ໂຮງໝໍມະໂຫສົດ ຈັດກອງປະຊຸມ ສະຫລຸບຜົນການເຄື່ອນໄຫວວຽກງານ ປະຈຳປີ 2022 ແລະ ຜ່ານແຜນການເຄື່ອນໄຫວປີ 2023 ໃນວັນທີ 30 ມັງກອນ 2023 ໂດຍການເປັນປະທານຂອງ ທ່ານ ດຣ ບຸນແຝງ ພູມມໄລສິດ ລັດຖະມົນຕີກະຊວງສາທາລະນະສຸກ, ທ່ານ ດຣ ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ມີອະດີດການນຳ ກະຊວງສາທາລະນະສຸກ ພ້ອມດ້ວຍພະນັກງານແພດໝໍ ເຂົ້າຮ່ວມ.
ທ່ານ ດຣ. ຊູຊາດ ວົງພະຈັນ ໄດ້ລາຍງານການເຄື່ອນໄຫວວຽກງານຂອງໂຮງໝໍມະໂຫສົດ ໃນ 1 ປີ ຜ່ານມາ, ຊຶ່ງໄດ້ສະແດງອອກໃຫ້ເຫັນເຖິງການນຳພາພະນັກງານປະຕິບັດ ວິໄສທັດຂອງໂຮງໝໍ ທີ່ໄດ້ພ້ອມກັນຜ່ານຜ່າເຮັດໜ້າທີ່ການເມືອງ ແລະ ໜ້າທີ່ວິຊາສະເພາະຂອງຕົນຕາມການມອບໝາຍຂອງການຈັດຕັ້ງ ໂດຍສະເພາະ ໃນດ້ານວິຊາການ ໄດ້ກວດ ແລະ ປິ່ນປົວຄົນເຈັບ ຢູ່ຫ້ອງກວດເຂດນອກໄດ້ 146.063 ເທື່ອຄົນ, ກວດສຸກເສີນ 54.932 ຄົນ, ຄົນເຈັບນອນ 15.256 ຄົນ, ຜ່າຕັດທັງໝົດ 5.543 ຄົນ, ເກີດລູກທັງໝົດ 2.283 ຄົນ, ສັກວັກຊິນທັງໝົດ 75.546 ຄົນ, ກວດລັງສີທັງໝົດ 49.492 ຄົນ. ນອກຈາກນີ້, ໂຮງໝໍມະໂຫສົດ ຍັງຖືເອົາວຽກງານສຳຄັນຂອງການສຶກສາອົບຮົມແນວຄິດຂອງພະນັກງານ, ຈັນຍາບັນແພດ, ຈັນຍາບັນພະຍາບານ, ໄດ້ປຸກລະດົມຂະບວນ ການແຂ່ງຂັນຮັກຊາດ ແລະ ພັດທະນາ, ປະຕິບັດວິໄສທັດຂອງໂຮງໝໍ ແລະ ນະໂຍບາຍ 5 ດີ 1 ພໍໃຈ ທີ່ກະຊວງສາທາລະນະສຸກ ວາງອອກເຂົ້າໃນວຽກງານຕົວຈິງ.
ໂອກາດນີ້, ທ່ານ ດຣ ບຸນແຝງ ພູມມໄລສິດ ຍັງໄດ້ເນັ້ນໃຫ້ພະນັກງານແພດໝໍ ໃຫ້ເອົາໃຈໃສ່ປະຕິບັດໜ້າທີ່ວຽກງານ ກໍຄື ການຈັດຕັ້ງປະຕິບັດແຜນງານສາທາລະນະສຸກ ການຫັນໂຮງໝໍກຸ້ມຕົນເອງໂດຍສະເພາະແມ່ນວຽກພັດທະນາການບໍລິການຂອງໂຮງໝໍໃຫ້ດີຂຶ້ນ.
ໃນກອງປະຊຸມຄັ້ງນີ້, ຍັງໄດ້ມອບຫລຽນຈຳປາເງິນ, ຈຳປາທອງ ແລະ ໃບຊົມເຊີຍ ໃຫ້ບັນດາແພດໝໍ ຜູ້ທີ່ມີຜົນງານດີເດັ່ນ ປະເພດ 1, 2, 3 ແລະ ບຸກຄົນດີເດັ່ນປະເພດ 1, 2, 3 ນຳອີກ.
