ວິທະຍຸກະຈາຍສຽງຫວຽດນາມລາຍງານວ່າ: ວັນທີ 12 ກັນຍາ ຜ່ານມາ, ຢູ່ ນະຄອນຫຼວງ ພະນົມເປັນ, ປະເທດ ກຳປູເຈຍ, ໄດ້ຈັດພິທີເປີດເວທີປາໄສຄູ່ຮ່ວມມື ແລະ ການນຳ ອາຊຽນ 2022, ດ້ວຍຫົວຂໍ້: ຮ່ວມມືເພື່ອອາຊຽນທີ່ເຊື່ອມໂຍງ ແລະ ມີຄວາມຮັບຜິດຊອບ.
ຂ່າວລະບຸວ່າ: ສົມເດັດ ຮຸນແຊນ ນາຍົກລັດຖະມົນຕີ ກຳປູເຈຍ ເນັ້ນໜັກວ່າ: ດ້ວຍຖານະເປັນປະທານອາຊຽນ 2022, ກຳປູເຈຍ ໄດ້ຕັ້ງໜ້າສຸມໃສ່ເປີດກວ້າງ ແລະ ເພີ່ມທະວີການພົວພັນຮ່ວມມື ແລະ ຄູ່ຮ່ວມມືໃນທຸກຮູບແບບ ແລະ ທຸກຂົງເຂດ ຄື: ເສດຖະກິດ – ສັງຄົມ, ການຄ້າ, ການລົງທຶນ ແລະ ການເມືອງ ກັບບັນດາປະເທດ ທີ່ມີການພົວພັນມິດຕະພາບ, ບັນດາຄູ່ຮ່ວມມືພັດທະນາ ແລະ ປະຊາຄົມສາກົນ, ພິເສດແມ່ນຜ່ານການຈັດຕັ້ງ, ການໂອ້ລົມສົນທະນາທີ່ມີການເຂົ້າຮ່ວມຂອງທຸກຝ່າຍທີ່ກ່ຽວ ຂ້ອງ.
ກຳປູເຈຍ ມີຄວາມຫວັງຢາກເຫັນພາກພື້ນ ອາຊຽນ ກໍ່ຄືທົ່ວໂລກ ມີການດຳລົງຊີວິດໃນສັນຕິພາບຢ່າງຍາວນານ, ມີສະຖຽນລະພາບ ແລະ ພັດທະນາ ວັດທະນາຖາວອນ, ດ້ວຍຄວາມເຄົາລົບອະທິປະໄຕຂອງແຕ່ລະປະເທດ, ສອດຄ່ອງກັບກົດໝາຍສາກົນ, ພິເສດແມ່ນກົດບັດ ສປຊ, ເຂົ້າຮ່ວມບັນດາກົນໄກຫຼາຍຝ່າຍອີງໃສ່ການໂອ້ລົມສົນທະນາ ແລະ ພ້ອມກັນພະຍາຍາມຮັບມືກັບບັນດາສິ່ງທ້າທາຍດ້ວຍສັນຕິວິທີ, ເປີດເຜີຍ, ເຂົ້າໃຈ ແລະ ອົດທົນ.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
