ຫ້ວຍຊາຍ ຍາດໄດ້ລາງວັນທີ 1 ການແຂ່ງຂັນຊ່ວງເຮືອຊາຍປະເພດ 30-35 ສີພາຍ 4 ປະເທດ ໄທ ຈີນ ແລະ ລາວ ເທສະການດອກງິ້ວບານ ຄັ້ງທີ 20 ປະຈຳປີ 2023 ເຊິ່ງການແຂ່ງຂັນຄັ້ງນີ້ມີນັກກີລາເຂົ້າ ຮ່ວມ 8 ທີມ.
ທ່ານ ບຸນທອງ ແສງສີກອງ ຫົວໜ້າຄະນະຄຸ້ມຄອງເຂດເສດຖະພິເສດສາມຫຼຽມຄຳ ກ່າວວ່າ ຈຸດປະສົງຂອງການຈັດງານຄັ້ງນີ້ເພື່ອອານຸຮັກວັດທະນະທໍາ ຮີດຄອງປະເພນີລາວອັນດີງາມໃຫ້ໄດ້ສືບຕໍ່ໄປເລື້ອຍໆ ເພື່ອສົ່ງເສີມການທ່ອງທ່ຽວຂອງເມືອງຕົ້ນເຜີ້ງໃນຊ່ວງງານເທດສະການດອກງິ້ວບານໃຫ້ມີຂະບວນ ການມ່ວນຊື່ນຫຼາຍຂຶ້ນ ສ້າງຄວາມສາມັກຄີ ຮັກແພງໃນໝູ່ຄະນະໃນທີມນັກກີລາກໍ່ຄືພໍ່ແມ່ປະຊາຊົນ ເພື່ອສ້າງຄວາມສາມັກຄີນັບແຕ່ຂັ້ນບ້ານ ບໍລິສັດ ເມືອງ ແຂວງຈົນເຖິງເພື່ອນບ້ານປະເທດລຸ່ມແມ່ນໍ້າຂອງທີ່ໃກ້ຄຽງໃຫ້ມີຄວາມຮັກແພງ ແລກປ່ຽນວັດ ທະນະທຳເຊິ່ງກັນ ແລະ ກັນ.
ການແຂ່ງຂັນຄັ້ງນີ້ມີຊ່ວງເຮືອຊາຍປະເພດ 30-35 ສີພາຍ ມີ 8 ທີມຄື ທີມເມືອງຕົ້ນເຜິ້ງ 1 ທີມ ເມືອງຕົ້ນເຜິ້ງ 2 ທີມ ເມືອງປາກທາ 1 ທີມເມືອງປາກທາ 2 ທີມເມືອງຫ້ວຍຊາຍ ທີມເມືອງແສນ ປະເທດໄທ ທີມຕົວແທນ ສປ ຈີນ ແລະ ທີມທະນາຄານພັດທະນາລາວ ໄລະຍະການແຂ່ງຂັນ 800 ແມັດ.
ຜ່ານການແຂ່ງທີມເມືອງຫ້ວຍຊາຍສາມາດຍາດໄດ້ລາງວັນທີ 1 ທີມເມືອງປາກທາ2 ໄດ້ລາງວັນທີ 2 ແລະ ລາງວັນ 3 ແມ່ນທີມເມືອງຕົ້ນເຜິ້ງ1 ສຳລັບທີມທີ່ໄດ້ລາງວັນທີ 1 ໄດ້ຮັບເງິນສົດ 150 ລ້ານກີບ ພ້ອມຂັນລາງວັນ ລາງວັນທີ 2 ເງິນສົດ 100 ລ້ານກີບ ພ້ອມຂັນລາງວັນ ລາງວັນທີ 3 ໄດ້ເງິນສົດ 50 ລ້ານກີບ ພ້ອມຂັນລາງວັນ ສ່ວນທີມທີ່ຕົກຮອບຈະໄດ້ຮັບລາງວັນຊົມເຊີຍທີມລະ15 ລ້ານກີບ.
ເທສະການດອກງິ້ວບານ ຄັ້ງທີ 20 ປະຈຳປີ 2023 ຈັດຂຶ້ນວັນທີ 26 ມັງກອນ 2023 ທີ່ທ່ານໍ້າດອນຊາວ (ເຂດເສດຖະພິເສດສາມຫຼຽມຄຳ) ເມືອງຕົ້ນເຜິ້ງ ແຂວງບໍ່ແກ້ວ ມີທ່ານ ຄຳແຍງ ຄອນໄຊຍະກິດ ເຈົ້າເມືອງຕົ້ນເຜິ້ງ ທ່ານ ບຸນທອງ ແສງສີກອງ ພ້ອມດ້ວຍຂະແໜງການກ່ຽວຂ້ອງ ແລະ ມວນຊົນເຂົ້າຮ່ວມ.
