ໂອກາດລົງເຄື່ອນໄຫວຢ້ຽມຢາມ ແລະເຮັດວຽກ ຢູ່ແຂວງຈຳປາສັກ ໃນຕອນບ່າຍ ວັນທີ 14 ພຶດສະພາ 2023, ທ່ານນາງ ປານີ ຢາທໍ່ຕູ້ ຮອງປະທານປະເທດ ໄດ້ລົງເຄື່ອນໄຫວຢ້ຽມຢາມ, ພົບປະປະຊາຊົນ ບ້ານແກ້ງເກ່ຍ ເມືອງບາຈຽງຈະເລີນສຸກ ແຂວງຈຳປາສັກ ໂດຍມີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ສົມລິດ ປັນທະບົວສີ ເຈົ້າເມືອງບາຈຽງຈະເລີນສຸກ ພ້ອມຄະນະນຳຂອງເມືອງ, ອົງການປົກຄອງບ້ານ ແລະ ພໍ່ແມ່ ປະຊາຊົນເຂດດັ່ງກ່າວ ໃຫ້ການຕ້ອນຮັບ ແລະ ໄດ້ຮັບຟັງລາຍງານຫຍໍ້ການຈັດຕັ້ງປະຕິບັດວຽກງານຮອບດ້ານ ຕິດພັນກັບການສ້າງບ້ານພັດທະນາ ປະຊາຊົນຢູ່ດີ-ກິນດີ ຂອງເມືອງບາຈຽງຈະເລີນສຸກ.
ທ່ານ ບຸນສຸກ ນາຍບ້ານແກ້ງເກ່ຍ ໄດ້ໃຫ້ຮູ້ວ່າ: ໃນໄລຍະຜ່ານມາ, ຄະນະບໍລິຫານງານພັກເມືອງບາຈຽງຈະເລີນສຸກ ໄດ້ມີມະຕິຕົກລົງແຕ່ງຕັ້ງພະນັກງານຫລັກແຫລ່ງ ລົງນຳພາ-ຊີ້ນຳກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານຢ່າງເປັນລະບົບຕໍ່ເນື່ອງ ຕິດພັນກັບນຳພາຂະບວນການແຂ່ງຂັນ-ຮັກຊາດ ແລະ ສ້າງບ້ານພັດທະນາ-ຍູ້ແຮງວຽກງານ 3 ສ້າງຢ່າງແທດເຖິງ, ໄດ້ສົມທົບກັບຄະ ນະພັກ-ອົງການປົກຄອງບ້ານ, ຄົ້ນຄ້ວາເຊື່ອມຊຶມບັນດານິຕິກຳກ່ຽວກັບການສ້າງຄອບຄົວ ແລະ ບ້ານ ພັດທະນາປະຊາຊົນຢູ່ດີ-ກິນດີ ແລະ ໄດ້ຝຶກອົບຮົມສ້າງຄວາມຮັບຮູ້ ເຂົ້າໃຈໃຫ້ແກ່ຄະນະພັກ, ສະມາ ຊິກພັກ, ອົງການປົກຄອງບ້ານ, ປະຊາຊົນພາຍໃນບ້ານ ກ່ຽວກັບຈຸດປະສົງຄາດໝາຍ, ດ້ານເນື້ອໃນ, ວິ ທີການ, ຂັ້ນຕອນ ແລະ ນຳພາ-ຊີ້ນຳການຈັດຕັ້ງເຄື່ອນ ໄຫວວຽກງານຢ່າງຮອບດ້ານ ດ້ວຍຄວາມຮັບ ຜິດຊອບສູງ ຈຶ່ງເຮັດໃຫ້ບ້ານແກ້ງເກ່ຍ ມີຜົນສຳເລັດທີ່ພົ້ນເດັ່ນໃນ ຫລາຍດ້ານຕາມ 4 ເນື້ອໃນ 4 ຄາດໝາຍ.
