ພາຍຫຼັງເກີດມີຝົນຕົກເປັນເວລາຫຼາຍຊົ່ວໂມງຕິດຕໍ່ກັນ ເຮັດໃຫ້ນໍ້າກໍ ນໍ້າມາວ ປະລິມານນໍ້າສູງ ພ້ອມທັງເກີດມີນໍ້າປ່າໄຫຼສຸແຮງ ເຮັດໃຫ້ມີນໍ້າອັ່ງ ນໍ້າຖ້ວມ ດິນເຈື່ອນຢູ່ແຂວງອຸດົມໄຊ ໃນວັນທີ 26 ສິງຫາ 2022 ທີ່ຜ່ານມານີ້ ເຮັດໃຫ້ເຮືອນຊານບ້ານຊອງ, ລົດລ່າງພາຫະນະ, ຖະໜົນຫົນທາງ ພື້ນທີ່ທຳການຜະລິດ ລວມເຖິງໄຮ່ ນາ ຮົ້ວສວນ, ສັດລ້ຽງ ຂອງພໍ່ແມ່ປະຊາຊົນ ຖືກນໍ້າເຊາະໄຫຼເສຍຫາຍເປັນຈຳນວນມະຫາສານ
ໃນຕອນເຊົ້າຂອງວັນທີ 3 ກັນຍາ 2022 ນີ້, ສະຫາຍ ພົນຈັດຕະວາ ຄໍາຢີນ ແສງສຸລີ ກໍາມະການປະຈຳພັກແຂວງ ເລຂາຄະນະພັກ ຫົວໜ້າການເມືອງ ກອງບັນຊາການ ທະຫານແຂວງອຸດົມໄຊ ພ້ອມດ້ວຍພະແນກການທີ່ກ່ຽວຂ້ອງ ໄດ້ນຳເອົາເຄື່ອງຊ່ວຍເຫລືອເປັນເງິນສົດຈຳນວນ 30.000.000 ກີບ ແລະ ເຂົ້າສານ ຈຳນວນ 3 ໂຕນ ລວມມູນຄ່າເປັນເງິນທັງໝົດ 60,000,000 ກີບ ເພື່ອນຳໄປມອບໃຫ້ພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນຄັ້ງນີ້ ພິທີມອບ-ຮັບ ຢູ່ທີຈຸດຮັບເຄືອງບໍລິຈາກ ພະແນກການເງິນແຂວງອຸດົມໄຊ, ຕ່າງໜ້າກ່າວຮັບໂດຍ ທ່ານ ປອ ສຸລິຍາ ສຸພິທັກ ກຳມະການພັກແຂວງ ຫົວໜ້າພະແນກການເງິນແຂວງອຸດົມໄຊພ້ອມດ້ວຍຄະນະຮັບຜິດຊອບ ທັງນີ້ກໍ່ເພື່ອເປັນການແບ່ງເບົາຄວາມທຸກ ແລະ ເປັນກຳລັງໃຈໃຫ້ແກ່ພໍ່ແມ່ປະຊາຊົນໃນຍາມວິກິດ ໃຫ້ມີກຳລັງໃຈ ຜ່ານວິກິດຄັ້ງນີ້ໄປໄດ້.
