ໃນວັນທີ 8 ມັງກອນ 2023 ນີ້ ທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ໂຮງໝໍເມືອງສະໝາມໄຊ
ທ່ານ ນາງ ພູດອນ ຈູມມະລີ ກຳມະການພັກເມືອງ,ຮອງເຈົ້າເມືອງ ສະໝາມໄຊ ໄດ້ກ່າວສະແດງຄວາມຕ້ອນຮັບ ແລະ ລາຍງານການນໍາພາ-ຊີ້ນໍາ ພັດທະນາວຽກງານສາທາລະນະສຸກເມືອງ ໃນໄລຍະຜ່ານມາ ເຫັນວ່າມີການຂະຫຍາຍຕົວຢ່າງຕໍ່ເນື່ອງ, ປະຊາຊົນໄດ້ເຂົ້າເຖິງການບໍລິການດ້ານສາທາລະນະສຸກໂດຍພື້ນຖານ, ການປະຕິບັດຄາດໝາຍ 11 ຕົວຊີ້ວັດ, ສາມາດບັນລຸໄດ້ 10 ຕົວຊີ້ວັດ ແລະ ອັນພົ້ນເດັ່ນແມ່ນວຽກງານການໃຫ້ວັກຊີນກັນພະຍາດໂຄວິດ- 19 ເຂັມ1 ສາມາດປະຕິບັດໄດ້ 32,244 ຄົນ ເທົ່າກັບ 80%, ເຂັມ2 ປະຕິບັດໄດ້ 24,582 ຄົນ,ເທົ່າກັບ 61% ແລະ ປະກາດບ້ານຢຸດຕິການຖ່າຍຊະຊາຍໄດ້ທັງໝົດ 21 ບ້ານ,ເທົ່າກັບ 56,7% ຂອງບ້ານທັງໝົດ,ມອບໃບຢັ້ງຢືນໃຫ້ຄອບຄົວໃໝ່ ຈຳນວນ 11 ບ້ານ ພ້ອມນີ້ ທ່ານຮອງເຈົ້າເມືອງ ສະໝາມໄຊ ຍັງໄດ້ແຈ້ງໃຫ້ຮູ້ກ່ຽວກັບການກະກຽມຄວາມພ້ອມດ້ານຕ່າງໆ ພ້ອມສະເໜີໃຫ້ກະຊວງສາທາລະນະສຸກ ກໍ່ຄື ອົງການຈັດຕັ້ງສາກົນ ຊຸກຍູ້ຊ່ວຍເຫຼືອດ້ານຕ່າງໆເຂົ້າໃນການພັດທະນາຂະແໜງສາທາລະນະສຸກຂອງໃຫ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ເພື່ອຫັນການບໍລິການຮັກສາສຸຂະພາບທີ່ມີຄຸນນະພາບລົງສູ່ປະຊາຊົນຫຼາຍຂຶ້ນ.
ໂອກາດນີ້, ທ່ານ ດຣ ບຸນແຝງ ພູມມະໄລສິດ ກໍໄດ້ແຈ້ງຈຸດປະສົງໃນການມາເຄື່ອນໄຫວ ແລະ ເຮັດວຽກໃນຄັ້ງນີ້ ກໍເພື່ອເປັນການຢ້ຽມຢາມໂຮງໝໍເມືອງ ແລະ ຮັບຟັງການລາຍງານການເຄື່ອນໄຫວວຽກງານຂອງຂະແໜງສາທາລະນະສຸກເມືອງ ໃນໄລຍະຜ່ານມາ ໂດຍຊອກໃຫ້ເຫັນຜົນສໍາເລັດອັນພົ້ນເດັ່ນ ທີ່ຄວນເສີມຂະຫຍາຍ ແລະ ຈຸດອ່ອນ-ຂໍ້ຄົງຄ້າງ ເພື່ອຫາວິທີແກ້ໄຂ ແນໃສ່ເຮັດໃຫ້ການພັດທະນາວຽກງານສາທາລະນະສຸກ ກໍຄື ການບໍລິການດ້ານສາທາລະນະສຸກແກ່ປະຊາຊົນນັບມື້ມີຄຸນນະພາບສູງຂຶ້ນ.
#ພາບ - ຂ່າວ ບັງອອນ ສທຂ
#ມີເດຍລາວ#Attapeu
