ໃນວັນທີ 5 ມັງກອນ 2023 ຢູ່ທີ່ຫ້ອງປະຊຸມຊັ້ນສອງ ສະໂມສອນແຂວງສາລະວັນ ໄດ້ຈັດກອງປະຊຸມເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ4 ຂອງສະພາແຫ່ງຊາດ ຊຸດທີ IX ແລະ ການປຶກສາຫາລືບັນຫາທີ່ສໍາຄັນຮີບດ່ວນຈໍານວນໜຶ່ງເພື່ອຈະນໍາເຂົ້າໃນກອງປະຊຸມສະໄໝສາມັນ ເທື່ອທີ4 ຂອງສະພາປະຊາຊົນແຂວງສາລະວັນທີ່ຈະໄດ້ໄຂຂຶ້ນໃນມໍ່ໆນີ້ ໂດຍການເປັນປະທານຂອງ ທ່ານ ສີເຮັງ ຫອມສົມບັດ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ14 ແຂວງສາລະວັນ, ປະທານສະພາປະຊາຊົນແຂວງ , ມີທ່ານຄະນະປະຈໍາສະພາປະຊາຊົນແຂວງ, ບັນດາສະມາຊິກສະພາປະຊາຊົນແຂວງ, ຫົວໜ້າ-ຮອງພະແນກ, ຄະນະບໍລິຫານງານພັກເມືອງ, ອົງການການທຽບເທົ່າອ້ອມຂ້າງແຂວງກໍໄດ້ເຂົ້າຮ່ວມ.
#ໃນກອງປະຊຸມ ທ່ານ ສີເຮັງ ຫອມສົມບັດ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ14 ແຂວງສາລະວັນ, ປະທານສະພາປະຊາຊົນແຂວງສາລະວັນ ກໍໄດ້ລາຍງານຜົນສໍາເລັດໃນການເຂົ້າຮ່ວມປະຊຸມສະໄໝສາມັນ ເທື່ອທີ4 ຂອງສະພາແຫ່ງຊາດຊຸດທີ IX ເຊິ່ງໄດ້ຈັດຂຶ້ນໃນລະຫວ່າງວັນທີ 5-30 ທັນວາ 2022 ທີ່ຫ້ອງປະຊຸມສະພາແຫ່ງຊາດນະຄອນຫຼວງວຽງຈັນ, ໃນການດໍາເນີນກອງປະຊຸມແມ່ນໄດ້ຮັບຟັງການລາຍງານ, ພິຈາລະນາເອົາບັນດາເນືອໃນທີ່ສໍາຄັນເປັນຕົ້ນ ບົດລາຍງານການເຄື່ອນໄຫວວຽກງານພົ້ນເດັ່ນປະຈໍາປີ 2022 ແລະ ທິດທາງແຜນການ ໃນປີ 2023 ຂອງລັດຖະບານ, ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດປະຈໍາປີ 2022 ແລະ ທິດທາງ 2023, ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດປີ 2021; ການຈັດຕັ້ງປະຕິບັດແຜນງົບປະມານແຫ່ງລັດປີ 2022ແລະ ແຜນງົບປະມານແຫ່ງລັດປີ 2023, ບົດລາຍງານຂອງລັດຖະບານກ່ຽວກັບການປະຕິບັດແຜນເງິນຕາປະຈໍາປີ 2022 ແລະ ແຜນການປີ 2023, ພິຈາລະນາຮັບຮອງເອົາການແຕ່ງຕັ້ງນາຍົກລັດຖະມົນຕີແຫ່ງ ສປປ ລາວຜູ້ໃໝ່, ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ ປະຈໍາປີ 2022 ແລະ ແຜນການປະຈໍາປີ 2023, ລາຍງານກ່ຽວກັບການສ້າງວິຊາຊີບ, ການພັດທະນາສີມືແຮງງານ ແລະ ວຽກເຮັດງານທໍາໃຫ້ປະຊາຊົນເພື່ອແກ້ໄຂບັນຫາການວ່າງງານ, ບົດລາຍງານຂອງອົງການກວດສອບແຫ່ງລັດກ່ຽວກັບການຈັດຕັ້ງປະຕິບັດວຽກງານປະຈໍາປີ 2022 ແລະ ແຜນເຄື່ອນໄຫວວຽກງານປະຈໍາປີ 2023, ບົດລາຍງານຜົນການກວດສອບສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2021, ບົດລາຍງານອົງການກວດກາແຫ່ງລັດກ່ຽວກັບການຈັດຕັ້ງປະຕິບັດວຽກງານປະຈໍາປີ 2022 ແລະ ແຜນການປີ 2023, ບົດລາຍງານຜົນການກວດກາ ຕາມຜົນກວດສອບປີ 2020, ບົດລາຍງານຂອງສານປະຊາຊົນສູງສຸດກ່ຽວກັບການຈັດຕັ້ງປະຕິບັດວຽກງານປະຈໍາປີ 2022 ແລະ ແຜນເຄື່ອນໄຫວວຽກງານປະຈໍາປີ 2023, ພິຈາລະນາຮັບຮອງເອົາການສ້າງ ແລະ ປັບປຸງກົດໝາຍຈໍານວນ 12 ສະບັບໃນນັ້ນມີ: ກົດໝາຍສ້າງໃໝ່ມີ 3 ສະບັບ, ກົດໝາຍປັບປຸງ 9 ສະບັບ, ບົດລາຍງານຂອງຄະນະປະຈໍາສະພາແຫ່ງຊາດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2022 ແລະ ແຜນເຄື່ອນໄຫວປະຈໍາປີ 2023 ແລະ ຜົນການຕິດຕາມ, ກວດກາຂອງສະພາແຫ່ງຊາດກ່ຽວກັບການຈັດຕັ້ງປະຕິບັດວາລະແຫ່ງຊາດ; ບົດລາຍງານຂອງຄະນະປະຈໍາສະພາແຫ່ງຊາດກ່ຽວກັບການປັບປຸງແຜນການສ້າງ ແລະ ປັບປຸງກົດໝາຍຂອງສະພາແຫ່ງຊາດຊຸດທີ IX ແຕ່ປີ 2023-2025 ນອກຈາກນີ້ສະພາແຫ່ງຊາດຍັງໄດ້ສະເໜີໃຫ້ 19 ພາກສ່ວນຂຶ້ນຊີ້ແຈງຕໍ່ຄໍາຊັກຖາມກ່ຽວກັບບັນຫາທີ່ພົ້ນເດັ່ນຂອງສັງຄົມ, ກອງປະຊຸມໄດ້ດໍາເນີນເປັນເວລາ 20 ວັນ.
———————————————————–
ໂດຍ: ກິນດາວັນ ອ້ວນນາຄູ
