ສູນກາງແນວລາວສ້າງຊາດ ຮ່ວມກັບ ສະມາຄົມໃຫຍ່ຊາວຫວຽດນາມ ປະຈໍາ ສປປ ລາວ, ສະມາຄົມຄຸນຄ່າລາວ ເປີດງານວາງສະແດງສິນຄ້າ ແລະ ອາຫານ ເພື່ອສະເຫລີມສະຫລອງປີສາມັກຄີ ມິດຕະພາບລາວ-ຫວຽດນາມ 2022 ແລະ ວັນສ້າງຕັ້ງແນວລາວສ້າງຊາດ ຄົບຮອບ 72 ປີ (13/08/1950-13/08/2022) ທີ່ ສູນຝຶກອົບຮົມສູນກາງແນວລາວສ້າງຊາດ ໃນວັນທີ 12-13 ສິງຫາ 2022 ໂດຍມີ ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ມີບັນດາພັນລະຍາຂອງການນຳ ພ້ອມດ້ວຍແຂກຖືກເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ນາງ ແກ້ວມະນີວອນ ຜາລີຂັນ ກໍາມະການສູນກາງແນວລາວສ້າງຊາດ, ປະ ທານສະມາຄົມຄຸນຄ່າລາວ ໄດ້ໃຫ້ຮູ້ວ່າ: ໃນພິທີເປີດງານວາງສະແດງສິນຄ້າ ແລະ ອາ ຫານ ຄັ້ງນີ້ ແມ່ນເນັ້ນໃສ່ການສົ່ງເສີມຜະລິດຕະພັນພາຍໃນປະເທດ ຂອງສອງຊາດລາວ-ຫວຽດນາມ ເປັນຕົ້ນ ເຄື່ອງຫັດຖະກໍາຈັກສານ, ຕໍ່າຫູກທໍໄໝ, ຫຍິບປັກທັກແສ່ວ, ແກະສະລັກແບບລາວໆ, ຜົນຜະລິດກະສິກໍາສະອາດ-ປອດສານພິດ, ອາຫານ ແລະ ເຄື່ອງດື່ມ, ລວມທັງການຕົບແຕ່ງເວທີນີ້ ກໍຕິດພັນກັບການຊົມໃຊ້ທໍາມະຊາດ ທີ່ອຸດົມສົມບູນຂອງປະ ເທດລາວ ເປັນຕົ້ນ ໄມ້ປ່ອງ, ອຸປະກອນ ແລະ ການປະດັບເອ້ທີ່ມີເອກະລັກຂອງສອງຊາດ ລາວ-ຫວຽດນາມ ພ້ອມກັນນີ້, ກໍຍັງມີການວາງສະແດງການບໍລິການຂອງ ບໍລິສັດປະກັນໄພ ແລະ ທະນາຄານ ຈໍານວນໜຶ່ງ.
ພາຍໃນງານຄັ້ງນີ້, ມີຮ້ານສະແດງສິນຄ້າ 35 ຮ້ານ ແລະ 25 ຫົວໜ່ວຍທຸລະກິດ ຈາກພາກລັດ ແລະ ຜູ້ປະກອບການທຸລະກິດ ມາວາງສະແດງ ໃນນັ້ນ ມີເຄື່ອງຫັດຖະກໍາ 9 ຮ້ານ, ກະສິກໍາ 3 ຮ້ານ, ອາຫານ ແລະ ເຄື່ອງດື່ມ 9 ຮ້ານ, ການບໍລິການ 2 ບູດ ແລະ ອື່ນໆ.
ຂ່າວ-ພາບ: ສົມຫວັງ
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
