ບ້ານກໍນ້ອຍ ເປັນຫນື່ງໃນ 38 ບ້ານຂອງ ເມືອງ ໄຊ ແລະ ເປັນຫນຶ່ງໃນ 69 ບ້ານຂອງແຂວງອຸດົມໄຊທີ່ໄດ້ຮັບຜົນກະທົບຈາກໄພນໍ້າຖ້ວມໃນວັນທີ 26 ສິງຫາຜ່ານມາຈາກເຫດການພາຍຸມາອອນພັດຖະຫລົ່ມເຮັດໃຫ້ປະຊາຊົນເກືອບ 50 ຫລັງຄາເຮືອນໄດ້ຮັບຄວາມເສຍຫາຍ, ເຮືອນຊານ,ໄຮ່ນາຮົ້ວສວນ ແລະ ສັດລ້ຽງ ໄດ້ຮັບຄວາມເສຍຫາຍ ໃນນີ້ຫນັກຫນ່ວງກວ່າຫມູ່ມີ 3 ຄອບຄົວທີ່ຖືກນໍ້າໄຫລຊຸເຮືອນເພພັງໄຫລໄປກັບນໍ້າ.
ທ່ານ ຄໍາໃສ ອິນທະນາມ ນາຍບ້ານໆກໍນ້ອຍ ເມືອງໄຊ ແຂວງອຸດົມໄຊໃຫ້ຮູ້ວ່າ: ຫັງຈາກຖືກນໍ້າຖ້ວມ, ປະຊາຊົນພາຍໃນບ້ານພ້ອມດ້ວຍກໍາລັງທະຫານຈາກກອງບັນຊາການທະຫານເມືອງທີ່ເຂົ້າໄປໃຫ້ການຊ່ວຍເຫລືອ ໄດ້ເລັ່ງຂົນຍ້າຍເຄື່ອງຂອງທີ່ຈໍາເປັນຈາກບ່ອນຕໍ່າໄປໄວ້ບ່ອນສູງດ້ວຍຄວາມລໍາບາກຈົນສໍາເລັດເປັນສ່ວນຫລາຍ ແລະ ສ່ວນທີ່ເອົາບໍ່ທັນກໍ່ຖືກໄຫລໄປກັບນໍ້າ ແລະ ມາຮອດປະຈຸບັນນີ້ ການສ້ອມແປງທີ່ຢູ່ອາໃສທີ່ເປ່ເພເສຍຫາຍແມ່ນສໍາເລັດແລ້ວ 85 ສ່ວນຮ້ອຍ, ຂະນະທີ່ການຊ່ວຍເຫລືອສຸກເສີນ ເປັນຕົ້ນ: ເຂົ້າສານອາຫານແຫ້ງ, ເຄື່ອງບ່ອນນອນ, ເຄື່ອງໄຊ້ໃນຄົວເຮືອນ ແລະ ເງິນສົດຈໍານວນຫນຶ່ງ ກໍ່ໄດ້ຮັບການຊ່ວຍເຫລືອຈາກພາກລັດ ແລະ ສັງຄົມແລ້ວ.
ນາຍບ້ານໆກໍນ້ອຍຍັງໃຫ້ຮູ້ຕື່ມວ່າ: ນໍ້າຖ້ວມຄັ້ງນີ້ ເປັນຄັ້ງທີ່ຮ້າຍແຮງທີ່ສຸດໃນຮອບ 30 ກວ່າປິທິ່ຜ່ານມາ ນອກຈາກທີ່ຢູ່ອາໃສໄດ້ຮັບຄວາມເສຍຫາຍຈາກໄພນໍ້າຖ້ວມແລ້ວ ຍັງມີເນື້ອທີ່ທໍາການຜະລິດຂອງປະຊາຊົນຈໍານວນຫນຶ່ງໄດ້ຮັບຄວາມເສຍຫາຍ ເປັນຕົ້ນເນື້ອທີ່ນາ, ເນຶ້ອທີ່ສວນ, ສັດລ້ຽງ ແລະ ຊົນລະປະທານ ໄດ້ຮັບຄວາມເສຍຫາຍ ແລະ ປະຈຸບັນນີ້ຍັງຢູ່ໃນໄລຍະປະເມີນຄວາມເສຍຫາຍຕົວຈິງ.
ສໍາລັບເມືອງໄຊເຊິ່ງເປັນຫນຶ່ງໃນ 3 ເມືອງຂອງແຂວງອຸດົມໄຊທີ່ໄດ້ຮັບຜົນກະທົບຈາກໄພນໍ້າຖ້ວມມີ 38 ບ້ານ 180 ກວ່າຫລັງຄາເຮືອນ ລວມມີ 9,500 ກວ່າຄົນ, ມີເຮືອນຖືກນໍ້າຊຸໄຫລ 5 ຫລັງ, ດິນເຈື່ອນທັບຖົມ 3 ຫລັງ, ເຮືອນເປ່ເພເຄື່ອງຂອງເສຍຫາຍຫລາຍກວ່າ 110 ຫລັງ.