ສ່ວນວຽກງານດ້ານເສດຖະກິດ ອັນພົ້ນເດັ່ນ ບ້ານມີຄອບຄົວຕົວແບບດ້ານການຜະລິດກະສິກໍາ ທີ່ມີລາຍຮັບຫລາຍກວ່າ 1 ຕື້ຂຶ້ນໄປມີ 5 ຄອບຄົວ, ຜະລິດມັນຕົ້ນ ແລະ ມັນດ້າງ 2 ຄອບຄົວ, ສະບຽງອາຫານ 3 ຄອບຄົວ, ລວມຍອດພະລິດຕະພັນກະສິກຳ-ອຸດສາຫະກຳ, ການບໍລິການຂອງບ້ານມີປະ ມານ 20 ກວ່າຕື້ກີບ ສະເລ່ຍຕໍ່ຫົວຄົນໄດ້ 10 ລ້ານກວ່າກີບຄົນ/ປີ, ມີຄອບຄົວເຫລືອກິນ 95 ຄອບ ຄົວ, ຄອບຄົວກຸ້ມກິນ 347 ຄອບຄົວ. ພ້ອມກັນນັ້ນ, ໄດ້ເອົາໃຈໃສ່ຄຸ້ມຄອງຕິດຕາມ, ກວດກາ, ບັນ ດາ ຫົວໜ່ວຍທຸລະກິດອຸດສາຫະກຳການຄ້າ ແລະ ການບໍລິການ ທີ່ເກີດຂື້ນພາຍໃນບ້ານມີຈຳນວນຫົວໜ່ວຍທຸລະກິດທັງໝົດ 46 ຫົວໜ່ວຍ, ຄຽງຄູ່ກັນນັ້ນ ໄດ້ຊຸກຍູ້ໃຫ້ພໍ່ແມ່ປະຊາຊົນພາຍໃນບ້ານ ນໍາເອົາລູກຫລານຂອງຕົນ ເຂົ້າໂຮງຮຽນ ແລະ ຮັບປະກັນບໍ່ມີໃຫ້ປະລະການຮຽນ, ເອົາໃຈໃສ່ປະສານສົມທົບກັບຫ້ອງການສາທາລະສຸກເມືອງ ປັບປຸງໂຮງໝໍນ້ອຍ ແລະ ຜ່ານການຈັດຕັ້ງປະຕິບັດເຮັດ ໃຫ້ການຮັກ ສາອະນາໄມ 3 ສະອາດ ແລະ ສົ່ງເສີມສຸຂະພາບຂອງປະຊາຊົນດີຂຶ້ນ.
ໂອກາດນີ້, ທ່ານນາງ ປານີ ຢາທໍ່ຕູ້ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສຳເລັດ ການຈັດຕັ້ງ, ການນຳພາ ສ້າງບ້ານແກ້ງແກ່ຍ ເປັນບ້ານພັດທະນາ ປະຊາຊົນຢູ່ດີ-ກິນດີ ກໍຄື ແບບແຜນການດຳລົງຊີວິດຂອງ ແຕ່ລະຄອບຄົວ ແລະ ຂໍໃຫ້ ສືບຕໍ່ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງບ້ານ ໃຫ້ບັນລຸຕາມແຜນການ, ຊຸກຍູ້ສົ່ງເສີມໃຫ້ລູກຫລານໄດ້ເຂົ້າຮຽນວິຊາອາຊີບ, ພັດທະ ນາຄຸນນະພາບສີມືແຮງງານ ເພື່ອສະໜອງຄວາມຕ້ອງການຂອງຕະຫລາດແຮງງານພາຍໃນ, ສ້າງກຳລັງແຮງໃຫ້ແກ່ການພັດທະນາ ປະເທດຊາດ. ພ້ອມນັ້ນ, ອົງການປົກຄອງແຂວງ ແລະ ເມືອງ ຕ້ອງໄດ້ຊຸກ ຍູ້ສົ່ງເສີມໃຫ້ປະຊາຊົນປູກພືດຫັນເປັນອຸດສາຫະກຳ ເພື່ອສະໜອງໃຫ້ໂຮງງານ ບົນພື້ນຖານລັດເປັນຕົວຊີ້ບອກທາງດ້ານການຕະຫລາດ. ຈາກນັ້ນ, ທ່ານ ນາງ ປານີ ຢາທໍ່ຕູ້ ພ້ອມຄະນະ ຍັງໄດ້ເຄື່ອນໄຫວຢ້ຽມ ຢາມ ໂຮງງານປຸງແຕ່ງຢາງພາລາ ຂອງ ບໍລິສັດ ຫຸ້ນສ່ວນພັດທະນາກາວຊູເຢົ້າຕຽນ ຫວຽດ-ລາວ ຈຳກັດຜູ້ດຽວ ທີ່ເປັນພື້ນຖານການຜະລິດ ຂອງ ເມືອງບາຈຽງຈະເລີນສຸກ ແຂວງຈຳປາສັກ ຕື່ມອີກ.
ຂ່າວ: ທັດຊະນະ
