ວິທະຍຸສາກົນ ແຫ່ງປະເທດຈີນ (CRI) ໄດ້ລາຍງານວ່າ: ວັນທີ 17 ມັງກອນນີ້, ຈີນໄດ້ເປີດເຜີຍສະພາບການພັດທະນາເສດຖະກິດແຫ່ງຊາດ ໃນປີ 2022. ຕາມສະຖິຕິສະແດງໃຫ້ເຫັນວ່າ: ໃນປີ 2022, ມູນຄ່າເພີ່ມຂອງອຸດສາຫະກຳໃນທົ່ວປະເທດຈີນ ມີເຖິງ 40.200 ຕື້ຢວນ, ມູນຄ່າເພີ່ມໃນອຸດສາຫະກຳການຜະລິດມີເຖິງ 33.500 ຕື້ຢວນ, ລ້ວນແຕ່ເປັນອັນດັບ 1 ຂອງໂລກ ເຊິ່ງສະແດງໃຫ້ເຫັນວ່າກຳລັງການຜະລິດໃນອຸດສາຫະກຳການຜະລິດຂອງຈີນໄດ້ເພີ່ມຂຶ້ນຢ່າງຫລວງຫລາຍ.
ລະດັບການພັດທະນາຂອງອຸດສາຫະກຳການບິນ ໄດ້ສ່ອງແສງໃຫ້ເຫັນເຖິງລະດັບກວມລວມດ້ານວິທະຍາສາດເຕັກໂນໂລຊີ ແລະ ອຸດສາຫະກຳການຜະລິດຂອງປະເທດໜຶ່ງ. ເວົ້າສຳລັບຈີນແລ້ວ, ຂະບວນການອອກແບບ ແລະ ຜະລິດເຮືອບິນ C919 ຢ່າງໄດ້ຕາມມາດຕະຖານ ກໍໄດ້ເຕັມໄປດ້ວຍຫົວຄິດປະດິດສ້າງ ແລະ ສິ່ງທ້າທາຍຕ່າງໆນາໆ. ຈີນ ໄດ້ສ້າງຕັ້ງໂຄງການເຮືອບິນໂດຍສານຂະໜາດໃຫຍ່ C919 ໃນປີ 2007 ແລະ C919 ທົດລອງການບິນໃນປີ 2017. ໃນຂະບວນການຄົ້ນຄວ້າຜະລິດ, ຈີນ ໄດ້ມີການບຸກທະລຸເຕັກນິກ 100 ກວ່າລາຍການ ເຊັ່ນ: ການອອກແບບເຄື່ອງຈັກເຮືອບິນແບບລວມສູນເຂົ້າກັນ, ເຕັກນິກຄວບຄຸມຢ່າງເປັນເຈົ້າການ ແລະ ອື່ນໆ.
ເຮືອບິນ C919 ແມ່ນເຮືອບິນໂດຍສານສາຍຫລັກຮຸ່ນໃໝ່ຂອງໂລກ ທີ່ຈີນ ຄົ້ນຄວ້າຜະລິດຕາມມາດຕະຖານການບິນທົ່ວໄປຂອງສາກົນ ແລະ ຈີນ ມີຊັບສິນທາງປັນຍາທັງໝົດ. ເດືອນກັນຍາປີ 2022, ພາຍຫລັງເຮືອບິນໂດຍສານຂະໜາດໃຫຍ່ C919 ໄດ້ສຳເລັດວຽກງານສຳຫລວດດ້ານການເໝາະສົມການບິນທຸກຢ່າງແລ້ວ, ໄດ້ຮັບໃບຢັ້ງຢືນຂະໜາດຈາກອົງການການບິນພົນລະເຮືອນຈີນ. ວັນທີ 9 ທັນວາ ປີ 2022, ບໍລິສັດການບິນ China Eastern ໄດ້ຮັບເຮືອບິນ C919 ລຳທຳອິດໃນຂອບເຂດທົ່ວໂລກ ເຊິ່ງໄດ້ຢ່ວງບາດກ້າວທຳອິດທີ່ເຮືອບິນໂດຍສານພົນລະເຮືອນຈີນ ປ້ອນເຂົ້າຕະຫລາດ. ວັນທີ 26 ທັນວາ ປີ 2022, ເຮືອບິນ C919 ຂອງບໍລິສັດການບິນ China Eastern ໄດ້ດຳເນີນການບິນເປັນເວລາ 100 ຊົ່ວໂມງ. ພາຍຫລັງ C919 ໄດ້ສຳເລັດການບິນ ຢືນຢັນຕໍ່ເສັ້ນທາງການບິນແລ້ວ, ຈະເລີ່ມບັນທຸກຜູ້ໂດຍສານທາງການຄ້າຢ່າງເປັນທາງການໃນລະດູບານໃໝ່ປີນີ້ ເຊິ່ງຈະເປັນຫລັກໝາຍປາຍທາງສຳຄັນອີກຢ່າງໜຶ່ງສຳລັບການພັດທະນາພາລະກິດເຮືອບິນໃຫຍ່ຂອງຈີນ. C919 ຂອງຈີນ ໄດ້ທຳລາຍການຜູກຂາດຂອງບໍລິສັດໂບອິງ ແລະ ບໍລິສັດແອບັດ ຕໍ່ເຮືອບິນໂດຍສານສາຍຫລັກໄລຍະກາງ, ແຕ່ກ່ອນ, ຍີ່ປຸ່ນ ແລະ ຣັດເຊຍ ລ້ວນແຕ່ເຄີຍທົດລອງທຳລາຍການຜູກຂາດດັ່ງກ່າວ, ແຕ່ບໍ່ໄດ້ປະສົບຜົນສຳເລັດ, ເທື່ອນີ້, ຈີນ ໄດ້ປະສົບຜົນສຳເລັດແລ້ວ.
ຕົວເລກຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ມາຮອດທ້າຍປີ 2022, ນັບລວມແລ້ວ, C919 ໄດ້ຮັບໃບສັ່ງຈອງ 1.035 ລຳຈາກລູກຄ້າ 32 ແຫ່ງ ຂອງເຢຍລະມັນ, ໄທ ແລະ ປະເທດອື່ນໆ ເຊິ່ງໄດ້ຫລາຍກວ່າໃບສັ່ງຈອງຂອງໂບອິງ ແລະ ແອບັດ ທີ່ບວກເຂົ້າກັນໃນປີ 2022.
ເມື່ອຫວນຄືນ 10 ປີຜ່ານມາ, ຜະລິດຕະພັນທີ່ມີລະດັບວິທະຍາສາດເຕັກໂນໂລຊີສູງ ຕ່າງໆຂອງຈີນ ໄດ້ປາກົດຕົວອອກເລື້ອຍໆ ລົດໄຟຄວາມໄວສູງຈີນ ໄດ້ຈາກຂັ້ນຕອນແລ່ນໄປທັນກັບໂລກ ຫັນມາເປັນນຳພາການພັດທະນາ ເຊິ່ງເຮັດໃຫ້ໂລກໄດ້ເຫັນຄວາມໄວຂອງຈີນ; ຂະໜາດອຸດສາຫະກຳຫຸ່ນຍົນອຸດສາຫະກຳຂອງຈີນ ໄດ້ເຕີບໂຕຢ່າງວ່ອງໄວ, ກໍໄດ້ຮັບການຕິດຕັ້ງຢ່າງຫລວງຫລາຍ, ຈຳນວນຫຸ່ນຍົນທີ່ຕິດຕັ້ງໃໝ່ຂອງຈີນ ໄດ້ເປັນສອງເທົ່າຂອງຈຳນວນທີ່ຕິດຕັ້ງໃນໂຮງງານທົ່ວທະວີບອາເມຣິກາ ແລະ ເອີຣົບ; ຍອດປະລິມານຈຳໜ່າຍລົດໃຊ້ພະລັງງານໃໝ່ຂອງຈີນ ໄດ້ເປັນອັນດັບ 1 ຂອງໂລກເປັນ 14 ປີລຽນຕິດ, ຈີນ ພວມນຳພາການປະຕິວັດລົດ ໃນຂອບເຂດທົ່ວໂລກ; ໃນງານເຕະບານຊິງຂັນໂລກ ທີ່ສິ້ນສຸດລົງໃນຫວ່າງກ່ອນນີ້ບໍ່ດົນ, ການຜະລິດຂອງຈີນ ໄດ້ເຫັນຢູ່ເລື້ອຍໆຢູ່ຕາມສະໜາມແຂ່ງຂັນບານເຕະ; ນອກນີ້, ຍັງມີຍານສຳຫລວດທະເລຊັ້ນເລິກ, ເຂື່ອນໄຟຟ້າປາຍເຮີ້ຖ່ານ, ລະບົບນຳທາງດ້ວຍດາວທຽມເປີຍໂຕ ແລະ ອື່ນໆ, ຜະລິດຕະພັນທີ່ມີລະດັບວິທະຍາສາດເຕັກໂນໂລຊີ ໄດ້ສ່ອງແສງໃຫ້ເຫັນວ່າກຳລັງການຜະລິດຂອງຈີນ ໄດ້ເພີ່ມຂຶ້ນຢ່າງຫລວງຫລາຍ, ຈີນ ພວມໄດ້ຈາກປະເທດທີ່ມີຂະໜາດການຜະລິດໃຫຍ່ ຫັນມາເປັນປະເທດທີ່ມີການຜະລິດທີ່ເຂັ້ມແຂງ.
