ໃນວັນທີ 28 ຕຸລາ 2022, ກອງພັນໃຫຍ່11 ໄດ້ຈັດຕັ້ງກວດກາຄັດເລືອກທະຫານໃໝ່ປະຈຳປີ 2022 ໂດຍການເປັນປະທານຂອງ ສະຫາຍ ພັນເອກ ກົງທອງ ສຸຂະວົງ ເລຂາຄະນະພັກ, ຫົວໜ້າການທະຫານກອງພັນໃຫຍ່11, ມີຄະນະພັກ – ຄະນະບັນຊາ, ພ້ອມດ້ວຍບັນດາອະນຸກຳມຳການ, ພາກສ່ວນທີ່ກ່ຽວຂ້ອງ ແລະ ຜູ້ທີ່ມາສະໝັກເປັນທະຫານໃໝ່ເຂົ້າຮ່ວມ.
ສະຫາຍ ພັນຕີ ຄຳຫຼ້າ ວິຄຳພັນ ຊ່ວຍວຽກຂະແໜງກຳລັງພົນ ພະແນກເສນາກອງພັນໃຫຍ່ 11 ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງອະນຸກໍາມະການກວດກາຄັດເລືອກເອົາທະຫານໃໝ່ຊຸດທີ VIII ອີງຕາມຄໍາສັ່ງຂອງກົມໃຫ່ຍເສນາທິການກອງທັບ ສະບັບເລກທີ 1991/ກສນ, ລົງວັນທີ 04/08/2022 ວ່າດ້ວຍການຄັດເລືອກເອົາທະຫານໃໝ່ ປະຈໍາປີ 2022, ອີງຕາມແຈ້ງການຂອງກົມກຳລັງພົນ ກົມໃຫ່ຍເສນາທິການກອງທັບ ສະບັບເລກທີ 3189/ກລພ, ລົງວັນທີ 10/08/2022, ການກວດກາຄັດເລືອກເອົາທະຫານໃນຄັ້ງນີ້. ແມ່ນກວດກາທາງດ້ານມາດຖານເງື່ອນໄຂຜູ້ທີ່ສະໝັກເປັນທະຫານ, ຕ້ອງເປັນຄົນລາວ, ສັນຊາດລາວ, ອາຍຸປະມານ 18-30 ປີ ການສຶກສາແມ່ນຕ້ອງຈົບມັດທະຍົມຕອນປາຍຂຶ້ນໄປ, ທາງດ້ານສຸຂະພາບຕ້ອງແຂງແຮງດີ, ບໍ່ສັກລາຍ, ບໍ່ບ່ອງຫູ, ເພດຍິງບໍ່ບ່ອງຫູຫຼາຍ ຫຼື ສັນຍາກຳຕ່າງໆ, ເພດຊາຍລວງສູງແມ່ນ1,60 ແມັດຂຶ້ນນໍ້າໜັກ 60 ກິໂລ, ເພດຍິງລວງສູງ 1,50 ແມັດຂຶ້ນນ້ຳໜັກ 50 ກິໂລ ສ່ວນນໍ້າໜັກບໍ່ໃຫ້ຫຼຸດ ຫຼື ເກີນ ແລະ ຄວາມເປັນເພດຕ້ອງຈະແຈ້ງ ຊາຍແທ້ – ຍິງແທ້.
ໂອກາດນີ້ ສະຫາຍ ພັນເອກ ກົງທອງ ສຸຂະວົງ ໄດ້ໂອ້ລົມກັບບັນສະຫາຍທີ່ມາສະໝັກທະຫານໃໜ່ໃຫ້ມີຄວາມອົດທົນ, ອຸ່ນອ່ຽງທຸ່ນທ່ຽງ, ປະຕິບັດຕາມລະບຽບຂອງຂັ້ນເທິງຢ່າງເຂັ້ມງວດ ແລະ ຍັງໄດ້ເນັ້ນໜັກໃຫ້ຄະນະກຳມະການກວດສອບຈັດຕັ້ງປະຕິບັດໜ້າທີ່ຂອງຕົນດ້ວຍຄວາມເປັນທຳ ແລະ ຖືກຕ້ອງໂປ່ງໃສພ້ອມທັງປະຕິບັດຕາມລະບຽບຫຼັກການຂອງກອງທັບ.ວາງອອກຢ່າງເຂັ້ມງວດ.
ຂ່າວ-ພາບ: ໄລບອຍ ຈັນທະມາດ
