ກະຊວງສາທາລະນະສຸກ ໄດ້ມອບເຄື່ອງສ່ອງໄຟຟ້າ ຊີທີສະແກນເນີ (CT- Scaner) ໃຫ້ໂຮງໝໍມິດຕະພາບ ເປັນຜູ້ຄຸ້ມຄອງ ແລະ ນຳໃຊ້, ພິທີມອບ-ຮັບ ໄດ້ຈັດຂຶ້ນໃນວັນທີ 23 ສິງຫາ ນີ້ ທີ່ໂຮງໝໍດັ່ງກ່າວ, ກ່າວມອບໂດຍ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ກ່າວຮັບໂດຍ ທ່ານ ສອນໄຊ ລາດຊະວົງ ຜູ້ອຳນວຍການໂຮງໝໍມິດຕະພາບ ຊຶ່ງມີພະນັກງານ, ແພດໝໍ ເຂົ້າຮ່ວມ.
ທ່ານ ບຸນແຝງ ພູມມະໄລສິດ ກ່າວວ່າ: ເພື່ອເປັນການຕອບສະໜອງການບໍລິການຂອງໂຮງໝໍໃຫ້ດີຂຶ້ນ, ກະຊວງສາທາລະນະສຸກ ພາຍໃຕ້ການສະໜັບສະໜູນທຶນ ຈາກທະນາຄານພັດທະນາອາຊີ (ADB) ໄດ້ຈັດຊື້ເຄື່ອງສ່ອງໄຟຟ້າ (CT- Scaner) ຍີ່ຫຍໍ້ Philip ຈຳນວນ 1 ເຄື່ອງ ພ້ອມອຸປະກອນຄົບຊຸດ ຕາມມາດຕະຖານເຕັກນິກ ລວມມູນຄ່າ 648.880 ໂດລາ. ເຄື່ອງດັ່ງກ່າວນີ້ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງວຽກງານຕົວຈິງ ໂດຍສະເພາະເພື່ອນຳໃຊ້ຊ່ວຍເປັນບ່ອນອີງແກ່ການ ບົ່ງມະຕິ ແລະ ປິ່ນປົວພະຍາດ ຢ່າງມີປະສິດທິພາບ, ເປັນເຄື່ອງທີ່ສາມາດກວດໄດ້ 68 ແຜນ (Slides) ແລະ ເປັນເຄື່ອງທີ່ສາມາດເຄື່ອນຍ້າຍໄດ້ ເພື່ອສາມາດນຳໄປກວດສ່ອງຢູ່ຫຼາຍຈຸດການບໍລິການໄດ້. ທັງໝົດນີ້ເປັນການຍົກລະດັບຄຸນນະພາບຂອງການບໍລິການດ້ານສາທາລະນະສຸກຂອງປະເທດ ໂດຍສະເພາະຂອງໂຮງໝໍມິດຕະພາບໃຫ້ສູງຂຶ້ນອີກບາດກກ້າວໜຶ່ງ ແລະ ຈະກາຍເປັນການປະກອບສ່ວນສຳຄັນໃຫ້ແກ່ໂຮງໝໍມິດຕະພາບ ມີເງື່ອນໄຂພຽງພໍໃນການຫັນໂຮງໝໍກຸ້ມຕົນເອງເທື່ອລະກ້າວ ແລະ ສາມາດປະຕິບັດນະໂຍບາຍ 5 ດີ, 1 ພໍໃຈ ໃຫ້ປະກົດຜົນເປັນຈິງ.
ທ່ານລັດຖະມົນຕີ ໄດ້ຮຽກຮ້ອງມາໂຮງໝໍ ຈົ່ງເອົາໃຈໃສ່ປົກປັກຮັກສາ ຄຸ້ມຄອງນຳໃຊ້ຢ່າງມີປະສິດ ທິພາບສູງ ເກີດຜົນປະໂຫຍດສູງສຸດ ແລະ ສາມາດນຳໃຊ້ໄດ້ຢ່າງຍາວນານ.
(ຂ່າວ: ຕຸໄລເພັດ)
