ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ຄານນີ ວິກນາຣາຈາ (Kanni WIGNARAJA) ຜູ້ອໍານວຍການຫ້ອງການປະຈຳພາກພື້ນອາຊີ-ປາຊີຟິກ ຂອງອົງການສະຫະປະຊາຊາດ ເພື່ອການພັດທະນາ (UNDP) ພ້ອມດ້ວຍຄະນະ ໃນວັນທີ 5 ກັນຍາ ຜ່ານມາ ທີ່ສຳນັກງານນາຍົກລັດຖະມົນຕີ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 4-8 ກັນຍາ 2022.
ການພົບປະໃນຄັ້ງນີ້ ໄດ້ດໍາເນີນໄປດ້ວຍບັນຍາກາດທີ່ດີ ໃນນັ້ນ, ໄດ້ປຶກສາຫາລືກັນກ່ຽວກັບ ຂອບການຮ່ວມມື ລະຫວ່າງ ສປປ ລາວ ແລະ ອົງການ ສປຊ ເວົ້າລວມ, ເວົ້າສະເພາະ ລະຫວ່າງ ສປປ ລາວ ແລະ UNDP ໂດຍສະເພາະການສະໜັບສະໜູນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ, ວາລະ 2030 ເພື່ອການພັດທະນາ ແລະ ເປົ້າໝາຍການພັດທະນາແບບຍືນຍົງ (ປພຍ ຫຼື SDGs) ໂດຍຜ່ານການຈັດຕັ້ງປະຕິບັດແຜນງານ, ໂຄງການ ແລະ ກິດຈະກຳຕ່າງໆ ຕະຫຼອດໄລຍະຜ່ານມາ.
ທ່ານຮອງນາຍົກລັດຖະມົນຕີ ໄດ້ຕີລາຄາສູງຕໍ່ການມາຢ້ຽມຢາມ ຂອງທ່ານ ນາງ ຄານນີ ວິກນາຣາຈາ ເປັນການມາຢ້ຽມຢາມ ສປປ ລາວ ຄັ້ງທໍາອິດ ຊຶ່ງເປັນການຢັ້ງຢືນເຖິງ ຄວາມເອົາໃຈໃສ່ ແລະ ການໃຫ້ຄວາມສຳຄັນ ຕໍ່ກັບການຮ່ວມມືລະຫວ່າງ ອົງການ ສປຊ ເພື່ອການພັດທະນາ ແລະ ສປປ ລາວ ຕະຫຼອດໄລຍະທີ່ຜ່ານມາ. ພ້ອມກັນນັ້ນ, ທ່ານຍັງໄດ້ສະແດງຄວາມຂອບໃຈຢ່າງຈິງໃຈ ຕໍ່ອົງການ UNDP ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະ ແຜນການຮ່ວມມືລະຫວ່າງ ລັດຖະບານ ສປປ ລາວ ແລະ ອົງການ UNDP ໃນດ້ານການພັດທະນາໃນໄລຍະ ປີ 2017-2021 ໂດຍມີມູນຄ່າປະມານ 103.309.000 ໂດລາ ແລະ ສໍາລັບສົກປີ 2022-2026 ງົບປະມານທີ່ຄາດຄະເນໄວ້ ມີປະມານ 87.695.000 ໂດລາ, ອັນຈະເປັນການປະກອບສ່ວນທີ່ສໍາຄັນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຂອງ ສປປ ລາວ, ລວມທັງການປະກອບສ່ວນອັນສຳຄັນໃນການແກ້ໄຂຄວາມທຸກຍາກ, ຂະບວນການຈັດກອງປະຊຸມໂຕະ ມົນ, ວຽກງານເກັບກູ້ລະເບີດບໍ່ທັນແຕກທີ່ຕົກຄ້າງ, ວຽກງານປັບປຸງບູລະນະການປົກຄອງ, ການສ້າງຄວາມເຂັ້ມແຂງ ໃຫ້ແກ່ອົງການນິຕິບັນຍັດ ແລະ ອື່ນໆ.
ທ່ານຜູ້ອຳນວຍການຫ້ອງການ UNDP ປະຈຳພາກພື້ນອາຊີ-ປາຊີຟິກ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ພ້ອມທັງສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດ ແລະ ຄວາມຄືບໜ້າໃນຫຼາຍດ້ານ ຂອງລັດຖະບານລາວ ໃນການພັດທະນາປະເທດ ກໍຄືການຈັດຕັ້ງປະຕິບັດວາລະ 2030 ແລະ ເປົ້າໝາຍການພັດທະນາຂອງສາກົນ ໂດຍສະເພາະການເຊື່ອມສານ ປພຍ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ການກະກຽມນຳພາປະເທດຫຼຸດພົ້ນອອກຈາກສະຖານນະພາບປະເທດດ້ອຍພັດທະນາ ລວມທັງວຽກງານອື່ນໆ ຊຶ່ງເປັນແບບຢ່າງອັນດີໃຫ້ແກ່ຫຼາຍປະເທດ. ອີງໃສ່ຜົນສຳເລັດທີ່ຍາດມາໄດ້ນັ້ນ, ທ່ານ ນາງ ຄານນີ ວິກນາຣາຈາ ໄດ້ສະແດງຄວາມເຊື່ອໝັ້ນວ່າ ສປປ ລາວ ຈະສາມາດນຳພາປະເທດຊາດບັນລຸເປົ້າໝາຍຕ່າງທີ່ກ່າວມານັ້ນໄດ້ຢ່າງສຳເລັດຜົນ.
( ຂ່າວ: ກະຊວງການຕ່າງປະເທດ, ພາບ: ແສງຈັນ)
