ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ວັນສື່ມວນຊົນ ແລະ ການພິມຈຳໜ່າຍຄົບຮອບ 72 ປີ ເປັນອີກວັນໜຶ່ງທີ່ມີຄວາມໝາຍຄວາມສຳຄັນທາງປະຫວັດສາດ ທີ່ເປັນກະບອກສຽງຂອງພັກເປັນຂົວຕໍ່ໃຫ້ແກ່ພັກ-ລັດ ແລະ ປະຊາຊົນ, ໄລຍະຜ່ານມາສື່ມວນຊົນແຂວງສາລະວັນ ເຄື່ອນໄຫວເຮັດໜ້າທີ່ ຕາມພາລະບົດບາດ ດ້ວຍຄວາມເອົາໃຈໃສ່, ດ້ວຍຄວາມຮັບຜິດຊອບ ແລະ ມີຜົນງານຫລາຍດ້ານ.
ທ່ານ ຈັນສີລອນ ສີສົມບູນ ເຈົ້າເມືອງສາລະວັນ ໄດ້ໃຫ້ທັດສະນະ ແລະ ຄວາມຮູ້ສຶກ ໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 72 ປີ(13 ສິງຫາ 1950-13 ສິງຫາ 2022) ໃນວັນທີ 9 ສິງຫາຜ່ານມານີ້ວ່າ: ສື່ມວນຊົນ ມີຄວາມໝາຍຄວາມສຳຄັນ ຕໍ່ກັບການຜັນຂະຫຍາຍແນວໂຍບາຍຂອງພັກ, ລະບຽບກົດໝາຍຂອງລັດ ເປັນກະບອກສຽງອັນແຫລມຄົມ ໃຫ້ແກ່ການຈັດຕັ້ງ ໃນການນຳເອົາເນື້ອໃນຈິດໃຈ, ຄວາມມຸ້ງຫວັງໃນການສ້າງສາ, ພັດທະນາ ລົງເຖິງພໍ່ແມ່ປະຊາຊົນ ແລະ ຄວາມປາຖະໜາຂອງປະຊາຊົນ ຕໍ່ການຈັດຕັ້ງພັກ-ລັດ ແມ່ນນັບມື້ນັບເຕີບໃຫຍ່ຂະຫຍາຍຕົວ ທາງດ້ານປະລິ ມານ ແລະ ຄຸນນະພາບ, ວ່ອງໄວ, ທັນສະໄໝ ໂດຍສະເພາະສື່ມວນຊົນແຂວງສາລະວັນ ໄດ້ປະຕິບັດໜ້າທີ່ດ້ວຍຄວາມຮັບຜິດຊອບ, ຄວາມເປັນເຈົ້າການ ໃນການປຸກລະດົມຂົນຂວາຍໃນທົ່ວສັງຄົມ ໃຫ້ຮັບຮູ້ເຂົ້າໃຈຢ່າງເລີກເຊິ່ງຕໍ່ແນວທາງນະໂຍບາຍຕ່າງໆ ຄຽງຄູ່ກັບການປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດ ໃນແຕ່ລະໄລຍະແຕ່ລະສະໄໝ ໂດຍສະເພາະສື່ໜັງສືພິມ, ວິທະຍຸກະຈາຍສຽງ, ໂທລະພາບ ແລະ ສື່ອອນລາຍທຸກປະເພດ ໄດ້ມີຄວາມພະຍາຍາມສ້າງຕາໜ່າງຂ່າວໃຫ້ກວ້າງຂວາງ, ມີການພັດທະນາ, ຄວາມຮູ້ຄວາມສາມາດໃນການໂຄສະນາ, ນຳສະເໜີແນວທາງນະໂຍບາຍລົງສູ່ຮາກຖານພໍ່ແມ່ປະຊາຊົນ ຮັບຊາບຢ່າງກວ້າງຂວາງ.
ພ້ອມກັນນີ້, ທ່ານ ບຸນທະວີ ພິມມະສານ ປະທານສະຫະພັນກໍາມະບານແຂວງສາລະວັນ ກໍໄດ້ກ່າວວ່າ: ສື່ມວນຊົນ ເປັນເວທີຖະແຫລງຂ່າວ ທີ່ເຮັດໜ້າທີ່ໃນທຸກຂະບວນການຂອງການຈັດຕັ້ງ, ຂອງພໍ່ແມ່ປະຊາຊົນ ແລະ ຂອງສັງຄົມ ໃນການເຜີຍແຜ່ຂໍ້ມູນຂ່າວສານ ທີ່ຈຳເປັນ, ສຳຄັນ ແລະ ເປັນປະໂຫຍດ ຄຽງຄູ່ກັບການປຸກລະດົມນໍ້າໃຈຮັກຊາດ, ຮັກບ້ານເກີດເມືອງນອນ ເຜີຍແຜ່ຂໍ້ມູນຂ່າວສານທາງດ້ານການເມືອງ, ເສດຖະກິດ-ສັງຄົມວິທະຍາສາດ, ເຕັກໂນໂລຊີ, ສາລະຄວາມຮູ້, ສາລະບັນເທີງໃຫ້ແກ່ສັງຄົມ, ປະກອບສ່ວນຕ້ານປາກົດການຫຍໍ້ທໍ້ໃນສັງຄົມ ແລະ ຖ້ອຍທຳນອງທີ່ບິດເບືອນຄວາມຈິງ.
ຂ່າວ-ພາບ: ວິໄລວອນ
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
