ເນື່ອງຈາກແຂວງໄຊຍະບູລີ ໄດ້ຮັບຜົນກະທົບຈາກພາຍຸມູນລານ ເຮັດໃຫ້ມີຝົນຕົກແຕ່ວັນທີ 11-12 ສິງຫາ ນີ້, ໄດ້ເກີດມີນໍ້າຫ້ວຍຫຼາຍສາຍຢູ່ແຂວງໄຊຍະບູລີ ຂຶ້ນຖ້ວມພື້ນຖານການຜະລິດ ແລະ ເຮືອນຊານຂອງປະຊາຊົນຈໍານວນໜຶ່ງ. ຕໍ່ກັບເຫດການດັ່ງກ່າວ ຄະນະກໍາມະການຄຸ້ມຄອງໄພພິບັດຂັ້ນແຂວງ ແລະ ການນໍາທຸກພາກສ່ວນຕ່າງໆຂອງແຂວງ ໄດ້ເຝົ້າລະວັງ ແລະ ກຽມກໍາລັງພົນ 600 ກວ່າຄົນ ເພື່ອຊ່ວຍເຫຼືອປະຊາຊົນທີ່ຈະໄດ້ຮັບຜົນກະທົບຈາກໄພນໍ້າຖ້ວມ.
ທ່ານ ເພັດພິໄຊ ສູນວິໄລ ຮອງເຈົ້າແຂວງ ຫົວໜ້າຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ຖະແຫຼງຂ່າວໃນວັນທີ 12 ສິງຫາ ນີ້ວ່າ: ເພື່ອເປັນການເຝົ້າລະວັງ ແລະ ກະກຽມໄພນໍ້າຖ້ວມທີ່ອາດຈະເກີດຂຶ້ນ. ດັ່ງນັ້ນ, ການນໍາຂອງແຂວງກໍຄືຄະນະກໍາມະການຄຸ້ມຄອງໄພພິບັດ ຈຶ່ງໄດ້ລົງຕິດຕາມກວດກາ ແລະ ໃຫ້ການຊ່ວຍເຫຼືອພໍ່-ແມ່ປະຊາຊົນທີ່ໄດ້ຮັບຜົນກະທົບໄພພິບັດໃນເບື້ອງຕົ້ນ.
ຕາມການລາຍງານເບື້ອງຕົ້ນ ທົ່ວແຂວງເກີດມີນໍ້າຖ້ວມ 5 ເມືອງ, ເສັ້ນທາງຕັດຂາດລະຫວ່າງເມືອງໄຊຍະບູລີ ຫາ ເມືອງຫົງສາ, ພື້ນທີ່ການຜະລິດ ແລະ ສັດລ້ຽງຂອງປະຊາຊົນໄດ້ຮັບຜົນເສຍຫາຍຈໍານວນໜຶ່ງ, ສະເພາະເທດສະບານເມືອງໄຊຍະບູລີ ລະດັບແມ່ນໍ້າຮຸ່ງແມ່ນຂຶ້ນເຖິງຈຸດສ່ຽງໄພຢູ່ໃນລະດັບ 5-6,5 ແມັດ, ຈຸດອັນຕະລາຍແມ່ນ 7 ແມັດ, ສໍາລັບແຜນການເບື້ອງຕົ້ນແມ່ນໄດ້ປະກາດພາວະສຸກເສີນແຈ້ງເຕືອນການເຝົ້າລະວັງຜ່ານທາງໂທລະໂຄ່ງຂອງແຕ່ລະບ້ານ, ແຈ້ງອອກທາງວິທະຍຸ ແລະ ໃຫ້ລົດໂຮງໝໍ, ຕໍາຫຼວດ ເປີດໂວດແຈ້ງເຕືອນປະຊາຊົນຕາມຫົນທາງ, ພ້ອມດຽວກັນກໍໄດ້ລະດົມກໍາລັງພົນເພື່ອເຂົ້າຊ່ວຍເຫຼືອປະຊາຊົນ ເມື່ອນໍ້າຂຶ້ນຖ້ວມຈໍານວນ 600 ກວ່າຄົນ. ໃນນັ້ນ, ມີກໍາລັງທະຫານແຂວງ 115 ຄົນ, ທະຫານຮາບທີ 2 ມີ 300 ຄົນ, ຕໍາຫຼວດ 50 ຄົນ, ຊາວໜຸ່ມຈາກບັນດາພະແນກການອ້ອມຂ້າງແຂວງ 200 ຄົນ, ມີໜ່ວຍກູ້ໄພແຂວງ ແລະ ແພດໝໍຈໍານວນ 20 ຄົນ. ນອກນີ້, ຍັງມີພາຫະນະປະເພດລົດບັນທຸກ ແລະ ລົດກະບະ 18 ຄັນ, ລົດກູ້ຊີບກູ້ໄພ 3 ຄັນ, ເຮືອ 3 ລໍາ, ເຄື່ອງຜະລິດນໍ້າກິນ-ນໍ້າໃຊ້ 1 ເຄື່ອງ ແລະ ຍັງມີຢາປົວພະຍາດຈໍານວນໜຶ່ງ.
ໃນຕອນເຊົ້າຂອງວັນດຽວກັນ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ໂອ້ລົມ ແລະ ເນັ້ນໜັກ ພ້ອມທັງໃຫ້ກໍາລັງໃຈກັບບັນດາກໍາລັງພົນ 600 ກວ່າຄົນ ເພື່ອຊ່ວຍເຫຼືອປະຊາຊົນ ທີ່ຈະໄດ້ຮັບຜົນກະທົບຈາກໄພນໍ້າຖ້ວມ, ໂດຍແບ່ງເປັນກຸ່ມອອກລາດຕະເວນຢູ່ບັນດາບ້ານທີ່ມີຄວາມສ່ຽງລຽບຕາມແມ່ນໍ້າຮຸ່ງ ເພື່ອກຽມພ້ອມຊ່ວຍເຫຼືອປະຊາຊົນໃຫ້ທ່ວງທັນກັບເຫດການ.
(ຂ່າວ-ພາບ: ອຸ່ນເຮືອນ ໂພທິລັກ)
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
