ຕາມຂ່າວຈາກວິທະຍຸສາກົນຫວຽດນາມ, ທ່ານ ຟ້າມມິງຈິງ, ນາຍົກລັດຖະມົນຕີ ສສ ຫວຽດນາມ ໄດ້ກ່າວເນັ້ນ 3 ໜ້າທີ່ ຈຸດສຸມສຳຄັນເພື່ອຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ເປັນຕົ້ນ: ວຽກທຳອິດແມ່ນເພີ່ມທະວີການສ້າງວຽກເຮັດ ງານທຳ, ແກ້ໄຂຄວາມຫຍຸ້ງຍາກເມື່ອຕະຫລາດຖືກຮັດແຄບເຂົ້າ, ໃບສັ່ງຊື້ສິນຄ້າຖືກຫລຸດລົງຍ້ອນຜົນກະທົບຈາກພາຍນອກ. ວຽກທີສອງແມ່ນສຸມໃສ່ແກ້ໄຂບັນຫາເຮືອນຢູ່ ເພື່ອປະກອບສ່ວນຍົກສູງຊີວິດທາງດ້ານວັດຖຸໃຫ້ແກ່ກຳມະກອນ ແລະ ວຽກງານສຸດທ້າຍແມ່ນຍູ້ແຮງການສ້າງລະບຽບການດ້ານວັດທະນະທຳ, ກິລາ, ສາທາລະນະສຸກ, ການສຶກສາ, ປະກອບສ່ວນຍົກສູງຊີວິດທາງດ້ານຈິດໃຈ ແລະ ສຸຂະພາບໃຫ້ແກ່ຜູ້ອອກແຮງງານ. ນອກນີ້ ທ່ານ ຟ້າມມິງຈິງ ຍັງໄດ້ຕີລາຄາສູງ ກ່ຽວກັບເລື່ອງສະຫະພັນໃຫຍ່ແຮງງານ ສສ ຫວຽດນາມ ແລະ ລັດຖະບານໄດ້ເປັນເຈົ້າການສົມທົບກັນແກ້ໄຂບັນຫາຈຳ ເປັນດັ່ງກ່າວ ກ່ຽວກັບວຽກເຮັດງານທຳ, ລາຍຮັບ, ເຮືອນຢູ່, ພື້ນຖານໂຄງລ່າງດ້ານວັດທະນະທຳ, ສັງຄົມ, ສາທາລະນະສຸກ, ການສຶກສາ ແລະ ຊີວິດການເປັນຢູ່ຂອງກຳມະກອນຊາວຜູ້ອອກແຮງງານ. ສຳລັບກອງປະຊຸມຕີລາຄາໝາກຜົນ ການປະຕິບັດກົດລະບຽບ ກ່ຽວກັບການພົວພັນວຽກງານລະຫວ່າງລັດຖະບານ ແລະ ສະຫະພັນໃຫຍ່ແຮງງານ ສສ ຫວຽດນາມ, ວາງອອກໜ້າທີ່ສົມທົບວຽກງານປີ 2023 ແລະ ໄລຍະໃໝ່ໄດ້ຈັດຂຶ້ນ ໃນວັນທີ 1 ກຸມພານີ້.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
