ແຂວງອັດຕະປື ໄດ້ຈັດພິທີມອບ-ຮັບຫົວໜ້າພະແນກແຮງງານ ແລະ ສະຫວັດດີສັງຄົມ (ຮສສ) ແຂວງຜູ້ເກົ່າ ແລະ ຜູ້ໃໝ່ ຂຶ້ນໃນວັນທີ 29 ສິງຫາ ຜ່ານມານີ້ ທີ່ຫ້ອງປະຊຸມພະແນກ ຮສສ ແຂວງ ໂດຍການເຂົ້າຮ່ວມເປັນປະທານຂອງ ທ່ານ ຄໍາບຸນ ດວງພະບາງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ມີແຂກຖືກເຊີນຈາກພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ສຸດໃຈ ມາໄຊຍະວົງ ຮອງຄະນະຈັດຕັ້ງແຂວງ ແລະ ທ່ານ ສົມຫວັງ ນາມສີນາ ຮອງຫົວໜ້າພະແນກພາຍໃນແຂວງ ໄດ້ຜັດປ່ຽນກັນຂຶ້ນຜ່ານບັນດານິຕິກໍາຕ່າງໆເປັນຕົ້ນ: ຂໍ້ຕົກລົງຂອງທ່ານເຈົ້າແຂວງ ສະບັບເລກທີ 606/ຈຂອປ, ລົງວັນທີ 23 ພຶດສະພາ 2022 ວ່າດ້ວຍການອະນຸມັດໃຫ້ລັດຖະກອນພັກການ ຮັບອຸດໜູນບໍານານ, ມະຕິຕົກລົງ ຂອງຄະນະປະຈຳພັກແຂວງ ສະບັບເລກທີ 262/ຄປພຂ, ວັນທີ 21 ກໍລະກົດ 2022 ວ່າດ້ວຍການຍົກຍ້າຍພະນັກງານ ແລະ ຂໍ້ຕົກລົງຂອງເຈົ້າແຂວງ ເລກທີ 868/ຈຂອປ, ວັນທີ 21 ກໍລະກົດ 2022 ວ່າດ້ວຍການແຕ່ງຕັ້ງພະນັກງານ; ຜ່ານມະຕິຕົກລົງ ຂອງຄະນະປະຈຳພັກແຂວງ ສະບັບເລກທີ 258/ ຄປພຂ, ລົງວັນທີ 19 ກໍລະກົດ 2022 ວ່າດ້ວຍການບົ່ງຕົວແຕ່ງຕັ້ງ ເລຂາໜ່ວຍພັກ, ຫົວໜ້າພະແນກ ໂດຍໄດ້ແຕ່ງຕັ້ງ ທ່ານ ຈິດປະສົງ ສິງສະຫວັດ ກຳມະການພັກແຂວງ ຮອງປະທານກວດກາພັກ-ລັດແຂວງ ເປັນເລຂາໜ່ວຍພັກ ທັງເປັນຫົວໜ້າພະແນກ ຮສສ ແຂວງອັດຕະປືຜູ້ໃໝ່ ແລະ ໄດ້ປະກາດໃຫ້ ທ່ານນາງ ອໍາຄາ ສີຫາລາດ ຫົວໜ້າພະແນກ ຮສສ ຜູ້ເກົ່າ ພັກການຮັບອຸດໜູນບໍານານ.
ໃນໃນໂອກາດນີ້, ທ່ານ ຄໍາບຸນ ດວງພະບາງ ຍັງໄດ້ຮຽກຮ້ອງໃຫ້ຫົວໜ້າພະແນກ ຮສສ ຜູ້ໃໝ່ສືບຕໍ່ຊີ້ນໍາ-ນໍາພາ ແລະ ເປັນເສົາຄໍ້າ, ເປັນຜູ້ນໍາພາ, ເຕົ້າໂຮມຄວາມສາມັກຄີ, ສືບຕໍ່ຊຸກຍູ້ວຽກງານ ຮສສ ໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ.
ຂ່າວ-ພາບ: ມະນີວອນ
#Medialaos MMD
