ທ່ານ ປອ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມການນໍາ, ສະມາຊິກພັກ, ພະນັກງານ ຫ້ອງການສຶກສາທິການ ແລະ ກິລາເມືອງ (ສກມ) ປາກຊ່ອງ ແຂວງຈຳປາສັກ, ມີທ່ານ ວຽງນະຄອນ ບົວລະພັນ ຮອງຫົວໜ້າພະແນກສຶກສາທິການ ແລະ ກິລາ ແຂວງຈຳປາສັກ ພ້ອມຄະນະຮ່ວມຕິດຕາມ, ໂດຍໃຫ້ຕ້ອນຮັບຂອງທ່ານ ບຸນລຽບ ແກ້ວວົງສາ ຫົວໜ້າຫ້ອງການສຶກສາທິການ ແລະ ກິລາ ເມືອງປາກຊ່ອງ ພ້ອມຄະນະ ຕະຫຼອດຮອດສະມາຊິກພັກ ແລະ ພະນັກງານເຂົ້າຮ່ວມ.
ໂອກາດດັ່ງກ່າວ, ທ່ານ ປອ ສຸລິອຸດົງ ສູນດາລາ ໄດ້ຮັບຟັງການລາຍງານສະພາບການເຄື່ອນໄຫວວຽກງານໃນໄລຍະທີ່ຜ່ານມາຈາກຫົວໜ້າຫ້ອງການສຶກສາທິການ ແລະ ກິລາເມືອງດັ່ງກ່າວ, ໂດຍສະເພາະບັນຫາຄູອາສາທີ່ບໍ່ໄດ້ຮັບຕົວເລກບັນຈຸເຂົ້າລັດຖະກອນມີຈຳນວນຫຼາຍ ຖ້າຫາກຄູອາສາດັ່ງກ່າວອອກຈາກການເປັນຄູແລ້ວ ພາຍໃນເມືອງຈະບໍ່ສາມາດເປີດການຮຽນການສອນໄດ້ຫຼາຍແຫ່ງ, ມີຄູອອກພັກການຮັບອູດໜູນບຳນານປີໜຶ່ງບໍ່ຕຳກວ່າ 50 ຄົນ, ໂຮງຮຽນບາງແຫ່ງຄູຜູ້ດຽວສອນແຕ່ຂັ້ນ ປ.1 ຮອດຂັ້ນ ປ.5, ອຸປະກອນຮັບໃຊ້ພາຍໃນໂຮງຮຽນຍັງຂາດເຂີນ, ນັກຮຽນຈຳນວນຫຼາຍຮຽນຈົບຊັ້ນມັດທະຍົມຕອນຕົ້ນ ບໍ່ສືບຕໍ່ເຂົ້າຮຽນໃນຊັ້ນມັດທະຍົມຕອນປາຍ ແລະ ບັນຫາອື່ນໆອີກ.
ຫຼັງຈາກນັ້ນ, ທ່ານຮອງລັດຖະມົນຕີ ສສກ ໄດ້ໃຫ້ກຽດໂອ້ລົມ ໂດຍເນັ້ນໜັກໃຫ້ການນໍາ, ສະມາຊິກ, ພະນັກງານ, ຄູອາຈານ ເອົາໃຈໃສ່ແກ້ໄຂບັນຫາຫຍຸ້ງຍາກຢ່າງຈິງຈັງ ແລະ ໃຫ້ມີຜົນສໍາເລັດຢ່າງຈົບງາມ, ສຶກສາອົບຮົມການເມືອງ-ນຳພາແນວຄິດໃຫ້ພະນັກງານ ຄູອາຈານຢູ່ໃນໂຮງຮຽນ ແລະ ຫ້ອງການສຶກສາທິການ ແລະ ກິລາເມືອງໄດ້ຮັບຮູ້, ເຊື່ອມຊຶມ, ເຂົ້າໃຈ, ກຳແໜ້ນຕໍ່ແນວທາງການປ່ຽນແປງໃໝ່ຂອງພັກ, ລະບຽບກົດໝາຍຂອງລັດ, ຂໍ້ກໍານົດກົດລະບຽບຂອງກະຊວງສຶກສາທິການ ແລະ ກິລາ ໂດຍສະເພາະເອົາໃຈໃສ່ການເກັບກໍາຂໍ້ມູນຄວາມຕ້ອງການດ້ານບຸກຄະລາກອນຄູອາຈານທີ່ຍັງເປັນອາສາສະໝັກຂອງເມືອງ, ຄູອາຈານໃຫ້ມີຄວາມເຂັ້ມແຂງໜັກແໜ້ນ, ການກໍ່ສ້າງພັກ-ພະນັກງານຮຸ່ນສືບທອດໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ ເພື່ອພັດທະນາຕົນເອງ, ພັດທະນາວຽກງານສຶກສາ ແລະ ກິລາ, ສຸ່ມໃສ່ການສອນພາສາລາວ ແລະ ຄະນິດສາດໃນຂັ້ນປະຖົມສຶກສາປີທີ 1 ແລະ ປີທີ 2 ໂດຍຈັດສັນຄູສອນທີ່ມີປະສົບການສອນດີໄປສອນຫ້ອງເລີ່ມຕົ້ນຢູ່ຊັ້ນປະຖົມສຶກສາໃຫ້ມີແບບແຜນທີ່ທັນສະໄໝ.
