ຕອນເຊົ້າ ວັນທີ 31 ສິງຫາ 2022 ໄດ້ມີພິທີເປີດຊຸດຝຶກອົບຮົມ ກ່ຽວກັບການວາງແຜນການຊອກຫາແຫຼ່ງທຶນ ແລະ ແຜນການເງິນ ເພື່ອການພັດທະນາແບບຢືນຍົງ ໂດຍການເປັນປະທານຂອງ ທ່ານ ເນດ ຈັນທະລາດ ຄະນະປະຈຳພັກເມືອງ, ຫົວໜ້າຄະນະຈັດຕັ້ງເມືອງນາກາຍ ແລະ ປະທານ ຮ່ວມ ທ່ານ ສົມສັກ ສະກຸນຄຳ ຮອງຫົວໜ້າກົມສື່ມວນຊົນ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຊຸດຝຶກອົບຮົມໃນຄັ້ງນີ້ ມີພະນັກງານວິຊາການຈາກກົມສື່ມວນຊົນ, ພະນັກງານອ້ອມຂ້າງຫ້ອງການ ຖວທ ເມືອງ, ພະນັກງານ ອາສາສະໝັກ ແລະ ຜູ້ໃຫ້ທຶນ ເຂົ້າຮ່ວມທັງໝົດ 25 ທ່ານ ໃນນັ້ນມີນັກສໍາມະນາກອນ 17 ທ່ານ ເປັນຍິງ 11 ທ່ານ.
ຊຸດຝຶກອົບຮົມ ຄັ້ງນີ້ໄດ້ຮັບການສະໜັບສະໜູນຈາກ ອົງການສະຫະປະຊາຊາດເພື່ອການພັດທະນາປະຈຳລາວ (UNDP) ແລະ ບໍລິສັດນໍ້າເທີນ2 ເຊິ່ງມີຈຸດປະສົງ ເພື່ອຍົກລະດັບຄວາມຮູ້, ຄວາມສາມາດໃຫ້ແກ່ພະນັກງານ ວິຊາການ ອາສາສະໝັກ ຂອງສະຖານີວິທະຍຸຊຸມຊົນເມືອງນາກາຍ ກ່ຽວກັບ ການບໍລິຫານການຕະຫຼາດ , ການດຳເນີນງານ, ການບໍລິຫານອົງກອນ, ການບໍລິຫານການເງິນ, ຫຼັກການພື້ນຖານການບໍລິຫານທຸລະກິດ, ການບໍລິຫານການດຳເນີນງານການຜະລິດ, ການບໍລິຫານບຸກຄະລາກອນ ແລະ ອົງກອນ, ເພື່ອສ້າງເປັນແຜນຍຸດທະສາດ ແລະ ແຜນການເງິນ ຂອງສະຖານີວິທະຍຊຸມຊົນ ເມືອງນາກາຍ ໃຫ້ມີຄວາມຍືນຍົງໃນທຸກໆດ້ານເຊັ່ນວ່າ: ຄວາມຍືນຍົງທາງດ້ານສັງຄົມ, ຍືນຍົງດ້ານການຈັດຕັ້ງ ແລະ ຍືນຍົງດ້ານການເງິນ ຊຸດຝຶກອົບຮົມດັ່ງກ່າວ ຈະໄດ້ດຳເນີນໄປຈົນເຖິງວັນທີ 02 ກັນຍາ 2022 ຈຶ່ງຈະສິ້ນສຸດລົງ.
