ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ກອງທຶນເງິນຕາສາກົນ (IMF) ໄດ້ເປີດເຜີຍບົດລາຍງານການຄາດຄະເນການຂະຫຍາຍຕົວທາງດ້ານເສດຖະກິດຂອງອາຊີຢູ່ທີ່ 4% ໃນປີນີ້ ແລະ 4,3% ໃນປີໜ້າ ຫຼຸດລົງ 0,9% ແລະ 0,8% ຕາມລຳດັບ ຈາກການຄາດຄະເນເມື່ອເດືອນເມສາທີ່ຜ່ານມາ ຊຶ່ງສວນທາງກັບສະຖານະການໃນພາບລວມເມື່ອປີທີ່ຜ່ານມາ ຊຶ່ງເສດຖະກິດຂອງອາຊີຂະຫຍາຍຕົວ 6,5% ຕາມການຄາດຄະເນຂອງ IMF.
IMF ຊີ້ໃຫ້ເຫັນວ່າ ເຖິງແມ່ນວ່າການແຜ່ລະບາດຂອງພະຍາດໂຄວິດ-19 ມີທ່າອ່ຽງຜ່ອນຄາຍລົງ ແຕ່ທົ່ວພາກພື້ນກຳລັງປະເຊີນກັບແຮງກົດດັນຄັ້ງໃໝ່ຈາກນະໂຍບາຍທາງດ້ານການເງິນຈາກທະນາຄານກາງຫຼາຍປະເທດ ເພື່ອຫວັງຄວບຄຸມອັດຕາເງິນເຟີ້ທີ່ຍັງຄົງເພີ່ມສູງຂຶ້ນ ແລະ ຄວາມຕ້ອງການທີ່ຫຼຸດລົງຢ່າງເກີນຄາດໝາຍ ໂດຍສະເພາະຢ່າງຍິ່ງແມ່ນພາວະການຫົດຕົວລົງຂອງເສດຖະກິດຈີນ ແລະ ການທີ່ລັດຖະບານຈີນໃຊ້ມາດຕະການຄວບຄຸມພະຍາດໂຄວິດ-19 ຢ່າງເຄັ່ງຄັດໃນລະດັບສູງສຸດ. ທັງນີ້, IMF ຍັງໄດ້ຄາດຄະເນການຫຍາຍຕົວຂອງເສດຖະກິດຈີນ ຊຶ່ງມີຂະໜາດໃຫຍ່ເປັນອັນດັບທີ 2 ຂອງໂລກ ແລະ ອັນດັບທີໜຶ່ງຂອງທະວີບອາຊີ ວ່າຈະຂະຫຍາຍຕົວ 3,2% ໃນປີນີ້ ຫຼຸດລົງ 1,2% ເມື່ອທຽບກັບການຄາດຄະເນໃນເດືອນເມສາທີ່ຜ່ານມາ ແລະ ຖືວ່າຫຼຸດລົງຫຼາຍເມື່ອທຽບກັບສະຖິຕິການຂະຫຍາຍຕົວທາງດ້ານເສດຖະກິດຂອງຈີນທີ່ສູງເຖິງ 8,1% ເມື່ອປີທີ່ຜ່ານມາ ສ່ວນທິດທາງການຂະຫຍາຍຕົວຂອງເສດຖະກິດຈີນໃນປີ 2023 ແລະ 2024 ໂດຍອີງຕາມການວິເຄາະຂອງ IMF ຈະຢູ່ທີ່ 4,4% ແລະ 4,5% ຕາມລຳດັບ.
