ໜັງສືພິມ Gazzetta dello Sport ອິຕາລີ ລາຍງານວ່າ ຢູເວນຕຸສ ຮູ້ສຶກຫງຸດຫງິດຈົນໝົດຄວາມອົດທົນກັບອາການບາດເຈັບຂອງ ປອລ ປອກບາ ແລະ ກໍາລັງພິຈາລະນາທີ່ຈະຂາຍ ຫຼືອາດເຖິງຂັ້ນຍົກເລີກສັນຍາຂອງກອງກາງຄົນນີ້
ປອກບາ ຫວນກັບຄືນມາຮ່ວມທີມ ຢູເວນຕຸສ ແບບບໍ່ມີຄ່າຕົວອີກເທື່ອໜຶ່ງເມື່ອລະດູຮ້ອນທີ່ຜ່ານມາ ຫຼັງຈາກໝົດສັນຍາກັບ ແມນເຊສເຕີ ຢູໄນເຕັດ. ຢ່າງໃດກໍ່ຕາມ ກອງກາງອາຍຸ 29 ປີ ມີບັນຫາອາການປວດຫົວເຂົ່າ ຍັງບໍ່ໄດ້ລົງສະໜາມເກມຢ່າງເປັນທາງການແມ່ນວ່າວິນາທີດຽວ ມາຮອດປັດຈຸບັນນີ້ການແຂ່ງຂັນໄດ້ດຳເນີນມາເປັນເວລາເຄິ່ງລະດູການແລ້ວ.
ເມື່ອຕົ້ນເດືອນກ່ອນ ປອກບາ ກັບຄືນໄປຝຶກຊ້ອມກັບ ຢູເວນຕຸສ ໄດ້ເປັນຄັ້ງທໍາອິດ ແຕ່ຫຼ້າສຸດ ເຂົາມີບັນຫາກ້າມຊີ້ນຊ້ໍາອີກ ເຮັດໃຫ້ຕ້ອງລໍຖ້າການລົງສະໜາມໄປກ່ອນ. ນັກເຕະຊາວຝຣັ່ງ ເຫຼືອສັນຍາໃນທີມຢູເວນຕຸສ ເຖິງປີ 2026 ພ້ອມຮັບເງິນເດືອນປະມານ 8 ລ້ານເອີໂຣຕໍ່ລະດູການ. ລາຍງານອ້າງວ່າ: ຢູເວນຕຸສ ຮູ້ສຶກເຄືອງໂກດທີ່ພວກເຂົາຈ່າຍເງິນຄ່າຈ້າງໃຫ້ ປອກບາ ໂດຍບໍ່ໄດ້ໃຊ້ງານນັກເຕະໃນສະໜາມ. ແມັກ ອັນເລກຣີ ຜູ້ຈັດການໃຫຍ່ຂອງ ຢູເວນຕຸສ ກໍາລັງພິຈາລະນາເພື່ອຕັດສິນໃຈວ່າຈະຮັກສາ ປອກບາ ໄວ້ກັບທີມຕໍ່ຫຼືບໍ່ ເຊິ່ງຄາດວ່າຈະມີທີມຈາກ ເມເຈີລີກ ໃຫ້ຄວາມສົນໃຈມາລໍຖ້າຮັບ.
ນອກຈາກນີ້ ບົດລາຍງານຍັງກ່າວຕື່ມວ່າ ມີຄວາມເປັນໄປໄດ້ອີກເຊັ່ນກັນ ທີ່ ຢູເວນຕຸສ ຈະຕົກລົງຍົກເລີກສັນຍາຂອງ ປອກບາ ເພື່ອໃຫ້ນັກເຕະອອກຈາກທີມໄປແບບບໍ່ມີຄ່າຕົວ. ຫາກ ຢູເວນຕຸສ ປ່ອຍ ປອກບາ ອອກໄປ ຈະເຮັດໃຫ້ພວກເຂົາມີຊ່ອງຫວ່າງຄ່າຈ້າງເພີ່ມພໍເຊັນສັນຍາດາວເຕະຄົນໃໝ່ ຢ່າງເຊັ່ນ ເຊີເກ ມິລິນໂຄວິຊ-ຊາວິຊ ກອງກາງ ລາຊິໂອ.