ພ້ອມກັນນີ້, ທ່ານຮອງລັດຖະມົນຕີ ສສກ ຍັງເນັ້ນໃຫ້ຜູ້ບໍລິຫານການສຶກສາ-ກິລາເອົາໃຈໃສ່ໃນການເຄື່ອນໄຫວວຽກງານ ຕົ້ນຕໍແມ່ນການປັບປຸງຄຸນນະພາບການສຶກສາ ແລະ ກິລາ ໃຫ້ພັດທະນາດີຂຶ້ນກວ່າເກົ່າ, ເອົາໃຈໃສ່ຄວບຄຸມ ແລະ ປ້ອງກັນພະຍາດໂຄວິດ-19 ເພື່ອເຄື່ອນໄຫວວຽກງານໃຫ້ມີຂໍ້ສະດວກ, ລະບົບແບບແຜນວິທີເຮັດວຽກຕ້ອງອີງໃສ່ນິຕິກໍາເປັນບ່ອນອີງ, ໃນການຈັດຕັ້ງປະຕິບັດປັບປຸງລະບົບໂຄງປະກອບການຈັດຕັ້ງໃຫ້ມີຄວາມສອດຄ່ອງ, ປັບປຸງດ້ານບຸກຄະລາກອນໃສ່ໂຄງປະກອບການຈັດຕັ້ງ ແລະ ປັບປຸງກົນໄກລະບອບແບບແຜນວິທີເຮັດວຽກສອດຄ່ອງ ແລະ ສາມາດປັບປ່ຽນໄດ້, ວຽກງານການສຶກສາ ແລະ ກິລາ ຕ້ອງມີແຜນກໍານົດຢ່າງຈະແຈ້ງ, ສຸມໃສ່ການປະຕິບັດ 15 ຄາດໝາຍຂອງການສຶກສາ-ກິລາ, ສະກັດກັ້ນ ແກ້ໄຂປະກົດການຫຍໍ້ທໍ້. ສຳລັບວຽກງານການສຶກສາ-ກິລາ ສິ່ງສໍາຄັນຕ້ອງມີການສ້າງແຜນວຽກ, ແຜນງານ, ແຜນຄົນຢ່າງລະອຽດ, ມີເປົ້າໝາຍໃນການກໍ່ສ້າງຊັບພະຍາກອນມະນຸດ ໃນວຽກງານການພັດທະນາການສຶກສາ-ກິລາ, ພັດທະນາຄົນໃຫ້ມີປະສິດທິຜົນ ແລະ ປະສິດທິພາບ.
ນອກຈາກນີ້, ທ່ານຮອງລັດຖະມົນຕີ ສສກ ຍັງໄດ້ລົງຕິດຕາມເບິ່ງການກໍ່ສ້າງສະໜາມກິລາບານເຕະຂອງເມືອງປາກຊ່ອງທີ່ກຳລັງເລີ່ມລົງມືປະຕິບັດ, ຊຶ່ງຄາດວ່າຈະໃຫ້ສຳເລັດທັນການເປີດການແຂ່ງຂັນກິລານັກຮຽນປະຈຳເມືອງພາຍໃນເດືອນຕຸລາ 2022 ນີ້.
ໂດຍ: ຂາວພອນ ມ້າວຄໍາຜິວ ສກຂ
