ໃນຕອນເຊົ້າວັນທີ 30 ສິງຫາ 2022 ນີ້,ທີ່ ວັດປ່າຜາໂອ ບ້ານຜາໂອ ນະຄອນຫລວງພະບາງ ແຂວງຫລວງພະບາງ ໄດ້ຈັດພິທີ ມອບ-ຮັບ ບໍ່ນໍ້າບາດານ ໂດຍການເຂົ້າຮ່ວມຂອງ ສາທຸໃຫ່ຍ ອ່ອນແກ້ວ ກິຕຕິພັທໂທ(ສິດທິວົງ) ຄະນະບໍລິຫານງານປະຈຳການ ສູນກາງອົງການພຸດທະສາສະໜາສາພັນ ແຫ່ງ ສປປ ລາວ , ຜູ້ຊ່ວຍປະທານ ອົງການພຸດທະສາສະໜາສາພັນ ແຫ່ງ ສປປ ລາວ, ມີທ່ານ ນາງ ດຣ ວິພາວັນ ພົມວິຫານ ພັນລະຍາ ທ່ານ ປອ ໄຊສົມພອນພົມວິຫານ ປະທານສະພາແຫ່ງຊາດ ແຫ່ງ ສປປ ລາວ, ທ່ານ ວົງສະຫວັນ ເທບພະຈັນ ຮອງເລຂາພັກແຂວງ ສະມາຊິກສະພາແຫ່ງຊາດ ປະທານສະພາປະຊາຊົນແຂວງ ຫຼວງພະບາງ,ມີການນຳຂອງແຂວງ ພ້ອມດ້ວຍຄະນະເຈົ້າສັດທາເຂົ້າຮ່ວມ.
ໃນພິທີ ສາທຸ ບຸນໂນະ ສິດທິພອນ ຄະນະກໍາມະການບໍລິຫານວັດປ່າຜາໂອ ໄດ້ລາຍງານການກໍ່ສ້າງບໍ່ນໍ້າບາດານວັດປ່າຜາໂອ ວ່າ: ການຂຸດເຈາະ ບໍ່ບາດານ ທີ່ໄດ້ຮັບທຶນຊ່ວຍເຫຼືອລ້າ ຈາກ ມູນນິທິວີເລບຢູ ໂດຍມີ ທ່ານ ປະທານ ປອ ໄຊສົມພອນ ພົມວິຫານ ຕຳແໜ່ງ ກຳມະການກົມການເມືອງສູນກາງພັກ ປະທານສະພາແຫງຊາດ ເປັນຜູ້ ສະໜັບ ສະໜູນ ແລະ ປະສານກັບອົງການທີ່ກ່ຽວຂ້ອງ ສະໜອງທຶນ ປະຈຸບັນມີ ພຣະສົງ ສາມະເນນ ອາໃສຢູ່ ຈຳນວນ 405 ອົງ, ໃນນັ້ນປະກອບມີ: ເຜົ່າລາວລຸ່ມ ຈຳນວນ 52 ອົງ, ເຜົ່າກຶມມຸ ຈຳນວນ 147 ອົງ ແລະ ເຜົ່າມົ້ງ ຈຳນວນ 204 ອົງ.
ເຊີ່ງແມ່ນລູຫຼານຂອງພໍ່ແມ່ປະຊາຊົນບັນດາເຜົ່າ ຜູ້ທີ່ມີຖານະຍາກຈົນ ຈາກພາຍໃນແຂວງ ແລະ ຕ່າງແຂວງ , ການຂຸດເຈາະບໍ່ບາດານທີ່ວັດປ່າຜາໂອ ໄດ້ລົງມືຈັດຕັ້ງປະຕິບັດ ເລີ່ມແຕ່ວັນທີ 4 ເມສາ (4) 2021, ມີຄວາມເລິກປະມານ 65 ແມັດ, ໜ້າວຽກໃນການດຳເນີນໂຄງການດັ່ງກ່າວທີ່ສຳເລັດປະກອບມີ 1) ການຂຸດເຈາະບໍ່ນໍາ ສໍາເລັດ ຕາມລະດັບຄາດໜາຍ ນັບທັງຂະໜາດ ແລະ ການໃຊ້ເວລາຂຸດເຈາະ, 2) ສ້າງອາຄານຈຸດຄວບຄຸມການບັນຊານໍ້າ 1 ຈຸດ ຂະໜາດ 3×3 ແມັດ, 3) ຕິດຕັ້ງເຄື່ອງໄດ ແລະ ອຸປະກອນອື່ນໆ ທີ່ນຳໃຊ້ໃນການດູດນໍ້າຂື້ນຮັບໃຊ້ເຂົ້າໂຮງຜະລິດນໍ້າດື່ມ ສໍາເລັດ ແລະ 4) ຕິດຕັ້ງແຈກຈ່າຍນໍ້າ ພາຍໃນວັດທີ່ໄດ້ມີການດູດນໍ້າຈາກບໍ່ບາດານໄດ້ 1 ຈຸດ ໂຄງການຂຸດເຈາະບໍ່ບາດານດັ່ງກ່າວ ໃຊ້ທຶນງົບປະມານ ມີມູນຄ່າທັງໝົດ : 100,000 ໂດລາສະຫາລັດ, ການນໍາໃຊ້ນໍ້າບໍ່ບາດານ ສາມາດສະໜອງນ້ຳໄດ້ 150 ແມັດກ້ອນ ຕໍ່ວັນ, ໃຊ້ກັ່ນຕອງຜ່ານເຄື່ອງກັ່ນຕອງເປັນນໍ້າສະອາດ ເພື່ອດື່ມ – ສັນ ໃຫ້ແກ່ພຣະສົງ ສາມະເນນ ພາຍໃນວັດພຽງພໍ, ຮັບໃຊ້ຊີວິດປະຈໍາວັນເຊັ່ນ : ໃຊ້ອາບ , ໃຊ້ເຮືອນຄົວ.
ໃນເວລາດຽວກັນ ທ່ານ ນາງ ດຣ ວິພາວັນ ພົມວິຫານ ພັນລະຍາ ທ່ານ ປອ ໄຊສົມພອນພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍເຈົ້າສັດທາ ທັງຫລາຍກໍໄດ້ມອບ ເຂົ້້າສານຈໍານວນ 9 ໂຕ່ນ ໃນມູຄ່າ 108.000.000 ກີບ, ມີເຄື່ອງບໍລິໂພກ-ອຸປະໂພກ ແລະເງິນສົດ 26.400.000 ກີບ, ລວມມູນຄ່າທັງຫມົດ 134.400.000 ກີບ.
ໃຫ້ກຽດຮັບໂດຍ ສາທຸໃຫ່ຍ ອ່ອນແກ້ວ ກິຕຕິພັທໂທ(ສິດທິວົງ) ຄະນະບໍລິຫານງານປະຈຳການ ສູນກາງອົງການພຸດທະສາສະໜາສາພັນ ແຫ່ງ ສປປ ລາວ , ຜູ້ຊ່ວຍປະທານ ອົງການພຸດທະສາສະໜາສາພັນ ແຫ່ງ ສປປ ລາວ.
ພາບ-ຂ່າວ: ທະນູສິນ ອິດທິພົນ
#Medialaos MMD (ແຫຼ່ງຂໍ້ມູນຈາກ: ນັກຂ່າວແຂວງຫຼວງພະບາງ)
