ທີມນັກກິລາພິການຍົກນໍ້າໜັກ ແຂວງຜົ້ງສາລີ ສ້າງຜົນງານຄວ້າ 6 ຫຼຽນລາງວັນໃນການແຂ່ງຂັນກິລາຍົກນໍ້າໜັກໃນງານແຂ່ງຂັນກິລາຄົນພິການແຫ່ງ ຄັ້ງທີ III ຫຼື ຊຽງຂວາງພາຣາເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ.
ພິທີມອບ-ຮັບຫຼຽນລາງວັນການແຂ່ງຂັນກິລາຄົນພິການຍົກນໍ້າໜັກ ໃນງານແຂ່ງຂັນກິລາຄົນພິການແຫ່ງຊາດ ຄັ້ງທີ III ທີ່ແຂວງຊຽງຂວາງເປັນເຈົ້າພາບ ໄດ້ຈັດຂຶ້ນໃນຕອນບ່າຍວັນທີ 15 ກຸມພາ 2023 ທີ່ພະແນກແຜນ ການ ແລະ ການລົງທຶນແຂວງຊຽງຂວາງ, ໃຫ້ກຽດເຂົ້າຮ່ວມ ແລະ ມອບໂດຍ ຂອງທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການພາຣາແລມປິກແຫ່ງຊາດລາວ, ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງຊຽງຂວາງ, ທ່ານ ນາງຄໍາສອນ ສີວົງສາ ຮອງຫົວໜ້າພະແນກສຶກສາທິການ ແລະ ກິລາແຂວງຄໍາມ່ວນ, ມີບັນດາຄະນະນຳ, ຄູຝຶກ, ກໍາມະການຕັດສິນ ແລະ ນັກກິລາຈາກ 14 ແຂວງ, 1 ນະຄອນຫຼວງວຽງຈັນເຂົ້າຮ່ວມເປັນສັກຂີພິຍານ.
ການແຂ່ງຂັນກິລາຄົນພິການຍົກນໍ້າໜັກ ປະເພດຊາຍມີ: 49 kg, 54 kg, 59 kg, 65 kg, 72 kg ແລະ ຮຸ່ນນໍ້າໜັກ 80 kg; ປະເພດຍິງມີ: ຮຸ່ນນໍ້າໜັກ 41 kg, 45 kg ແລະ ຮຸ່ນນໍ້າໜັກ 50 kg. ມີການຊີງຫຼຽນທັງໝົດ 72 ຫຼຽນ; ໃນນັ້ນມີ 24 ຫຼຽນຄໍາ, 24 ຫຼຽນເງິນ, 24 ຫຼຽນທອງແດງ. ສໍາລັບແຂວງຜົ້ງສາລີໄດ້ສົ່ງນັກກິລາເຂົ້າຮ່ວມແຂ່ງຂັນທັງໝົດ 4 ທ່ານ; ໃນນີ້, ໄດ້ສົ່ງແຂ່ງຂັນມີ 3 ຮຸ່ນນໍ້າໜັກຄື: ຮຸ່ນນໍ້າໜັກ 65 kg, 72 kg ແລະ 80 kg. ຜ່ານການແຂ່ງຂັນຕົວຈິງ ແຂວງຜົ້ງສາລີສາມາດຍາດໄດ້ 2 ຫຼຽນຄໍາ, 2 ຫຼຽນເງິນ, 2 ຫຼຽນ ທອງແດງ, ລວມທັງໝົດມີ 6 ຫຼຽນ.
ນັກກິລາທີ່ເຂົ້າຮ່ວມແຂ່ງຂັນ ແລະ ສາມາດຄວ້າຫຼຽນລາງວັນມາໄດ້ຄື: ທ້າວ ສຸກທະວຽງ, ນັກກິລາຮຸ່ນນໍ້າໜັກ 65 kg, ຄວ້າມາ 2 ຫຼຽນຄໍາ, ທ້າວ ຄໍາສຸກ ໄຊ ນັກກິລາຮຸ່ນນໍ້າໜັກ 80 kg, ຄວ້າມາໄດ້ 2 ຫຼຽນເງິນ ແລະ ທ້າວ ສົມທອງ ຫຼ້າມະນີ, ນັກກິລາຮຸ່ນນໍ້າໜັກ 72 kg ຄວ້າມາໄດ້ 2 ຫຼຽນທອງແດງ.
ພາບ-ຂ່າວ ຄຳວອນ ສຶກສາແຂວງ
