ແມນເຊັສເຕີ ຢູໄນເຕັດ ກຽມຄວ້າຕົວ ແອນໂທນີ ປີກຄົນເກັ່ງຊາວບຣາຊິນ. ຫຼັງຈາກທີ່ຕົກລົງຄ່າຕົວກັບ ອາແຈັກ ອໍາສະເຕີດຳ ຕົ້ນສັງກັດຂອງນັກເຕະໄດ້ຮຽບຮ້ອຍແລ້ວ ໃນລາຄາ 95 ລ້ານເອີໂຣ ບວກຄ່າຕົວເພີ່ມອີກ 5 ລ້ານເອີ ເຊິ່ງເປັນສະຖິຕິຄ່າຕົວທີ່ແພງທີ່ສຸດໃນຫນ້າປະຫວັດສາດຂອງລີກປະເທດໂຮນລັງ
ເອຣິດ ເທນ ຮາກ ຜູ້ຈັດການທີມແມນເຊັສເຕີ ຢູໄນເຕັດ ຕ້ອງການດຶງຕົວ ແອນໂທນີ ເຊິ່ງເປັນສິດເກົ່າ ສະໄໝເຮັດວຽກກັບ ອາແຈກ ມາເສີມຄວາມແຂງແກ່ນເກມບຸກ ກ່ອນຕະຫຼາດຊື້ຂາຍນັກເຕະໄລຍະລະດູຮ້ອນນີ້ຈະປິດລົງໃນວັນທີ 1 ກັນຍາ.
ເຖິງແມ່ນໄລຍະທີ່ຜ່ານມາ ອາແຈັກ ຈະພະຍາຍາມຮັກສາຕົວ ແອນໂທນີ ເອົາໄວ້ ແຕ່ດ້ວຍຄ່າຕົວລວມ 100 ລ້ານເອີໂຣ ທີ່ ແມນເຊັສເຕີ ຢູໄນເຕັດ ຍື່ນໃຫ້ພວກເຂົາພິຈາລະນາ ມັນຍາກທີ່ຈະປະຕິເສດໄດ້ ແຖມນັກເຕະກໍບໍ່ມີໃຈຢູ່ກັບສະໂມສອນອີກຕໍ່ໄປ ນັ້ນຈຶ່ງເປັນເຫດຜົນທີ່ເຮັດໃຫ້ຍອດທີມແຫ່ງລີກ ເອເຣດີວີຊີ່ ຕ້ອງຍອມຕັດໃຈຂາຍຜູ້ກ່ຽວອອກໄປ.
ທັງນີ້ ແອນໂທນີ ອາຍຸ 22 ປີ ເຊິ່ງຍິງໄປ 25 ປະຕູຈາກການຫຼິ້ນ 82 ນັດໃຫ້ກັບ ອາແຈັກ ນັບຕັ້ງແຕ່ຍ້າຍມາຈາກ ເຊົາ ເປົາໂລ ຈະເຊັນສັນຍາກັບ ແມນເຊັສເຕີ ຢູໄນເຕັດ ຈົນເຖິງເດືອນ ມິຖຸນາ 2027 ໂດຍມີທາງເລືອກເພີ່ມອີກ 1 ປີ.
