂະນະທີ່ ເຈົ້າບ້ານ ອິນເຕີ ມິລານ ຫຼິ້ນໃນຮອບແບບເກມຮັບ ແລ້ວຖ້າໂຕກັບໄວແບບອັນຕະລາຍໄດ້ຫຼາຍຄັ້ງ ແຕ່ສຸດທ້າຍທັງ 2 ທີມບໍ່ສາມາດຍິງປະຕູກັນໄດ້ເທື່ອ ຈົບ 45 ນາທີ ຍັງສະເໝີກັນ 0-0.
ກັບເຂົ້າສູ່ເຄິ່ງເວລາທີ 2 ຮູບເກມຍັງເປັນໄປໃນທິດທາງເກົ່າ ຈົນມາເຖິງນາທີ 84 ກາຍເປັນ ອິນເຕີ ມິລານ ເຈົ້າບ້ານ ທີ່ມາໄດ້ປະຕູຂຶ້ນນຳກ່ອນ 1-0 ຈາກການຍິງຂອງ ເລົາຕາໂຣ ມາຕິເນດ ກອງໜ້າທີມຊາດອາກຊັງຕິນ ສ່ວນເວລາທີ່ເຫຼືອທັງ 2 ທີມບໍ່ສາມາດຍິງປະຕູກັນໄດ້ເພີ່ມ ຈົບເກມ ອິນເຕີ ມິລານ ເປີດບ້ານຢ້ຳໄຊເໜືອ ເອຊີ ມິລານ 1-0 ລວມຜົນສອງນັດ ອິນເຕີ ມິລານ ຊະນະ ເອຊີ ມິລານ 3-0 ຜ່ານເຂົ້າສູ່ຮອບຊີງຊະນະເລີດ ໄດ້ເປັນທຳອິດ ໄປລໍຖ້າພົບຜູ້ຊະນະລະຫວ່າງ ແມນເຊັດເຕີ ຊິຕີ ແລະ ຣີວ ມາດຣິດ ທີ່ຈະລົງແຂ່ງຂັນໃນຄ່ຳຄືນມື້ນີ້ (17 ພຶດສະພາ 2023) ທີ່ສະໜາມເອຕິຮັດ ສະເຕດ້ຽມ ປະເທດອັງກິດ.
ສຳລັບຮອບຊີງຊະນະເລີດ ການແຂ່ງຂັນເຕະບານ ຢູຟາ ແຊ໋ມປ້ຽນລີກ ລະດູການ 2023-2023 ຈະມີຂຶ້ນໃນວັນທີ 10 ມິຖຸນາ 2023 ທີ່ສະໜາມອະຕາເຕິກ ສະເຕດ້ຽມ ນະຄອນຫຼວງອິນຕັນບູນ ປະເທດຕວກກີ.
