ສະຖາບັນການເມືອງ ແລະ ການປົກຄອງແຫ່ງຊາດ ໄດ້ເປີດຊຸດຝຶກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດ ໃຫ້ແກ່ເລຂາພັກເມືອງ ແລະ ຄະນະປະຈຳພັກເມືອງ ໃນຂອບເຂດທົ່ວປະເທດ ຊຸດທີ 5 ຂຶ້ນໃນວັນທີ 17 ຕຸລາ 2022 ທີ່ຜ່ານມານີ້ ເພື່ອສ້າງຄວາມຮັບຮູ້ຢ່າງເປັນລະ ບົບ ກ່ຽວກັບການໝູນໃຊ້ທິດສະດີ ມາກ-ເລນິນ, ທິດສະດີການເມືອງ ແລະ ການບໍລິຫານຄຸ້ມຄອງລັດ, ການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຄັ້ງທີ 11, ແຜນຍຸດທະສາດ ແລະ ວຽກງານຈຸດສຸມ ທີ່ໄດ້ກຳນົດໄວ້ໃນແຜນພັດທະນາ ເສດຖະກິດ-ສັງຄົມ ແຫ່ງຊາດ ຄັ້ງທີ 9. ໃຫ້ກຽດເຂົ້າຮ່ວມຂອງ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານ ນາງ ບຸນມີ ຈຸນລະຈັກ ຮອງຫົວໜ້າສະຖາບັນການເມືອງ ແລະ ການປົກຄອງ ແຫ່ງຊາດໄດ້ກ່າວວ່າ: ຈຸດປະສົງໃນການຈັດຝຶກອົບຮົມໃນຄັ້ງນີ້ ເພື່ອແນໃສ່ໃຫ້ເລຂາພັກເມືອງ, ຄະນະປະຈໍາພັກເມືອງ ປະຕິບັດແບບແຜນນໍາພາ-ຄຸ້ມຄອງໃຫ້ເປັນເອກະພາບ ທາງດ້ານແນວຄິດ-ການເມືອງ, ປະຕິບັດຢ່າງເຂັ້ມງວດບັນດາຫລັກການພື້ນຖານຂອງພັກ, ເພີ່ມທະວີການຕິດຕາມ, ກວດກາ, ການປະເມີນຜົນ ແລະ ການສະຫລຸບລາຍງານ ການຈັດຕັ້ງປະຕິບັດວຽກງານທີ່ຕົນຮັບຜິດຊອບ, ພ້ອມປັບປຸງແຜນການ ເຄື່ອນໄຫວແຕ່ລະໄລຍະ ໃຫ້ສອດຄ່ອງກັບແຜນພັດທະນາ ເສດຖະກິດ-ສັງຄົມ ແຫ່ງຊາດ, ຍົກສູງຄວາມສາມາດ ນຳພາ-ຊີ້ນຳ, ເຮັດວຽກງານແນວຄິດ-ການເມືອງ ໃຫ້ປະຊາຊົນພາຍໃນເມືອງຂອງຕົນ ມີຄວາມສາມັກຄີ ເປັນເອກະພາບຢ່າງໜັກແໜ້ນ, ພັດທະນາຊີວິດການເປັນຢູ່ດີຂຶ້ນ ຕາມຄາດໝາຍສູ້ຊົນທີ່ໄດ້ກໍານົດໄວ້ແຕ່ລະໄລຍະ.
ສໍາລັບ ດ້ານເນື້ອໃນທີ່ນຳມາຝຶກອົບຮົມ ໄດ້ແບ່ງອອກເປັນ 2 ພາກຄື: ພາກທິດສະດີການເມືອງ-ການປົກຄອງ ປະກອບມີ 18 ຫົວຂໍ້ ແລະ ພາກທິດສະດີການບໍລິຫານຄຸ້ມຄອງລັດ ປະກອບມີ 8 ຫົວຂໍ້ ເຊິ່ງມີສຳມະນາກອນເຂົ້າຮ່ວມທັງໝົດ 50 ທ່ານ ແລະ ຈະໄດ້ດຳເນີນການຝຶກອົບຮົມຄັ້ງແຕ່ວັນທີ 17 ຕຸລາ ຫາ 4 ພະຈິກ 2022 ຈຶ່ງຈະສໍາເລັດ.
ຂ່າວ: ສຸກສະຫວັດ
ຂໍ້ມູນ: ລິນດາ
