ຕອນເຊົ້າວັນທີ 29 ສິງຫາ 2022ນີ້, ທີ່ກົງສຸນໃຫ່ຍ ສສ ຫວຽດນາມ ປະຈໍາພາກເໜືອ ປະຈໍາແຂວງຫຼວງພະບາງ, ທ່ານ ຄໍາຂັນ ຈັນທະວີສຸກ ເຈົ້າແຂວງ ຫລວງພະບາງ, ພ້ອມດ້ວຍພະນັກງານຫລັກແຫລ່ງ ແຂວງຫລວງພະບາງ ໄດ້ເຂົ້າອວຍພອນ ທ່ານ ນາງ ກຽວທິຮັງຟຸກ ຫົວຫນ້າກົງສູນໃຫຍ່ ສສ ຫວຽດນາມ ປະຈຳພາກເຫນືອ ປະຈໍາແຂວງຫລວງພະບາງ ເນື່ອງໃນໂອກາດສະເຫລີມສະຫລອງວັນສະຖາປະນາສາທາລະນະລັດສັງຄົມນິຍົມຫວຽດນາມຄົບຮອບ 77 ປີ(2/9/1945-2/9/2022 ) ແລະ ຫວນຄືນວັນສ້າງຕັ້ງສາຍພົວພັນການທູດ ຄົບຄອບ 60 ປີ (5/9/1962-5/9/2022.
ໃນໂອກາດດັ່ງກ່າວ, ທ່ານ ຄໍາຂັນ ຈັນທະວີສຸກ ໄດ້ສະແດງຄວາມຊົມເຊີຍແລະຕີລາຄາສູງຕໍ່ບັນດາຜົນສຳເລັດ ແລະ ຜົນງານທີ່ໃຫຍ່ຫລວງ, ຮອບດ້ານຂອງປະຊາຊົນຫວຽດນາມ ຍາດມາໄດ້ຕະຫລອດໄລຍະ 77 ປີຜ່ານມາພາຍໃຕ້ການນຳພາອັນຖືກຕ້ອງສະຫລາດສ່ອງໃສ ຂອງພັກກອມມູນິດຫວຽດນາມ ອັນໄດ້ເຮັດໃຫ້ ສສ ຫວຽດນາມ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ; ວຽກງານປ້ອງກັນຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ການພົວພັນສາກົນໄດ້ຮັບການເປີດກວ້າງ, ອັນໄດ້ເຮັດໃຫ້ບົດບາດ, ອິດທິພົນຂອງຫວຽດນາມ ນັບມື້ນັບສູງເດັ່ນໃນເວທີພາກພື້ນ ແລະ ສາກົນ.ທ່ານ ຄໍາຂັນ ຈັນທະວີສຸກ ຍັງໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະປະຊົນສອງຊາດລາວ-ຫວຽດນາມ ໂດຍສະເພາະແມ່ນແຂວງຫລວງພະບາງ ກັບ ສສ ຫວຽດນາມ, ໃນໄລຍະຜ່ານມາແລະປັດຈຸບັນທີ່ນັບມື້ນັບມີຄວາມເລິກເຊິ່ງ, ມີປະສິດທິຜົນ, ພວມນຳເອົາຜົນປະໂຫຍດຕົວຈິງມາໃຫ້ປະຊາຊົນສອງຊາດ ລາວ-ຫວຽດນາມ. ທ່ານຍັງໄດ້ສະແດງຄວາມຂອບໃຈແລະຮູ້ບຸນຄຸນຕໍ່ພັກ, ລັດ ແລະ ປະຊາຊົນຫວຽດນາມ ອ້າຍນ້ອງທີ່ໄດ້ໃຫ້ການສະໜັບສະໜູນຊ່ວຍເຫລືອຢ່າງໃຫຍ່ຫລວງ, ລ້ຳຄ່າມີປະສິດທິຜົນ ແລະ ທັນການແກ່ປະຊາຊົນລາວໃນຕະຫລອດໄລຍະທີ່ຜ່ານມາທັງໄລຍະຕໍ່ສູ້ເພື່ອປົດປ່ອຍຊາດໃນເມື່ອກ່ອນ ແລະ ທັງໃນໄລຍະປົກປັກຮັກສາ ແລະ ສ້າງສາປະເທດຊາດໃນປະຈຸບັນ.
ໃນໂອກາດນີ້, ທ່ານ ນາງ ນາງ ກຽວທິຮັງຟຸກ ຫົວຫນ້າກົງສູນໃຫຍ່ ສສ ຫວຽດນາມ ປະຈຳພາກເຫນືອ ປະຈໍາແຂວງຫລວງພະບາງ ໄດ້ສະແດງຄວາມຂອບໃຈຕໍ່ ທ່ານ ຄໍາຂັນ ຈັນທະວີສຸກ ເຈົ້າແຂວງຫລວງພະບາງ ທີ່ໄດ້ນຳພາຄະນະມາອວຍພອນໃນຄັ້ງນີ້ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືລະຫວ່າງລາວ-ຫວຽດນາມ ໃນຕະຫລອດໄລຍະຜ່ານມາ ແລະ ໄດ້ຕີລາຄາສູງຕໍ່ຜົນສຳເລັດຂອງລາວພ້ອມທັງອວຍພອນໃຫ້ປະຊາຊົນລາວພາຍໃຕ້ການນຳພາຂອງພັກປະຊາຊົນປະຕິວັດລາວ ຈົ່ງຍາດໄດ້ຜົນສຳເລັດໃໝ່ໃຫຍ່ຫລວງກວ່າເກົ່າໃນການສ້າງສາພັດທະນາປະເທດຊາດ.
ຈາກນັ້ນ ທ່ານ ເຈົ້າແຂວງຫຼວງພະບາງ ກໍ່ໄດ້ມອບກະຕ່າດອກໄມ້ໃຫ້ກັບຫົວໜ້າກົງສູນໃຫ່ຍ ສສ ຫວຽດນານປະຈໍາພາກເໜືອ ແລະ ປະຈໍາແຂວງຫຼວງພະບາງ.
ຂ່າວ-ພາບ: ທະນູສິນ ອິດທິພົນ
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
