ທ້າຍອາທິດທີ່ຜ່ານມານີ້ ແຂວງອຸດົມໄຊ ເກີດມີຝົນຕົກໜັກຈາກຜົນກະທົບຂອງພະຍຸ MA-ON (ໝາອອນ) ພັດຜ່ານທະເລຈີນໃຕ້ເຂົ້າສູ່ພາກເໜືອຂອງ ສປປ ລາວ ກວມບໍລິເວນວົງກວ້າງນານເກືອບ 10 ຊົ່ວໂມງ ເຮັດໃຫ້ນ້ຳຫ້ວຍຫລາຍສາຍໄຫລລົງສົມທົບໃສ່ ແມ່ນ້ຳຕ່າງໆຢູ່ 3 ເມືອງ ຂອງແຂວງອຸດົມໄຊ ໂດຍສະເພາະແມ່ນນ້ຳກໍ ແລະ ນ້ຳມາວ ຂຶ້ນສູງ ໄຫລເຂົ້າຖ້ວມຢູ່ຫລາຍບ້ານ ທີ່ຂຶ້ນກັບ 3 ເມືອງ ຄື: ເມືອງໄຊ, ເມືອງຫລາ ແລະ ເມືອງນາໝໍ້ ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນຂອງປະຊາຊົນຢ່າງໜັກໜ່ວງ.
ເມືອງຫລາ ກໍ່ເປັນເມືອງທີ່ໄດ້ຮັບຜົນກະທົບຈາກໄພນ້ຳຖ້ວມຄັ້ງນີ້ ທ່ານ ຫຸມພັນ ບຸບຜາຄຳ ເຈົ້າເມືອງ ເມືອງຫລາ ໄດ້ໃຫ້ຮູ້ວ່າ: ເມືອງຫລາ ໄດ້ຮັບຜົນກະທົບ ແລະ ເສຍຫາຍໜັກໜ່ວງ ຈາກໄພນ້ຳຖ້ວມຊຸດນີ້ ໂດຍສະເພາະແມ່ນ ເສັ້ນທາງ, ຂົວ, ໄຟຟ້າ, ນ້ຳປະປາ, ລະບົບການສື່ສານ, ອາຄານ, ບ້ານ, ເຮືອນ, ຜົນຜະລິດຂອງປະຊາຊົນໄດ້ຮັບຜົນເສຍຫາຍ…
ທ່ານ ຫຸມພັນ ບຸບຜາຄຳ ຍັງເວົ້າຕື່ມອີກວ່າ: ຂົວທີ່ໄດ້ຮັບຜົນກະທົບມີ ຈຳນວນ 4 ຂົວ, ໃນນີ້ ໃຊ້ສັນຈອນໄປມາບໍ່ໄດ້ຈຳນວນ 2 ຂົວ, ຄາດຄະເນເບື້ອງຕົ້ນ ບ້ານທີ່ໄດ້ຮັບຜົນກະທົບມີຈຳນວນ 15 ບ້ານ ໂດຍສະເພາະແມ່ນ ບ້ານຫລັກ 21 ໄດ້ຮັບຜົນກະທົບໜັກ ຖັດຈາກນັ້ນ ກໍ່ມີເສັ້ນທາງ, ໄຟຟ້າ, ນ້ຳປະປາ, ລະບົບການສື່ສານ, ອາຄານ, ບ້ານ, ເຮືອນ, ຜົນຜະລິດ ໄດ້ຮັບຜົນເສຍຫາຍ ແລະ ກະທົບໜັກໜ່ວງທີ່ສຸດແມ່ນລະບົບນ້ຳປະປາ ຫົວງານນ້ຳປະປາເປ່ເພເສຍຫາຍບໍ່ສາມາດໃຊ້ການໄດ້ ເຮັດໃຫ້ປະຊາຊົນຂາດນ້ຳສະອາດນຳໃຊ້ເຂົ້າໃນຊີວິດປະຈຳວັນ.
ທ່ານ ຄຳແສງ ອາລີ ຫົວໜ້າພະແນກໂຍທາທິການ ແລະ ຂົນສົ່ງ ໃຫ້ສຳພາດວ່າ: ເສັ້ນທາງໄດ້ຮັບຜົນກະທົບ ແມ່ນເສັ້ນທາງຫລວງແຫ່ງຊາດ ແຕ່ກິໂລແມັດທີ 15 ຫາ 24 (ເມືອງໄຊ – ເມືອງຫລາ) ບໍ່ສາມາດສັນຈອນໄປ – ມາໄດ້. ປັດຈຸບັນ ສາມາດແກ້ໄຂເປີດນຳໃຊ້ເສັ້ນທາງໄດ້ແລ້ວ ແຕ່ສາມາດສັນຈອນໄດ້ພຽງແຕ່ລົດເບົາ ສ່ວນລົດບັນທຸກໜັກຍັງບໍ່ສາມາດເປີດໃຫ້ສັນຈອນເທື່ອ ເນື່ອງຈາກເສັ້ນທາງຍັງມີຄວາມສ່ຽງຕໍ່ການຮັບນ້ຳໜັກຂອງລົດບັນທຸກ….
ປັດຈຸບັນ ຕໍ່ກັບໄພນ້ຳຖ້ວມຢູ່ແຂວງອຸດົມໄຊ ທາງການນຳຂັ້ນສູນກາງ, ຂັ້ນແຂວງ ແລະ ເມືອງ ພວມເລັ່ງເຂົ້າຊ່ວຍເຫລືອບັນດາບ້ານທີ່ປະສົບໄພ ແລະ ແກ້ໄຂ ບັນຫານີ້ດ້ວຍຄວາມຈິງຈັງ.
ຂ່າວ: ອ່ຽງຄຳ ວິລະສັກ
ກວດແກ້ໂດຍ: ດາວອນ ສີວິໄລ
