ກະຊວງກະສິກໍາ ແລະ ປ່າໄມ້ ຮ່ວມມືກັບ ສ ກູບາ ຈັດກອງປະຊຸມພົບປະສອງຝ່າຍຂຶ້ນ ເພື່ອການຮ່ວມມືໃນຂົງເຂດກະສິກຳ ໃນວັນທີ 8 ພຶດສະພາ ນີ້ ທີ່ໂຮງແຮມລາວພະລາຊາ ນະຄອນຫຼວງວຽງຈັນ. ເປັນກຽດເຂົ້າຮ່ວມໃນພິທີ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະ, ຝ່າຍ ສ ກູບາ ນໍາໂດຍ ທ່ານ Maury Hechavarria Bermudez ຮອງລັດຖະມົນຕີກະຊວງ ກະສິກໍາ ສ ກູບາ, ພ້ອມດ້ວຍຄະນະ. ໂອກາດນີ້, ທ່ານຮອງລັດຖະມົນຕີ ໄດ້ສະແດງຄວາມຕ້ອນຮັບອັນອົບອຸ່ນ ແລະ ສະແດງຄວາມຂອບອົກຂອບໃຈ ຕໍ່ຄະນະຜູ້ແທນ ກະຊວງກະສິກໍາ ສ ກູບາ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກງານຮ່ວມມື ກັບ ກະຊວງກະສິກໍາ ແລະ ປ່າໄມ້ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືເຂົ້າໃນການຊ່ວຍເຫຼືອຊຶ່ງກັນ ແລະ ກັນ ມີຄວາມເຂົ້າອົກເຂົ້າໃຈໄມຕີຈິດມິດຕະພາບຖານເພື່ອນມິດຍຸດທະສາດ ຮ່ວມອຸດົມການ ເສັ້ນທາງສັງຄົມນິຍົມ ອັນດຽວກັນ.
ການພົບປະຄັ້ງນີ້, ສອງຝ່າຍໄດ້ຜັດປ່ຽນກັນລາຍງານສະພາບການທີ່ພົ້ນເດັ່ນຕ່າງໆໃຫ້ກັນຮັບຊາບໂດຍຫຍໍ້. ຈາກນັ້ນ ທ່ານ ທອງພັດ ວົງມະນີ ລາຍງານຫຍໍ້ ກ່ຽວກັບການຮ່ວມມືວຽກງານກະສິກໍາ ລາວ-ກູບາ ວ່າ: ກະຊວງກະສິກໍາ ແລະ ປ່າໄມ້ ສປປ ລາວ ແລະ ກະຊວງກະສິກໍາ ສ ກູບາ ໄດ້ເຊັນກັນໃນເດືອນຕຸລາ 2022 ຜ່ານມາ, ສອງຝ່າຍໄດ້ມີການເຊັນບົດບົດບັນທຶກການຮ່ວມມື ລະຫວ່າງ ສອງກະຊວງນີ້ ເປັນຄັ້ງທີ 2 ຊຶ່ງໃນການຈັດຕັ້ງຜັນຂະຫຍາຍເນື້ອໃນເຫັນວ່າ ຍັງຢູ່ໃນໄລຍະເລີ່ມຕົ້ນ ຊຶ່ງບົດບັນທຶກການຮ່ວມມືດັ່ງກ່າວ ແມ່ນໄດ້ລົງເລິກໃນຂົງເຂດວຽກງານ: ການແລກປ່ຽນຂໍ້ມູນຂ່າວສານ ດ້ານວິທະຍາສາດ, ດ້ານເຕັກນິກ, ການແລກປ່ຽນປະສົບການ, ແລກປ່ຽນດ້ານການຜະລິດແນວພັນ ທີ່ສາມາດປັບຕົວກັບສະພາບພູມີອາກາດ, ການນໍາສະເໜີແນວພັນໃໝ່ຂອງພືດ ແລະ ແກ່ນພັນ ທີ່ມີຄວາມທົນທານ, ໄມ້ໃຫ້ໝາກ, ການປ້ອງກັນສັດຕູພືດແບບປະສົບປະສານ, ການແລກປ່ຽນບົດຮຽນ ກ່ຽວກັບ ການຄຸ້ມຄອງ ນິເວດ-ກະສິກໍາ ແລະ ດ້ານການລ້ຽງສັດ ແລະ ຜະລິດຕະພັນສັດ ຈະສຸມໃສ່ການປັບປຸງເຕັກນິກ ໃນການປະສົມພັນທຽມ, ປັບປຸງພັນຂອງສັດລ້ຽງ ແລະ ຮ່ວມມືດ້ານປ່າໄມ້ ຊຶ່ງໂຄງການທໍາອິດຈະຮ່ວມມືກັນກໍແມ່ນໂຄງການຮ່ວມມືຄົ້ນຄວ້າການຜະລິດແນວພັນເຂົ້າ.
(ຂ່າວ-ພາບ: ແສງຈັນ)
