ສຳນັກຂ່າວ ຣອຍເຕີ, ເກີດນ້ຳຖ້ວມກະທັນຫັນ ໃນພື້ນທີ່ທາງພາກກາງ ຂອງອາຟະການິດສະຖານ ເຮັດໃຫ້ມີ ຜູ້ເສຍຊີວິດ ຢ່າງໜ້ອຍ 20ຄົນ,ບາດເຈັບ 35ຄົນ ແລະ ສູນຫາຍອີກຈຳນວນໜຶ່ງ ໃນຮອບ 48 ຊົ່ວໂມງ ຜ່ານມາ; ຂະນະທີ່ ເຮືອນປະຊາຊົນ ແລະ ພື້ນທີ່ ຜະລິດ ກະສິກຳ ໄດ້ຮັບຄວາມເສຍຫາຍ ເປັນບໍລິເວນກວ້າງ.
ປັດຈຸບັບ ລັດຖະບານປະເທດນີ້ ຮຽກຮ້ອງໃຫ້ສາກົນ ໂດຍສະເພາະ ອົງການຊ່ວຍເຫລືອດ້ານມະນຸດສະທຳ ຢື່ນມືເຂົ້າມາ ຊ່ວຍເຫລືອຜູ້ປະສົບໄພໃນຄັ້ງນີ້ຢ່າງຮີບດ່ວນ.
ກ່ອນໜ້ານີ້ ອາຟະການິດສະຖານ ປະເຊີນກັບໄພທຳມະຊາດຫລາຍຄັ້ງ ໃນປີນີ້ ລວມທັງໄພແຫ້ງແລ້ງ ແລະ ເຫດແຜນດິນໄຫວຮຸນແຮງເຮັດໃຫ້ມີຜູ້ເສຍຊີວິດ 1.000 ກວ່າຄົນ ໃນເດືອນມິຖຸນາ ເຮັດໃຫ້ອົງການຊ່ວຍເຫລືອດ້ານສິດທິມະນຸດໂລກ ໄດ້ຈັດສົ່ງເຄື່ອງຊ່ວຍເຫລືອມາເປັນເວລາຫລາຍເດືອນ ແຕ່ຈຳເປັນຕ້ອງໄດ້ຮັບເງິນທຶນ ແລະ ໂອກາດ ການເຂົ້າເຖິງປະຊາຊົນ ຫລາຍຂຶ້ນ ເພື່ອເຮັດໃຫ້ປະຊາຊົນຜູ້ທີ່ບໍ່ມີທີ່ຢູ່ອາໄສຈຳນວນຫລາຍ ໄດ້ມີສະຖານທີ່ພັກອາໄສ ແລະ ນ້ຳສະອາດໃຫ້ທົ່ວເຖິງ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສນປະເທດລາວ)
