ເມື່ອບໍ່ດົນມານີ້, ພະແນກສຶກສາທິການ ແລະ ກິລາ (ສສກ) ແຂວງສະຫວັນນະເຂດ ຮ່ວມກັບ ສະຫະພັນກິລາບານສົ່ງແຂວງ ຈັດກິດຈະກຳການແຂ່ງຂັນກິລາບານສົ່ງ (ຊາຍ-ຍິງ) ທົ່ວແຂວງ ຊີງຂັນທ່ານຫົວໜ້າພະແນກສຶກສາທິການ ແລະ ກິລາແຂວງ ສະຫວັນນະເຂດ ເພື່ອເປັນການຄັດເລືອກນັກກິລາຂອງແຂວງສູ່ງານມະຫະກໍາກິລາແຫ່ງຊາດຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ຢູ່ສະໜາມກິລາບານສົ່ງໃນຮົ່ມແຂວງສະຫວັນນະເຂດ, ໂດຍເປັນກຽດເຂົ້າຮ່ວມຊົມ ແລະ ມອບລາງວັນຂອງ ທ່ານ ພິມມະສອນ ວໍລະຍຸດ ຮອງຫົວໜ້າພະແນກ ສສກ ແລະ ທ່ານ ພັອ ສຸກສະໝອນ ສີພັນດອນ ຮອງສະຫະພັນບານສົ່ງແຂວງ ຮອງຫົວໜ້າກອງບັນຊາການທະຫານແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ການແຂ່ງຂັນຄັ້ງນີ້, ໄດ້ຈັດເປັນ 2 ລາຍການຄື: ບານສົ່ງຊາຍ ແລະ ບານສົ່ງຍິງ, ມີທີມນັກກິລາເຂົ້າຮ່ວມແຂ່ງຂັນທັງໝົດ 12 ທີມ. ໃນນີ້, ປະເພດທີມຍິງ 4 ທີມ ຊຶ່ງໄດ້ແຂ່ງຂັນເປັນເວລາ 3 ວັນ. ສໍາລັບຜົນການແຂ່ງຂັນປະເພດທີມຊາຍ ຊະນະເລີດ ທີມ ປກສ ແຂວງ ໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ, ຮອງຊະນະເລີດ ທີມ ປກຊ ແຂວງ ໄດ້ຮັບເງິນລາງວັນ 1 ລ້ານ 5 ແສນກີບ ແລະ ອັນດັບທີ 3 ຮ່ວມທີມຂົ່ນສົ່ງສາຍສະໝອນ ແລະ ກອງພົນທີ 4 ໄດ້ຮັບເງິນລາງວັນ 1 ລ້ານກີບ. ສ່ວນປະເພດຍິງຊະນະເລີດ ທີມເຊໂນ ໄດ້ຮັບຂັນ 1 ໜ່ວຍ ພ້ອມເງິນ 1 ລ້ານ 5 ແສນກີບ, ຮອງຊະນະເລີດ ທີມດ່ານສາກົນຂົວມິດຕະພາບ II ໄດ້ຮັບເງິນ 1 ລ້ານກີບ ແລະ ອັນດັບທີ 3 ທີມເມືອງສອງຄອນ ໄດ້ຮັບເງິນ 7 ແສນກີບ.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
