ການແຂ່ງຂັນເຕະບານໂລກ 2022 ອາດເປີດສາກຂຶ້ນໄວກວ່າກໍານົດ 1 ມື້ ໃນວັນອາທິດທີ 20 ພະຈິກ ທີ່ເຈົ້າພາບ ກາຕາ ຈະເປີດສະໜາມພົບ ເອກົວດໍ ເກມນັດເປີດສະໜາມຂອງກຸ່ມ A ເດີມແມ່ນຈະເລີ່ມແຂ່ງຂັນໃນວັນທີ 21 ພະຈິກ ເວລາ 23:00 ໂມງ (ຕາມເວລາປະເທດລາວ) ເຊິ່ງຖືເປັນເກມນັດທີ 3 ຂອງລາຍການນີ້. ສ່ວນເກມນັດເປີດສະໜາມທີ່ແທ້ຈິງ ຈະເປັນເກມລະຫວ່າງ ເຊເນກັນ ກັບ ໂຮນລັງ ເວລາ 17:00 ໂມງ (ຕາມເວລາປະເທດລາວ) ໃນມື້ດຽວກັນ ຢ່າງໃດກໍຕາມ ຜູ້ມີອໍານາດຂອງ FIFA ໄດ້ຍື່ນເລື່ອງໃຫ້ເລື່ອນການແຂ່ງຂັນເກມຂອງກາຕາ ໃຫ້ໄວກວ່າກໍານົດ ຈາກການລາຍງານຂອງ BBC Sport ສາເຫດມາຈາກການເຈລະຈາລະຫວ່າງເຈົ້າພາບ ແລະ ຄູ່ແຂ່ງ ເອກົວດໍ ຫຼັງໄດ້ຮັບຄໍາຮ້ອງຂໍຈາກສະຫະພັນບານເຕະອາເມຣິກາໃຕ້ (Conmebol).
ເຊິ່ງເຂົ້າສູດຕາມທໍານຽມ ທີ່ທີມເຈົ້າພາບຈະໄດ້ຮັບກຽດໃຫ້ລົງຫຼິ້ນໃນນັດເປີດລາຍການ ການຕັດສິນໃຈຂັ້ນສຸດທ້າຍ ແມ່ນຂຶ້ນຢູ່ກັບສະມາຊິກຂອງ FIFA. ເຊິ່ງປະກອບໄປດ້ວຍປະທານສະຫະພັນບານເຕະໃນ 6 ທະວີບ ລວມໄປເຖິງປະທານ FIFA ທ່ານ ຈານນີ ອິນຟານຕີໂນ່ ຫາກການຕັດສິນໃຈດັ່ງກ່າວໄດ້ຮັບການອະນຸມັດ ໂປຣແກຣມການແຂ່ງຂັນຈະບໍ່ໄດ້ຮັບຜົນກະທົບຫຼາຍປານໃດ ໂດຍທີ່ເກມລະຫວ່າງ ເຊເນກັນ ແລະ ໂຮນລັງ ຈະຖືກຈັບຍ້າຍໄປຫຼິ້ນໃນເວລາ 23 ໂມງຄືນແທນ ແລະ ເຮັດໃຫ້ການແຂ່ງຂັນໃນວັນດັ່ງກ່າວຈະມີຂຶ້ນພຽງ 3 ນັດໃນມື້ ຈາກທີ່ແຕ່ເດີມຈະຢູ່ທີ່ 4 ນັດ ເຮັດໃຫ້ ເກມກຸ່ມ B ລະຫວ່າງ ອັງກິດ ແລະ ອີຣານ ທີ່ຈະມີຂຶ້ນໃນເວລາ 20:00 ໂມງ (ຕາມເວລາລາວ) ຂອງວັນທີ 21 ພະຈິກ ຈະບໍ່ໄດ້ຮັບຜົນກະທົບ.
